လါဖ့ၤဘြူၤအါရံၤ ၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ဝ့ၢ်တကူၣ်-မီၣ်လမၠဲၣ်ကျဲ စွ့ၣ်အ့ၣ်ဒိၢ်သဝီဖိလၢပယီၤသုးဖီၣ်က့ၤကိးဝဲအံၤ န့ၢ်ခံနွံဘျဲၣ်လံဘၣ်ဆၣ် တုၤလၢခဲအံၤတၢ်တပျၢ်လီၤဝဲဒံးဘၣ်ဒီးတၢ်တပျဲဒုးထံၣ်စ့ၢ်ကီးအီၤလၢအဟံၣ်ဖိဃီဖိဘၣ်အဂ့ၢ်န့ၣ် သ့ၣ်ညါဘၣ်လၢ သဝီပှၤဘၣ်မူ ဘၣ်ဒါ အအိၣ်န့ၣ်လီၤ.
ပယီၤသုးအံၤဟ့ၣ်ထီၣ်တၢ်ဂ့ၢ်လၢသဝီဖိတဂၤအံၤတၢ်ဘၣ်ထွဲအိၣ်ဒီး(PDF)အဃိ ဖဲအပူၤကွံၥ်လါယနူၤအါရံၤ ၂၀ သီ အနံၤန့ၣ် ပယီၤသုးတမှံၤ လၢအိၣ်ကီးတရံးအံၤတဖၣ်ဟဲနုၥ်လီၤလၢ သထၣ်ကီၢ်ဆၣ် ဒီၣ်ယးကရူၢ် စွ့ၣ်အ့ၣ်ဒိၢ်သဝီဖိပိၥ်ခွါတဂၤအံၤ အဟံၣ်ဝံၤ ဖီၣ်က့ၤကိးဝဲဆူ ခီၣ်သုးရ့ၣ်(ခလရ-၈) တၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ဒူသဝီပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤစံးဝဲလၢ“ဖဲအသီ ၂၀ သီ ဟါခီ ၃း၀၀ နၣ်ရံၣ်ဃၣ်ဃၣ်အခါန့ၣ် ပယီၤသုးလၢအိၣ်ကီးတရံး(၄၅၄)တဖၣ်အံၤဟဲလီၤလၢသဝီပူၤဘျီပှၤလဲၤကဝီၤအဟံၣ်ဝံၤ ပှၤလဲၤကိး လီၤအီၤ,ပှၤဘိၣ်ဘၢအခိၣ် ဘျီပှၤက့ၤကိးအီၤလၢ(ခလရ-၈)န့ၣ်.ပှၤက့ၤကိးသမံသမိးအီၤဖဲန့ၣ်ဝံၤပှၤဆှၢထီၣ်ကဒါလၢ အမျိၥ်သုး (အမတ)သုးကလၢၤန့ၣ်. ပှၤတၢၣ်အီၤလၢကဲဝဲပှၤဟ့ၣ်(PDF)တၢ်ကစီၣ်အခိၣ်အဃိပယီၤသုးဟဲဖီၣ်အီၤ.အမါတဲဝဲသုကိးသါဝၤသုကမၤ မနုၤလဲၣ်. ပယီၤသုးက့ၤတဲကဒါလၢတၢ်လိၣ်သမံသမိးအီၤအိၣ်တစဲးဒ်န့ၣ်ဝံၤဖီၣ်က့ၤကိးဝဲလီၤ”အဂ့ၢ်န့ၣ် စံးဝဲဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
သဝီဖိလၢပယီၤသုးဖီၣ်က့ၤကိးအီၤအံၤမ့ၢ်ဝဲမီၤသါတ့ၣ် သးနံၣ်အိၣ်ဝဲ(၄၂)နံၣ်ဒီး ပယီၤသုးဆှိး(စွပ်စွဲ)အီၤလၢအဟ့ၣ် (PDF) တၢ်ကစီၣ်ဘၣ်ဆၣ် မ့နီၢ်နီၢ်တခီမ့ၢ်ဝဲကမျၢၢ်မုၢ်ဆ့ၣ်မုၢ်ဂီၤတၢ်ဘၣ်ထွဲတအိၣ်ဝဲဒီးတၢ်ပၢၢ်ဆၢကရူၢ်ဘၣ်အဂ့ၢ်န့ၣ် သဝီပှၤဘၣ် မူဘၣ်ဒါတဂၤဃီဝဲန့ၣ် စံးအါထီၣ်ဝဲ န့ၣ်လီၤ.
