လါဖ့ၤဘြူၤအါရံၤ ၁၄ သီ, ၂၀၂၆ နံၣ်, ခ့ၣ်အဲးစံၣ်
ဖဲတနံၤအံၤလါဖ့ၤဘြူၤအါရံၤ ၁၄ သီအံၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ကညီဖီၣ်စုကဝဲၤကရူၢ် မၤဝဲ တၢ်ပျၢ်လီၤက့ၤ တၢ်မၤဂ့ၤထီၣ်ခိၣ်နၢ်ကံၢ်စိတၢ်မၤလိမူးတၢ်ရဲၣ်တၢ်ကျဲၤအံၤဖဲဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် ဆိၣ်စံမၠဲၣ် ကရူၢ်အံၤအလီၢ်ခၢၣ်သးတၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢ(DKBA)ဟ့ၣ်ဝဲတၢ်မၤဂ့ၤထီၣ်ခိၣ်နၢ်ကံၢ်စိတၢ်မၤလိဘျီဝဲအံၤ ပှၤလၢဟဲထီၣ်တၢ်မၤလိသ့ၣ်တဖၣ်န့ၣ်မ့ၢ်ဝဲ သုးခိၣ်ဒိၣ်ဖိဒီးသုးခိၣ်စိ ပတီၢ် ပၥ်ဖှိၣ်ခဲလၢၥ်(၉၀)ဂၤဒီး တၢ်မၤလိဘျီဝဲအံၤတၢ်ဆၢကတီၢ်တံၥ်တၥ်ဝဲလၢ(၃)နွံဝံၤဖဲတနံၤအံၤ တၢ်ပျၢ်က့ၤတၢ်မၤလိမူး တၢ်ရဲၣ် တၢ်ကျဲၤဒ်အံၤန့ၣ်လီၤ.
တၢ်မၤဂ့ၤထီၣ်ခိၣ်နၢ်ကံၢ်စီတၢ်မၤလိအံၤ စးထီၣ်လၢ(DKBA)ကရူၢ်အိၣ်ထီၣ်ဒီတကတီၢ်အပူၤန့ၣ် တၢ်ဟ့ၣ်ဝဲတအိၣ်နီတဘျီဒံး ဘၣ်အဃိ လၢတၢ်ကရၢကရိပူၤအလီၢ်အိၣ်လၢကြၢးမၤဂ့ၤထီၣ်ခိၣ်နၢ်ကံၢ်စီအဖီခိၣ် အဆိကတၢၢ်တဘျီဘၣ်တၢ်ဟ့ၣ်ဝဲ တၢ်မၤလိအံၤ လီၤအဂ့ၢ်န့ၣ် သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ် စံးဝဲန့ၣ်လီၤ.
“စးထီၣ်လၢ(DKBA)အိၣ်ထီၣ်န့ၣ်တၢ်မၤလိအံၤတုၤလၢခဲအံၤတအိၣ်ဘၣ်လၢညါစ့ၢ်ကီးတအိၣ်နီတဘျီဘၣ်.စးထီၣ်ဖဲယဟံထီၣ်ဖီၣ်ထီၣ် မူဒါလၢသုးရိၣ်မဲခိၣ်ကျၢၢ်န့ၣ်ယကွၢ်တၢ်လီၤတူၥ်လီၤကၥ်အိၣ်,ခိၣ်နၢ်တဖၣ်အကံၢ်အစီတအိၣ်ဘၣ်,ဒ်သိးကအိၣ်ထီၣ်အဂီၢ် ပဟ့ၣ်လီၤဝဲခိၣ်နၢ်ကံၢ်စီတၢ်မၤလိလၢနံၤဖုၣ်မီၤနီၤ.အဝဲအံၤမ့ၢ်ဝဲအဆိကတၢၢ်တဘျီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်က စီၣ် န့ၣ်လီၤ.
တကးဒံးဘၣ်လၢတၢ်မၤဘျီဝဲအံၤ သုးခိၣ်ဒိၣ်ဖိဒီးသုးခိၣ်စိလၢအဖျိထီၣ်တဖၣ်တၢ်ဃုထၢဟ့ၣ်လီၤဃုၥ်စ့ၢ်ကီးဝဲခိၣ်ဖးတၢ,ခံ,သၢအဃိ တၢ်မၤလိဘျီဝဲအံၤ ပှၤဒိးန့ၢ်ဘၣ်ခိၣ်ဖးတၢန့ၣ်မ့ၢ်ဝဲ လီၢ်ခၢၣ်သးသုးရ့ၣ် သုးရ့ၣ်-၂ သုးရ့ၣ်ခိၣ်-၂ သုးခိၣ်ဒိၣ်ဖိ စီၤအဲၣ်စ့, ခိၣ်ဖးခံ လီၢ်ခၢၣ်သးသုးရ့ၣ်-၃ သုးရ့ၣ်ခိၣ်-၂ သုးခိၣ်ဒိၣ်ဖိ စီၤကါမရဲး, ဒီး ခိၣ်ဖးသၢန့ၣ်မ့ၢ်ဝဲ လီၢ်ခၢၣ်သး G-3 သုးခိၣ်ဒိၣ်စိ စီၤပိၤဘံၣ် သ့ၣ်တဖၣ်အံၤဒိးန့ၢ်ဘၣ်ဝဲန့ၣ်လီၤ.
