လါစဲးပထ့ဘၢၣ် ၁၉ သီ, ၂၀၁၈ နံၣ်, စီၤရှါ
မုၢ်တြီၢ်(ဖၣ်ပူၣ်)ကီၢ်ရ့ၣ်,ဒွဲၣ်လိဒီးဘုသိၣ်ကီၢ်ဆၣ်သ့ၣ်တဖၣ်အပူၤ ခီဖျိသမူးဖိတၢ်ဆါအံၤ ကဲထီၣ်၀ဲဒိၣ်ဒိၣ် မုၢ် မုၢ်အဃိ ပှၤဖိသၣ် ၂၀၀ ဘျဲၣ်အကျါ သံကွံာ်၀ဲတဂၤဒီး မဲာ်ချံတထံၣ်တၢ်လၢၤဘၣ်တဂၤအဂ့ၢ် ထၢၣ်၀ံချၢ တၢ်အိၣ်ဆူၣ်အိၣ်ချ့ကရူၢ် (BPHWT) မုၢ်တြီၢ်ဟီၣ်က၀ီၤမူဒါခိၣ် စီၤဖိအ့ စံး၀ဲန့ၣ်လီၤ.
“ဖိသၣ်လၢသံတဂၤအံၤ မ့ၢ်အသံလၢသမူးဖိတၢ်ဆါဧါ,မ့ၢ်အသံလၢတၢ်ဆါအဂၤဧါန့ၣ် ပကလူၤဃုအစၢန့ၣ်လီၤ. မ့မ့ၢ်ဖိသၣ်လၢအမဲာ်ချံတထံၣ်တၢ်လၢၤဘၣ်တဂၤန့ၣ် ကဲထီၣ်အသးလၢတၢ်ဆါအံၤအဃိလီၤ. ပ၀ဲတၢ်အိၣ်ဆူၣ် အိၣ်ချ့ပှၤမၤတၢ်ဖိတဖၣ် ပခိးကွၢ်လၢအဘူးအဃိ ပှၤဆါတဖၣ်တဖၣ်က့ၤအိၣ်ဆူၣ်ထီၣ်ကဒါက့ၤအိၣ်လီၤ.”အဂ့ၢ် စီၤဖိအ့စံးဘၣ်ခ့ၣ်အဲးစံၣ်န့ၣ်လီၤ.
အပူၤကွံာ်စးထီၣ်လၢ လါအီကူး ၂၄ သီတုၤ လါစဲးပထ့ဘၢၣ် ၁၀သီအနံၤ တၢ်ဆါအံၤစးထီၣ်ရၤလီၤအသးလၢ သ၀ီၤ ၈ ဖျၢၣ်အပူၤ ပှၤဒိးန့ၢ်တၢ်ဆါအိၣ်၀ဲ ၁၀၀ ဘျဲၣ်ဒီး ကတီၢ်အံၤ ဟဲအါထီၣ် သ၀ီ ၄ ဖျၢၣ်ဒီး ဖိသၣ်လၢ အဒိးန့ၢ်တၢ်ဆါ အါထီၣ် ၁၀၀ဘျဲၣ်အဃိ ဘၣ်ကွၢ်ထွဲကူစါယါဘျါ၀ဲဘူးဘူးတံၢ်တံၢ်အဂ့ၢ် စီၤဖိအ့ဆဲးတဲ ကဒီး၀ဲလီၤ.
ဖိသၣ်လၢသမူးဖိတၢ်ဆါဘၣ်သ့ၣ်တဖၣ်အံၤအဂီၢ် ကတီၢ်အံၤဘၣ်တၢ်ကွၢ်ထွဲကူစါယါဘျါအီၤလၢ ကညီဆူၣ်ချ့ မၤစၢၤ၀ဲၤကျိၤ(KDHW),(Shoklo Malaria Research Unit-SMRU)ကရူၢ်ဒီး(Community Partners International )သ့ၣ်တဖၣ် ပာ်ဖှိၣ်မၤသကိးတၢ်အဂ့ၢ်(BPHWT)တဲ၀ဲန့ၣ်လီၤ.
လၢန့ၢ်အမဲာ်ညါ တၢ်ဆါအံၤကဲထီၣ်အသးအါဒၣ်တက့ၢ် ဖိသၣ်လၢ အသးနံၣ် ၁၂နံၣ်ဆူအဖီလာ်တဖၣ်ဒီး တၢ်ဆါအံၤ အတၢ်ပနီၣ်ဖျါ၀ဲဒ်အမ့ၢ် တၢ်ကိၢ်ထီၣ်,ဖံးဘ့ၣ်ခိၣ်ကဲထီၣ်တၢ်ပူၤလီၢ်, ကူး,ထါခိၣ်တၢ်ပူၤ လီၢ်ကဲထီၣ်,မဲာ်ချံဆါ,ကိာ်ဘိဆါဒီးဟၢဖၢလူသ့ၣ်တဖၣ်ကဲထီၣ်သးန့ၣ်လီၤ.
လၢတၢ်ကူစါယါဘျါ၀ဲသမူးဖိတၢ်ဆါအံၤအဂီၢ် ကသံၣ်ကသီလၢအလိၣ်တဖၣ်န့ၣ် မဲၢ်တီၢ်တၢ်ဆါဟံၣ် (MTC),(HSS Program )ကရူၢ်သ့ၣ်တဖၣ်ကွၢ်ထွဲမၤစၢၤ၀ဲကသံၣ်ကသီတဖၣ် ဘၣ်ဆၣ်တလၢတပှဲၤဘၣ်ဒီး ကတီၢ်အံၤလိၣ်အါထီၣ်တၢ်မၤစၢၤတဖၣ်အဂ့ၢ် (BPHWT)တဲ၀ဲန့ၣ်လီၤ.