ဒ်န့ၣ်အသိးစးထီၣ်လၢတၢ်ဖီၣ်က့ၤကိးအီၤတုၤလၢခဲအံၤန့ၣ် တၢ်တပျဲဒုးထံၣ်ဝဲဒီးအဖိအမါအဟံၣ်ဖိဃီဖိဘၣ်ဒီး လၢဖိအံၤတဆီ တၢ်ပျဲတဲအီၤတၢ်ဒီးအမါတဘျီလီၤအဂ့ၢ်န့ၣ် သ့ၣ်ညါဘၣ်လၢသဝီပှၤဘၣ်မူဘၣ်ဒါအအိၣ်န့ၣ်လီၤ.
ဒ်ပှၤဘၣ်မူဘၣ်ဒါစံးဝဲအသိးန့ၣ် တကီၢ်ခါခဲအံၤသဝီဖိမီၤသါတ့ၣ်အံၤ ဘၣ်တၢ်ဟဲက့ၤပၥ်အီၤလၢ(ခလရ-၈) လံဒီး တုၤလၢခဲအံၤတၢ်ဖီၣ်အီၤအိၣ်လံဝဲ(၁၆)သီလံဘၣ်ဆၣ် တၢ်တပျၢၢ်လီၤဝဲဒံးဘၣ်န့ၣ်လီၤ.
စွ့ၣ်အ့ၣ်ဒိၢ်သဝီအံၤအိၣ်ဘူးဝဲဒီး(ခလရ-၈)သုးရ့ၣ်အိၣ်ဝဲဒၣ်လၢဝ့ၢ်တကူၣ်-မီၣ်လမၠဲၣ်ကျဲမုၢ်လါခိၣ်အဖီခိၣ်လိၤလိၤလီၤဒီး မ့အိၣ်တခီတဝၢ်ဝၢ်ဒီးဘံလ့ဝ့ၢ် အိၣ်ဆီလီၤသးလၢ(သုးက့ ၁)သထူၣ်ကီၢ်ဆၣ်ပူၤဘၣ်ဆၣ် ဒူသဝီတၢ်လီၢ်ဖဲန့ၣ်တဖၣ်အိၣ် ဘူးဒီးဘံအဃိ ပယီၤသုးဟူးဂဲၤဝဲအိၣ်အသိး (KNLA)သုးရ့ၣ်-၂ အပှၤဒီး (PDF)ကရူၢ် ကရၢ ဟူးဂဲၤဝဲ အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဒီၣ်ယးကရူၢ် စွ့ၤအ့ၣ်ဒိၢ်သဝီခိၣ်ဃၢၤလၢအမ့ၢ် ခဲမီး,ကၠဲးတူၢ်ကိသဝီအံၤ ဖဲအပူၤကွံၥ်လါယနူၤအရံၤ ၁၀ သီအနံၤန့ၣ် ပယီၤသုးဂံၢ်ဘါလၢအနီၣ်ဂံၢ်တစှၤန့ၢ်(၁၀၀)ဃၣ်ဃၣ်အံၤနုၥ်လီၤဝဲလၢသဝီပူၤဒီးဖဲန့ၣ်တၢ်ဒုးကဲထီၣ်ဝဲဒီးဟီၣ်ကဝီၤ(KNLA)သုးရ့ၣ်-၂ ပှၤအဘၢၣ်စၢၤဒံးအသိး ဖဲပယီၤသုးနုၥ်လီၤဘျီဝဲန့ၣ်အခါစ့ၢ်ကီးခးသံကမျၢၢ်(၃)ဂၤဒီးနုၥ်လီၤဟံန့ၢ်ပှၤတၢ်ဖိတၢ်လံၤ,ကျိၣ်စ့ ကဲထီၣ်ဒံး ဝဲ ဒၣ်န့ၣ်လီၤ.
