လါဖ့ၤဘြူၤအါရံၤ ၆ သီ, ၂၀၂၆ နံၣ်, ခ့ၣ်အဲးစံၣ်
ဖၣ်ပူၣ်ဒုးယၤသုးကလၢၤလၢအိၣ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤအံၤ စးထီၣ်ဖဲတလါအံၤ သုးမီၤစိရိၤ သူကဘီယူၤအါဘ့ၣ် မုၢ်နၤမုၢ်ဆါလဲၤတ့ၢ်လီၤဝဲမ့ၣ်ပိၢ်တပယူၥ်ဃီလၢသုးကလၢၤအခိၣ်အဃၢၤအဂ့ၢ်န့ၣ် သ့ၣ်ညါဘၣ်လၢ KNLA ပှၤဘၣ်မူဘၣ်ဒါ အအိၣ် န့ၣ်လီၤ.
ဖၣ်ပူၣ်ကလၢၤလၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ကဝီၤခးဝဲန့ၢ်လၢတနံၣ်ဃၣ်ဃၣ်အံၤန့ၣ် သုးကလၢၤအံၤသုတလီၤ တဂ့ၤအဂီၢ် စးထီၣ်ဖဲတလါအံၤလါဖ့ၤဘြူၤအါရံၤထီၣ်အံၤ သုးမီၤစိရိၤအကဘီယူၤဟဲခးလီၤတၢ်အါန့ၢ်ဒံးအပူၤကွံၥ် လါ ဒံးအဂ့ၢ်န့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ကဘီယူၤစးထီၣ်ဟဲခးလီၤတၢ်အါထီၣ်န့ၣ်ဖဲ ၂၀၂၆ ထီၣ်အံၤန့ၣ်ခးဝဲဖးအါထီၣ်လံ. လီၤဆီဒၣ်တၢ်ဖဲလါဖ့ၤဘြူၤအါရံၤထီၣ်အံၤခးဝဲ အါန့ၢ်ဒံးအပူၤကွံၥ်တလါအခါဒံး.လီၤဆီဒၣ်တၢ် ဟဲခးလီၤဝဲတၢ်ဖဲဖၣ်ပူၣ်သုးကလၢၤအခိၣ်အဃၢၤ, ဒူသဝီလၢအိၣ်ဘူးဖဲန့ၣ် တဖၣ် အပူၤန့ၣ်ဟဲခးဝဲကိးမုၢ်နံၤကိးမုၢ်နၤ,မ့တခးတတီၤန့ၣ်ခးတတီၤလီၤ.စးထီၣ်လၢမဂီၤတုၤလၢခဲအံၤတစုလၢဖၣ်ပူၣ်ဝ့ၢ်တကပၤန့ၣ်ပနၢ်ဟူကဘီယူၤဟဲခးလီၤတၢ်,ကျိဖးဒိၣ်သီၣ်တုၤလၢခဲအံၤတကတၢၢ်ဒံးဘၣ်”အဂ့ၢ်န့ၣ် စံးဝဲန့ၣ်လီၤ.
ဒ်ပှၤလၢဘူးဒီးတၢ်ပၢၢ်ဆၢကရူၢ်စံးဝဲအသိးန့ၣ် ဖၣ်ပူၣ်ဒုးယၤသုးကလၢၤအခိၣ်အဃၢၤ စးထီၣ်ဖဲတလါအံၤလါဖ့ၤဘြူၤအါရံၤထီၣ် ၁ သီတုၤလၢတနံၤအံၤ ၆ သီ မုၢ်နၤမုၢ်ဆါ သုးမီၤစိရိၤအံၤသူဝဲ(Jet Fighter), (Y-12), (Y-8) ကဘီယူၤသ့ၣ်တဖၣ်ဒီးလဲၤတ့ၢ်လီၤ ဝဲပီၣ်(၅၀၀)မ့ၣ်ပိၢ်ဃုၥ်ဒီးကျိဖိအါအါဂီၢ်ဂီၢ်အိၣ်လံလၢ(၁၀၀)ခိၣ်ဃၢၤလံအဂ့ၢ်န့ၣ် (KNLA)ဂံၢ်ခီၣ်ထံးပှၤဟ့ၣ် တၢ်ကစီၣ်တဖၣ် သ့ၣ်ညါဘၣ်န့ၣ်လီၤ.
ဖၣ်ပူၣ်သုးကလၢၤခိၣ်ဃၢၤလၢကဘီယူၤလဲၤခးလီၤတၢ်ခဲအံၤန့ၣ် လၢမ့ၣ်ပိၢ်အံၤအဃိ ဟံၣ်တၢ်သူၣ်ထီၣ်တၢ်ဟးဂူၥ်ဟးဂီၤ မ့အိၣ်ဘၣ်ဆၣ် မ့မ့ၢ်ကမျၢၢ်န့ၣ်ခီဖျိဃ့ၢ်ထီၣ်ဟးစံၣ်အိၣ်ပလဲၥ်သးန့ၢ်လၢအနံၣ်လံအဃိ တၢ်ဘၣ်ဒိဘၣ်ထံးကဲထီၣ်တအိၣ်ဝဲဘၣ်သ့ အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲန့ၣ်လီၤ.
ဖၣ်ပူၣ်သုးကလၢၤလၢအရ့ဒိၣ်ဝဲလၢသုးမီၤစိရိၤအဂီၢ်အံၤ တၢ်စးထီၣ်ကဝီၤခး,မၤတဲၥ်ဝဲတၢ်အီၣ်ကျိၤန့ၢ်ဝဲဒၣ်လၢအနံၣ်လံဒီး ပယီၤသုးလၢအိၣ်သုးကလၢၤအံၤအပူၤတဖၣ်ဟးထီၣ်တၢ်ချၢတဘူၣ်အဃိ လၢကဘီယူၤအံၤတဆီတၢ်လဲၤတ့ၢ်လီၤ န့ၢ်ဝဲ ကျိချံပှၥ်သၣ်,တၢ်အီၣ်တၢ်အီၣ် သ့ၣ်တဖၣ် အိၣ်ဝဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
