လါယနူၤအါရံၤ ၃၁ သီ, ၂၀၂၆ နံၣ်, ခ့ၣ်အဲးစံၣ်
မၠၣ်ဝတံၣ်ဝ့ၢ်လၢအရ့ဒိၣ်လၢသုးမီၤစိရိၤအဂီၢ်အံၤလၢကဟဲထီၣ်ဒိၣ်စိက့ၤဝဲအဂီၢ် ပယီၤသုးဟဲထီၣ်တုၤအါအါဂီၢ်ဂီၢ်လံဒီးဖဲန့ၣ်အကျါ ပၣ်ဃုၥ်ဝဲကညီဘူးဒးသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိလၢအိၣ်ဝ့ၢ်ပူၤအံၤတဖၣ် စံးဝဲအသိး သ့ၣ်ညါဘၣ်န့ၣ်လီၤ.
သုးမီၤစိရိၤထုးထီၣ်တၢ်ကလုၢ်လၢကညီဒီကလုၥ်သုးမုၢ်ဒိၣ်(KNA)ကဘၣ်ဟးထီၣ်လၢမၠၣ်ဝတံၣ်ဝ့ၢ်ပူၤဝံၤလီၢ်ခံ ဖဲအပူၤကွံၥ် ခံ သီအခါန့ၣ် ပယီၤသုးသိလ့ၣ်အါအါဂီၢ်ဂီၢ်လၢပၣ်ဃုၥ်ပှၤနီၣ်ဂံၢ်အါအါဂီၢ်ဂီၢ်အံၤအိၣ်ဟဲထီၣ်ဝဲလၢဖၣ်အၣ်ဝ့ၢ်အံၤတဆီပညိၣ် ဟဲထီၣ်ဝဲဆူ မၠၣ်ဝတံၣ်ဝ့ၢ်အံၤန့ၣ်လီၤ.
ဘၣ်ဆၣ်ဖဲမဟါလါယနူၤအါရံၤ ၂၉ သီအနံၤန့ၣ် လၢကီးတရံး-မၠၣ်ဝတံၣ်အ့ရှါကျဲမုၢ်အံၤတဆီ ပယီၤသုးဟဲထီၣ်တုၤလၢ မၠၣ်တဝံၣ်ဝ့ၢ်ပူၤလံတကးဒံးဘၣ် လၢဟဲထီၣ်အကျါပၣ်ဃုၥ်ဝဲ(DKBA)သုးခိၣ်ဘိၤဘိၣ်အပှၤဒီး ပယီၤသုးအံၤတၢ်ရဲၣ်တၢ်ကျဲၤ အိၣ်လၢကဟးပၠး အသုးဂံၢ်ဘါအဂ့ၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးထံးပှၤဟ့ၣ်တၢ် ကစီၣ်ဖိလၢတ အဲၣ်ဒိးပၥ်ဖျါအမံၤတဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ဖဲမဟါန့ၣ်ပယီၤသုးဟဲထီၣ်ဒီးအသုးကါန့ၣ်ဒီဒူၣ်အဝဲသ့ၣ်ဟဲထီၣ်တုၤလၢၤလံ.ဟဲထီၣ်ဖဲအ့ရှါကျဲလိၤလိၤန့ၣ်လီၤ.ဟဲထီၣ်တုၤနါက့အဝဲသ့ၣ်အိၣ်ဒ်အကျိၥ်,ဝဲစ့ၢ်ကီးပအိၣ်လၢပကျိၥ်,(KNA)နါက့အိၣ်လၢအကျိၥ်. ခဲအံၤမၠၣ်ဝတံၣ်န့ၣ်ဖီၣ်စုကဝဲၤကရူၢ်အိၣ်(၄)ဒူၣ်, (၅)ဒူၣ် (BGF)ဒီးအိၣ်ဖဲန့ၣ်, (KNA) အိၣ်ဖဲန့ၣ်,(PC)အိၣ်ဖဲန့ၣ်, (DKBA) သုးခိၣ် ဘိၤဘံၣ်အပှၤဟဲတုၤအိၣ်ဖဲန့ၣ်, ပယီၤသုးဒီး ဟဲထီၣ်အါထီၣ်အိၣ်ဖဲန့ၣ်. ခဲအံၤပနၢ်ဟူလၢကဟးပၠးအဂံၢ်အဘါလၢဝ့ၢ်ပူၤ” အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးမၠၣ်ဝတံၣ်ဝ့ၢ်ပူၤတချုးပယီၤသုးဟဲထီၣ်တုၤဟံန့ၢ်အလီၢ်အကျဲဒံးဘၣ်အခါန့ၣ် တၢ်ကစီၣ်ဟးထီၣ်လၢ(BGF)လၢအဆီ တလဲ သးဆူ(KNA)တဖၣ် တနီၤန့ၣ်ဟးထီၣ်အိၣ်ဝဲဒီး တနီၤန့ၣ်ဆဲးအိၣ်ဒံးဝဲလၢတၢ်နၢ်ပၢၢ်ပူၤအဂ့ၢ်န့ၣ် (DKBA)သုးထံးတဂၤ ဃီဝဲန့ၣ် စံးအါထီၣ်ဝဲန့ၣ်လီၤ.
