ပယီၤသုးကျိၤနုၥ်လီၤကဒီးလၢအံလူၢ်ကရူၢ်ပူၤတၢ်ဒုးကဲထီၣ်ဒီးက့ၤစိၥ်ဃုၥ်ဝဲကမျၢၢ်အစဲးကၢးတစှၤန့ၢ်(၁၇)ခိၣ်အဂ့ၢ် ပှၤဘၣ်မူ ဘၣ်ဒါစံးဝဲ

လါဖ့ၤဘြူၤအါရံၤ ၉ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အံလူၢ်ကရူၢ်အပူၤ ပယီၤသုးကျိၤနုၥ်လီၤအါအါဂီၢ်ဂီၢ်တၢ်ဒုးကဲထီၣ်ဝဲဒီး က့ၤစိၥ်ဃုၥ်ဝဲသဝီ(၂)ဖျၢၣ် ကမျၢၢ်အစဲးကၢးတစှၤန့ၢ်(၁၇)ခိၣ်ဃုၥ်ဒီးတၢ်ဖိတၢ်လံၤလၢအဂၤအဂ့ၢ်န့ၣ် သဝီအံၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.

ဖဲတလါအံၤလါဖ့ၤဘြူၤအါရံၤ ၆ သီအနံၤန့ၣ် သုးမီၤစိရိၤအသုးတြိၤ(၄၄)စုတီၤဖီၥ်လၥ်လၢသုးဂံၢ်ဘါကအိၣ်လၢ(၁၀၀)ဘျဲၣ် ၂၀၀ ခိၣ်ဃၢၤအံၤ နုၥ်လီၤဝဲလၢအံလူၢ်ကရူၢ် ဖုဝါသံၣ်သဝီအပူၤ မံဖဲန့ၣ်တနၤဝံၤမုၢ်ဆ့ၣ်ထီၣ် ၇ သီအနံၤန့ၣ် လဲၤနုၥ်လီၤ ကဒီးဝဲလၢ ချၢၣ်တိၢ်သဝီပူၤအဃိ တၢ်ဒုးကဲထီၣ်ဝဲဒီး(KNLA)သုးရ့ၣ်-၃ သုးပၥ်ဖှိၣ်အဘၢၣ်စၢၤဒံးအဂ့ၢ်န့ၣ် စံးဝဲန့ၣ်လီၤ.

ပယီၤသုးကျိၤလၢအနုၥ်လီၤတဖၣ်အံၤတၢ်တနံၤဃီဖဲ ၇ သီအခါန့ၣ် ဟးထီၣ်က့ၤကဒါလၢအသုးကလၢၤတၢ်လီၢ်လံဘၣ်ဆၣ် ဖဲအဝဲ သ့ၣ်နုၥ်လီၤဟူးဂဲၤအခါန့ၣ် သဝီခံဖျၢၣ်အံၤဃုၥ်ဒီးကမျၢၢ်လၢအိၣ်ဘူးဖဲန့ၣ်တဖၣ်ဃ့ၢ်ထီၣ်ဝဲအဃိ ပယီၤသုးတဖၣ်အံၤ တချုး အဝဲသ့ၣ်ဟးထီၣ်ဒံးဘၣ်အခါန့ၣ်နုၥ်လီၤဟးဃုခွံခွးတၢ်လၢကမျၢၢ်အဟံၣ်ပူၤဒီး ဟံက့ၤစိၥ်ဝဲကမျၢၢ်အစဲးကၢး(၁၈)ခိၣ် ဘၣ်ဟဲကဲ ထီၣ်ဝဲဒ်အံၤလီၤအဂ့ၢ်န့ၣ် အံလူၢ်ကရူၢ်ခိၣ် စံးဝဲန့ၣ်လီၤ.

