ရၤမတံဝ့ၢ်ပယီၤသုးမၤအါထီၣ်ဂံၢ်ဘါလၢ(၂၇၅)သုးကလၢၤ,(KNA)တနီၤသုးကွံၥ်သးဆူဝ့ၢ်ချၢ

လါယနူၤအါရံၤ ၃၀သီ, ၂၀၂၆နံၣ်, ခ့ၣ်အဲးစံၣ်,

ကညီကီၢ်စဲၣ်ကီၢ်ဆၢ,ရၤမတံဝ့ၢ်ပူၤပယီၤသုးကရူၢ်နုၥ်လီၤမၤအါထီၣ်ဂံၢ်ဘါလၢ(၂၇၅)သုးကလၢၤပူၤအဃိ,သုးခိးကီၢ်ဆၢ(BGF)လၢအပျိၥ်လဲကွံၥ်သးဆူကညီဒီကလုၥ်သုးမုၢ်ဒိၣ်(KNA)တဖၣ်တနီၤသုးကွံၥ်ဝဲသးဆူဝ့ၢ်ချၢအိၣ်ဝဲအဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဖၣ်စံးဝဲန့ၣ်လီၤ.

ရၤမတံဝ့ၢ်ပူၤပယီၤသုးကရူၢ်ကရၢအံၤ,နုၥ်လီၤအါထီၣ်ဝဲလၢ(၂၇၅)သုးကလၢၤပူၤဘူးထီၣ်လၢတနွံဃၣ်ဃၣ်လံအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.

ဒီးအဝဲသ့ၣ်တဖၣ်မၤအါထီၣ်သးဝံၤအလီၢ်ခံ,သုးခိၣ်ဒိၣ်စိစီၤခၠံၣ်သူၣ်အပှၤလၢပျိၥ်လဲသးဆူ(KNA)တဖၣ်သုးကွံၥ်ဝဲအသးဆူဝ့ၢ်ချၢအိၣ်ဝဲအဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.

“ပယီၤသုးနုၥ်လီၤပၥ်ဆိလၢ(၂၇၅)အပူၤစးထီၣ်လၢ(၂၂)သီ(၂၃)သီအခါလံ,အသုသိလ့ၣ်ဒီးအပှၤနီၢ်ဂံၢ်ဟဲထီၣ်အါမးနုၥ်လီၤဝဲတထံၣ်ဃီလၢအသုသုးကလၢၤပူၤလီၤ.ခဲအံၤမ့မ့ၢ်ဝ့ၢ်ပူၤဒုသုးခိၣ်ခၠံၣ်သူအပှၤလၢပျိၥ်လဲသးလၢ(KNA)တဖၣ်တအိၣ်လၢၤဘၣ်.အဝဲသ့ၣ်က့ၤဃီၤအိၣ်ကဒါက့ၤဝဲလၢ(နဒံၤလ့မၠဲၤ)တၢ်လီၢ်တၢ်ကျဲဒီးဝ့ၢ်ချၢတၢ်လီၢ်တၢ်ကျဲတဖၣ်အပူၤလံ”အဂ့ၢ်စံးဝဲဒၣ်န့ၣ်လီၤ.

လၢန့ၣ်အမဲၥ်ညါ,တကီၢ်ခါခဲအံၤဝ့ၢ်ပူၤသုးခိးကီၢ်ဆၢ(BGF)လၢတပျိၥ်လဲအသးဘၣ်တဖၣ်ဒီး,တၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA),ကညီတၢ်မုၥ်တၢ်ခုၣ်ကီၣ်ကးကရၢ(PC)တဖၣ်အိၣ်ဝဲဘၣ်ဆၣ်,အိၣ်ဒၣ်လၢနီၢ်ကစၢ်တၢ်လီၢ်တၢ်ကျဲဒၣ်ဝဲအပူၤလီၤအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.

ရၤမတံဝ့ၢ်ပူၤပယီၤသုးလၢနုၥ်လီၤမၤအါထီၣ်အသးဆူ(၂၇၅)သုးကလၢၤပူၤတဖၣ်အံၤ,ဟးထီၣ်က့ၤလီၤဝဲလၢဝ့ၢ်ပူၤဖဲမုၢ်နၤခီအဆၢကတီၢ်အိၣ်ဝဲအသိး,ခးတပျူၤတပျီၤလီၤဝဲကျိဖးဒိၣ်ဆူဖလူတကပၤအိၣ်စ့ၢ်ကီးဝဲအဂ့ၢ်,အဝဲစံးစ့ၢ်ကီးဝဲဒၣ်န့ၣ်လီၤ.