“ခဲအံၤယသ့ၣ်ညါဒုအိၣ်အ့ဆ့လီၤမီၤ.(KNA)န့ၣ်ထုးကွံၥ်အတၢ်ပနီၣ်ဒီးကျးထီၣ်ဝဲ BGF ဖံဘၣ်ခိၣ်တၢ်ပနီၣ်ဒီးအိၣ်ဝဲဒ်န့ၣ်လီၤ. ဟးလ့ၢ်လိၤလ့ၢ်ထီၣ်အိၣ်.တနီၤန့ၣ်ဟးထီၣ်တၢ်ချၢအိၣ်.ဒ်သိး(DKBA)အံၤတနီၤအပျံၤတၢ်အဃိဟးထီၣ်တၢ်ချၢ,တနီၤခီတပျံၤတၢ်ဘၣ်အိၣ်လၢဝ့ၢ်ပူၤန့ၣ်လီၤ.”အဂ့ၢ်န့ၣ် (DKBA)ပှၤဟ့ၣ်တၢ်ကစီၣ်ဖိတဂၤဃီဝဲန့ၣ်စံးအါထီၣ်ဝဲန့ၣ်လီၤ.
မၠၣ်ဝတံၣ်ဝ့ၢ်ပူၤတချုးပယီၤသုးဟဲထီၣ်တုၤအပူၤကွံၥ်လါယနူၤအါရံၤ ၁၉ သီအခါ (PC)ဒီး(DKBA)အံၤကဘၣ်ဆှၢဝဲ ကရူၢ်အပှၤအမံၤစရီတၢ်ဂီၤ သ့ၣ်တဖၣ် အသိး (၂၇၅)သုးရ့ၣ်တၢ်လီၢ်လၢဝ့ၢ်ဃၢၤထံးအံၤတၢ်မ့ၢ်ဟဲခးဝဲန့ၣ် ကက့ၤခးလီၤကဒါ တၢ်လီၢ်(၁၈)တီၤလၢကဘီယူၤ အဂ့ၢ်န့ၣ် သုးမီၤစိရိၤထုးထီၣ်လံၥ်တဲပျံၤဝဲန့ၣ်လီၤ.
ဒ်န့ၣ်အသိးသုးမီၤစိရိၤထုးထီၣ်လံၥ်ဖဲန့ၣ်ဝံၤလီၢ်ခံဖဲအပူၤကွံၥ်လါယနူၤအါရံၤ ၂၈ သီအနံၤစ့ၢ်ကီး လၢမၠၣ်ဝတံၣ်ဝ့ၢ်ဃၢၤ လ့က့ၣ်ကိၥ် ဟီၣ်ကတိၤ မ့လဲၣ်ပၤတကပၤန့ၣ် သုးမီၤစိရိၤကဘီယူၤလဲၤတ့ၢ်လီၤဒံးမ့ၣ်ပိၢ်လၢတစှၤန့ၢ်ဝဲ(၃)ဘျီကဲထီၣ်ဒံးဝဲန့ၣ်လီၤ.