“ပယီၤသုးနုၥ်လီၤလၢဖုဝါသံၣ်သဝီပူၤန့ၣ်ဖဲ(၆)သီတနံၤန့ၣ်.အမံဖဲန့ၣ်တနၤဝံၤမုၢ်ဆ့ၣ်ထီၣ်(၇)သီန့ၣ်ဟဲထီၣ်လၢချၢၣ်တိၣ်သဝီန့ၣ်.ဟဲထီၣ်ဖဲန့ၣ်ဘျီတၢ်ဒုးကဲထီၣ်,စိၥ်ဃုၥ်ပှၤစဲးကၢးဖဲန့ၣ်(၁၂)ခိၣ်.ခးလီၤသးဖဲန့ၣ်တဘျီဝံၤဟဲက့ၤလီၤလၢအံလူၢ်ဖးဒိၣ်သဝီ. ဟဲက့ၤလီၤတုၤလၢအံလူၢ်ဖးဒိၣ်သဝီဘျီခးကျိလဲးလိးပှၤတခးအီၤနီမံၤဘၣ်,နုၥ်လီၤဃုခွံခွးတၢ်လၢပှၤဟံၣ်ပူၤဝံၤက့ၤစိၥ်ဃုၥ် ဝဲပှၤအံလူၢ်ဖးဒိၣ်သဝီဖိအစဲးကဲးဖဲန့ၣ်(၅)ခိၣ်ဝံၤအိၣ်တစိၢ်ဖိဘျီက့ၤလီၤဆူအံလူၢ်ဖိသဝီန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲတနံၤအံၤန့ၣ်လီၤ.

တကးဒံးဘၣ်ပယီၤသုးဟံပှၤကမျၢၢ်အစဲးကၢး(၁၈)ခိၣ်အမဲၥ်ညါဟံဃုၥ်ဝဲပှၤကမျၢၢ်အလီတဲစိ(ဖိ)တစှၤန့ၢ်(၄)ဖျၢၣ်ဃုၥ်ဒီးစ့ပယီၤအကလီၢ် (၄၀)ကၠးအဂ့ၢ်န့ၣ် ကရူၢ်ခိၣ်စံးအါထီၣ်ဝဲန့ၣ်လီၤ.

ဒ်န့ၣ်အသိးတၢ်တနံၤဃီလၢပယီၤသုးကျိၤနုၥ်လီၤလၢချၢၣ်တိၢ်(ညောင်ထောင့်)သဝီပူၤတၢ်ဒုးကဲထီၣ်အခါန့ၣ်စ့ၢ်ကီး ပယီၤသုးတကပၤ တၢ်ဘၣ်ဒိဘၣ်ထံးအိၣ်ဝဲအသိး (PDF)အပှၤတကပၤသံစ့ၢ်ကီးဝဲ ၂ ဂၤ အဂ့ၢ်န့ၣ် သ့ၣ်ညါဘၣ်လၢပှၤဘူးဒီး (KNLA) တဖၣ် အအိၣ်န့ၣ်လီၤ.

အံလူၢ်ကရူၢ် ဒူသဝီအံၤအိၣ်ဝဲဒၣ်လၢဘံလ့ဝ့ၢ်ဃၢၤ ဝ့ၢ်တကူၣ်-မီၣ်လမၠဲၣ်ကျဲမုၢ်ဖီခိၣ်အံၤဒီး ညီနုၢ်တၢ်လီၢ်ဖဲန့ၣ်တဖၣ် ပယီၤသုးကျိၤ နုၥ်လီၤဝဲလၢတၢ်သတူၢ်ကလၥ်အိၣ်ဝဲတလီၢ်လီၢ်အမဲၥ်ညါ ပယီၤသုးခးလီၤစိကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ် တလီၢ်လီၢ် အဃိ ကမျၢၢ်သံဘၣ်ဒိဘၣ်ထံးကဲထီၣ်ဝဲခဲအံၤခဲအံၤအသိး ခီဖျိလၢတၢ်သ့ၣ်တဖၣ်အံၤအဃိ ဖုဝါသံၣ်သဝီကမျၢၢ်ဒီတသဝီဃ့ၢ်ထီၣ် ကအိၣ်လၢ(၁)လါဘျဲၣ်လံ အဂ့ၢ်န့ၣ် သဝီပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.

တကးဒံးဘၣ်အဘူးကတၢၢ်ဖဲအပူၤကွံၥ်လါယနူၤအါရံၤ ၂၆ သီ မုၢ်ဃ့ၢ်လီၤအဆၢကတီၢ်န့ၣ် သုးမီၤစိရိၤအသုးတြိၤ(၄၄)တဒူၣ်ဃီ ဝဲအံၤအစုတီၤဖီလၥ် ခီၣ်ချ့သုးရ့ၣ် (ခမရ-၃)ခးလီၤဝဲကျိဖးဒိၣ်လီၤတဲၥ်ပိၢ်ဖးထီၣ်ဝဲလၢအံလူၢ်ဒိၣ်သဝီပူၤဟံၣ်တဖျၢၣ်အဖီခိၣ်အဃိ ပှၤဒီဖံလံၤ(၂)ဂၤသံဒီးဟံၣ်အူအီၣ်လီၤကရဲခဲလၢၥ်ကဲထီၣ်ဒံးဝဲန့ၣ်လီၤ.