ဒ်န့ၣ်အသိးလၢတၢ်မၤလိသၢနွံအတီၢ်ပူၤအံၤန့ၣ် တၢ်မၤလိန့ၢ်ဝဲဘၣ်ဃးထံရူၢ်ကီၢ်သဲးအဂ့ၢ်အကျိၤ, ဒုးယၤအဂ့ၢ် အကျိၤ,တၢ်တီ ခိၣ်ရိၣ်မဲအဂ့ၢ်အကျိၤ,တၢ်ရ့လိၥ်ဒီးကမျၢၢ်ထံဖိကီၢ်ဖိဃုၥ်တၢ်ဂ့ၢ်လၢအဂၤတဖၣ်တၢ်မၤလိန့ၢ်ဝဲ အဂ့ၢ်န့ၣ် (DKBA)ပှၤဘၣ်မူဘၣ်ဒါစံးဝဲ အသိး သ့ၣ်ညါဘၣ်န့ၣ်လီၤ.
တကးဒံးဘၣ် လၢကဟဲခါဆူညါအံၤစ့ၢ်ကီး လၢဟီၣ်ကဝီၤကမျၢၢ်ထံဖိကီၢ်ဖိအဂီၢ် လၢတၢ်ကရၢကရိအပူၤဒ်သိးသုးဖိသံၣ်ဖိ ခိၣ်နၢ်သ့ၣ်တဖၣ်အကံၢ်အစီကအိၣ် လၢပှဲၤအဂီၢ်တၢ်မၤလိလၢတၢ်ဟ့ၣ်ဝဲခဲအံၤန့ၣ်တၢ်ရဲၣ်တၢ်ကျဲၤအိၣ်လၢ ကဆဲးအိးထီၣ်ကဒီး ဝဲအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤစွ့ၤဝၣ် စံးစ့ၢ်ကီးဝဲ န့ၣ်လီၤ.
တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အံၤ ထုးဖးသးဒီးကရၢမိၢ်ပှၢ်ခ့ၣ်အဲၣ်ယူၣ်ဝံၤ(၁၉၉၄)နံၣ်အခါန့ၣ် ပျိၥ်လဲသးအိၣ် ဆၢထၢၣ်က့ၤဝဲဒ်ဘူးဒးကညီသုးမုၢ်ဒိၣ်(DKBA)န့ၣ်လီၤ.တကတီၢ်ဃီဖဲန့ၣ်ဝံၤလီၢ်ခံဖဲ(၂၀၁၀)အခါန့ၣ်ကရူၢ်အံၤအါဒၣ်တက့ၢ်န့ၣ် ပျိၥ်လဲသးဆူ(BGF)ဘၣ်ဆၣ် မ့မ့ၢ်လၢသုးခိၣ်စီၤလၢပှဲၤတီခိၣ်ရိၣ်မဲကရူၢ်အံၤတပျိၥ်လဲအသးဆဲးအိၣ်ဆၢထၢၣ်ဝဲဒ်အအိၣ်ပၥ်ဝဲ အသိးန့ၣ်လီၤ.
ဘၣ်ဆၣ်ဖဲန့ၣ်ဝံၤလီၢ်ခံဖဲ(၂၀၁၁)အခါ ဘူးဒးကညီသုးမုၢ်ဒိၣ် DKBA ကရူၢ်အံၤဆီတလဲက့ၤအမံၤဆူတၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)အိၣ်ဆၢထၢၣ်တုၤလၢခဲအံၤအသိး ဒ်န့ၣ်အသိးကရူၢ်အံၤဖဲ(၂၀၁၅)ပဒိၣ်အူသ့စ့ၣ်ပၢတၢ်စိၤအခါ ကလုၥ်ဒူၣ် ဖီၣ်စုကဝဲၤကရူၢ် ဆဲးလီၤထံကီၢ်ဒီတဘ့ၣ်တၢ်ပတုၥ်တၢ်ခးအကျါ ကရူၢ်အံၤပၣ်ဃုၥ်ဝဲန့ၣ်လီၤ.