အဃိလၢသုးမီၤစိရိၤအတၢ်တဲပျံၤတဲဖုးအံၤဒီးခဲအံၤခီဖျိလၢပယီၤသုးဂံၢ်ဘါဟဲထီၣ်တုၤအါအါဂီၢ်ဂီၢ်အဃိ ကမျၢၢ်လၢ အိၣ်ဝ့ၢ်ပူၤတဖၣ် ဘၣ်ယိၣ်ဝဲလၢတၢ်ဒုး ကကဲထီၣ်အဖီခိၣ် တနီၤန့ၣ်ဟးပလဲၥ်သးအိၣ်အသိးတနီၤန့ၣ် အိၣ်ခိးကနၣ်ဝဲတၢ်အိၣ် သး ကဆဲးကဲထီၣ်သး ဒ်လဲၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်မဟါပယီၤသုးဟဲထီၣ်တုၤလၢမၠၣ်ဝတံၣ်ဝ့ၢ်ပူၤအါအါဂီၢ်ဂီၢ်လံဘၣ်ဆၣ် လၢဖၣ်အၣ်-ကြုတုအံၤတဆီဟဲထီၣ် ကဒီးဝဲအါအါဂီၢ်ဂီၢ်ဒီး တၢ်ဒုးစ့ၢ်ကီးကဲထီၣ်ဝဲလၢကျဲဘၢၣ်စၢၤအဂ့ၢ်န့ၣ် ကမျၢၢ်လၢအသ့ၣ်ညါထွဲတၢ်ဂ့ၢ်အံၤစံးဝဲန့ၣ်လီၤ.
“ဖဲမဟါပယီၤသုးကါဟဲထီၣ်န့ၣ်ခဲလၢၥ်အခိၣ်(၃၀)ဘျဲၣ်.အိၣ်ဟဲထီၣ်လၢဖၣ်အၣ်တကပၤ.ဖဲမဟါန့ၣ်အမံဖဲ(အ့ၤဒူၣ်)ဝံၤတဂီၤအံၤ ၇ နၣ်ရံၣ်န့ၣ်ဟးထီၣ်လီၤ. ပၣ်ဝဲဒၣ်(ဝံကိၣ်)ကါန့ၣ် ၄ ခိၣ်, သၤခၠၣ်ကါန့ၣ်(၃)ခိၣ်.လၢအဂၤန့ၣ် ၆ ဘ့ကါလဲလဲလီၤ. ဖဲတဂီၤအံၤ(၉)နၣ် ရံၣ်ဘျဲၣ်အခါန့ၣ်လဲၤထီၣ်တဒူၣ်ဒံး.ပှၤခိးခးအဝဲသ့ၣ်ဖဲသီၣ်လဲးလိးလီၤ.ခဲအံၤကတုၤထီၣ်လၢကြုၢ်တုဖီခိၣ်လံ” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးကီၢ်ခီဒိၣ်ဒီးကီၢ်စဲၣ်(၉)ဘ့ၣ်ပူၤ ကီၢ်ဆၣ်(၆၃)ဘ့ၣ်အကျါလၢအပၣ်ဃုၥ်ဝဲခ့ၣ်အဲၣ်ယူၣ်နိၣ်တကီ(ကၠၤအ့စ့ၣ်ကၠံ)ကီၢ်ဆၣ်ဒီး ကီးတရံးကီၢ်ဆၣ်လၢဒုးယၤတၢ်သဘံၣ်သဘုၣ်ကဲထီၣ်အဖၢမုၢ်အံၤန့ၣ် သုးမီၤစိရိၤဘိးဘၣ်ရၤလီၤမၤအါထီၣ်ကဒီးဝဲဂ့ၢ်ဂီၢ်အူ တၢ်အိၣ်သးလၢ အသီ(၉၀)အဂ့ၢ်န့ၣ် ထုးထီၣ်ပၥ်ဖျါဝဲဖဲ မဟါလါယနူၤအါရံၤ ၂၉ သီအနံၤန့ၣ်လီၤ.