ခီဖျိပယီၤသုးကရူၢ်ကရၢအတၢ်ကလုၢ်အဃိ,သုးခိးကီၢ်ဆၢ(BGF)လၢအပျိၥ်လဲကွံၥ်အသးဆူ(KNA)တဖၣ်ဟးထီၣ်ကွံၥ်ဝဲလၢရၤမတံဝ့ၢ်ပူၤအဂ့ၢ်,သ့ၣ်ညါဘၣ်န့ၣ်လီၤ.

တကးဒံးဘၣ်,ဒ်ပယီၤသုးကရူၢ်ကရၢပၥ်ဖျါတ့ၢ်ဝဲဖဲအပူၤကွံၥ်လါယနူၤအါရံၤ(၁၉)သီအနံၤအပူၤအသိးန့ၣ်,သုးခိးကီၢ်ဆၢ(BGF)လၢအပျိၥ်လဲသးဆူ(KNA)တဖၣ်အံၤကဘၣ်ဟးထီၣ်ကွံၥ်ဝဲလၢရၤမတံဝ့ၢ်ပူၤအစဲၤခံကတၢၢ်ဖဲလါယနူၤအါရံၤ(၂၅)သီအနံၤအပူၤအဂ့ၢ်,သ့ၣ်ညါဘၣ်န့ၣ်လီၤ.

ဘၣ်ဃးဒီးရၤမတံဝ့ၢ်ပူၤပယီၤသုးကရူၢ်ကရၢဒီး(KNA)အဘၢၣ်စၢၤတၢ်အိၣ်သးအိၣ်ဝဲဒ်အံၤအဖီခိၣ်,ရၤမတံဝ့ၢ်လီၢ်ကဝီၤကမျၢၢ်တဂၤပဲၥ်ထံနီၤဖးဝဲဒ်အံၤန့ၣ်လီၤ.

“ခဲအံၤအသုတၢ်အံၤပလဲၥ်လိၥ်သးလီၤ.ပယီၤသုးတကပၤသနၥ်က့တၢ်ဘၣ်အီၤကအိၣ်ပှၢ်တဃဲးစ့ၢ်လီၤ.ပှၤလဲဖံဘၣ်ခိၣ်တဒူၣ်အံၤတပျံၤအီၤလၢၤဘၣ်.ယကနၢ်အသုတဲတၢ်န့ၣ်ကမၤတၢ်လီၤ.ပှၤတဒူၣ်အံၤတမ့ၢ်ပျံၤပယီၤဘၣ်.တၢ်မ့ၢ်အိၣ်ဒၣ်တခါလၢမ့ခးလိၥ်သးနီၢ်ကီၢ်တၢ်ဘၣ်ယိၣ်အိၣ်လၢကခးလီၤဝဲလၢဝ့ၢ်ပူၤလီၤ” အဂ့ၢ်စံးဝဲဒၣ်န့ၣ်လီၤ.

တကတီၢ်ဃီ,တကီၢ်ခါခဲအံၤဝ့ၢ်ပူၤကၠိတဖၣ်အပူၤဖိဒံဖိသၣ်တၢ်မၤလိမၤဒိးတဝံၤတတဲၥ်ဒံးဘၣ်အဃိ,ခံခီခံကပၤပလဲၥ်လိၥ်သးအဖၢမုၢ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.

ဒ်န့ၣ်အသိး,ဝ့ၢ်ပူၤတၢ်အိၣ်သးအဖီခိၣ်ကမျၢၢ်လီၢ်ကဝီၤဖိတနီၤနုၥ်လီၤအိၣ်ဆိးပၥ်ဝဲကီၢ်ကၠီၣ်တဲၣ်ပူၤအိၣ်လံဝဲအသိး,တနီၤတခီအိၣ်ခိးဒိကနၣ်တၢ်အိၣ်သးတပယူၥ်ဃီဒီးအိၣ်ဆိးဝဲလၢတၢ်ပလီၢ်ပဒီသးအပူၤအဂ့ၢ်,သ့ၣ်ညါဘၣ်န့ၣ်လီၤ.