ကျိဖးဒိၣ်လီၤတဲၥ်လၢမၠဲၣ်ကၠံငူၣ်အံၤတဘၣ်ဃးဒီး(သုးက့ ၅)ဘၣ်အဂ့ၢ် ပှၤဘၣ်မူဘၣ်ဒါစံးဝဲ

လါဖ့ၤဘြူၤအါရံၤ ၁၀ သီ, ၂၀၂၆ နံၣ်, ခ့ၣ်အဲးစံၣ်

ဖဲမဟါလါဖ့ၤဘြူၤအါရံၤ ၉ သီ ဂီၤခီ ၇ နၣ်ရံၣ်ဃၣ်ဃၣ်အဆၢကတီၢ် လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်(သုးက့ ၇) မၠဲၣ်ကၠံငူၣ်ဝ့ၢ်(ခီတီၢ်)ဝ့ၢ်ပူၤ တၢ်ခးလီၤဝဲကျိဖးဒိၣ်လီၤတဲၥ်ပိၢ်ဖးထီၣ်ဝဲလၢတၢ်ဆါဟံၣ်ကရၢၢ်ပူၤအဃိ ဖိသၣ်ဘၣ်ဒိတဂၤဒီး တၢ်ဆါဟံၣ်တၢ်သူၣ်ထီၣ်ဟးဂီၤဘၣ်ဒိဘၣ်ထံးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဃးတၢ်ဂ့ၢ်ကဲထီၣ်သးအံၤ ဘူးဒးကညီသုးမုၢ်ဒိၣ်(DKBA)အပှၤ ကညီပိၥ်မုၣ်လၢအ(facebook)မံၤလၢပှိၢ် လၢအမ့ၢ် (ဏ်ုက်ုတဝ် ယ်ုလဝ်ဏ်ု)အံၤ တဲလီၤဝဲလၢ social media ပူၤလၢ ကျိဖးဒိၣ်လၢအလီၤတဲၥ်အံၤ မ့ၢ်ဝဲ(သုးက့ ၅) ကညီဒီကလုၥ် တၢ်ထူၣ်ဖျဲး သုးမုၢ်ဒိၣ်(KNLA) အပှၤခးလီၤဝဲအဂ့ၢ်န့ၣ် စံးဝဲန့ၣ်လီၤ.

ဘၣ်ဆၣ်တၢ်ဂ့ၢ်လၢအကဲထီၣ်အံၤလ့ၤတက့ၤတဘၣ်ဃးဒီး(သုးက့ ၅)အပှၤဘၣ်အသိး ဒ်သိးတဒူၣ်ဒီးတဒူၣ်အဘၢၣ်စၢၤ တၢ်ထံၣ်ကမၣ် လိၥ်သးကအိၣ်ထီၣ်အဂီၢ် မ့ၢ်တၢ်မၤဘှံးဘှးတၢ်လီၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.

“တမ့ၢ်နီတစဲးဘၣ်ပှၤ(သုးက့ ၅)ကလဲၤတ့ၢ်လီၤတၢ်လၢမၠဲၣ်ကၠံငူၣ်န့ၣ်တမ့ၢ်ဘၣ်.တၢ်မၤသးခဲအံၤန့ၣ် ကဘၣ်မ့ၢ်ပှၤလၢ န့ၣ် တကပၤလီၤ. အဝဲအံၤအဝဲသ့ၣ်အဲၣ်ဒိးမၤဘှံးဘှးတၢ်,ဒ်သိးပှၤကထံၣ်ကမၣ်လိၥ်သးကဒဲကဒဲန့ၣ်မၤဝဲလီၤ.တမ့ၢ်(သုးက့ ၅)ဘၣ်. (သုးက့ ၅)တအီၣ်ဖ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်အီၣ်တၢ်ကစီၣ်န့ၣ်လီၤ.

ဒ်န့ၣ်အသိးဘၣ်ဃးပှၤခးလီၤကျိဖးဒိၣ်လၢမၠဲၣ်ကၠံငူၣ်(ခီတီၢ်)ဘျီဝဲအံၤန့ၣ် မ့ၢ်ဝဲ(သုးက့ ၅) ကမၤမိၢ် ပယီၤသုးလၢအအိၣ်ဆီလီၤသးဖဲ ဃိၣ်လိၥ်ကျိကၢၢ်နံၤ ထံသဒီၣ်ထၣ်ကရူၢ်အံၤတဖၣ်ခးလီၤဝဲလီၤအဂ့ၢ်န့ၣ် (သုးက့ ၇) ပှၤဘၣ်မူဘၣ်ဒါတဂၤ စံးဘၣ်စ့ၢ်ကီး ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.

အဝဲစံးဝဲလၢ“ပှၤတနီၤလၢအိၣ်လၢပယီၤအိၣ်တကပၤခီတဲဝဲလၢကီၢ်သူလ့ၤခးစိဃီၤဝဲ.အနီၢ်ကီန့ၣ်ကဲဝဲလၢ(သုးက့ ၅)တကပၤ ပယီၤ လဲၤဆီလီၤအပှၤလၢတဃ့ၣ်ခိၣ်,တလးအီခိၣ်တကပၤန့ၣ်ခးစိဃီၤဝဲလီၤ.ကျိဖးဒိၣ်ဟးထီၣ်န့ၣ်ပှၤအိၣ်ဘူးဖဲန့ၣ်တဖၣ်နၢ်ဟူဝဲလီၤ.ဘၣ်မနုၤလဲၣ်ယအိၣ်သဝီဘူးဖဲန့ၣ်လီၤ.ပယီၤသုးခးလီၤဝဲလီၤတၢ်န့ၣ်အတၢ်ပညိၣ်မနုၤလဲၣ်န့ၣ်တသ့ၣ်ညါဘၣ်” အ ဂ့ၢ် န့ၣ် စံးဝဲန့ၣ်လီၤ.

ဒ်န့ၣ်အသိးလၢမၠဲၣ်ကၠံငူၣ်ဝ့ၢ်အံၤ ဖဲအပူၤကွံၥ်တလါအံၤလါဖ့ၤဘြူၤအါရံၤ ၂ သီအနံၤစ့ၢ်ကီး ကျိဖးဒိၣ်လီၤတဲၥ်ပိၢ်ဖး ကဲထီၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.

မၠဲၣ်ကၠံငူၣ်ဝ့ၢ်ဃိၣ်လိၥ်ကျိဝၢ်ခီကမၤမိၢ်ဝ့ၢ်ပူၤဃုၥ်ဒီးဝ့ၢ်ခိၣ်ဝ့ၢ်ဃၢၤန့ၣ် ပယီၤသုးအိၣ်ဆီလီၤသးအမဲၥ်ညါသုးခိးကီၢ်ဆၢ(BGF) ဒီး ဘူးဒးကညီသုးမုၢ်ဒိၣ်(DKBA)ကရူၢ်စ့ၢ်ကီးဟူးဂဲၤဝဲအိၣ်အသိး လၢမၠဲၣ်ကၠံငူၣ်(ခီၣ်တီၣ်)တကပၤစ့ၢ်ကီး ပယီၤသုး, ကညီဒီကလုၥ်သုးမုၢ်ဒိၣ်-KNA ကရူၢ်,( DKBA)သုးခိၣ်ဘိၤဘံၣ်အကရူၢ်သ့ၣ်တဖၣ်အံၤ အိၣ်ဆီလီၤသး ဟူးဂဲၤဝဲအိၣ်န့ၣ်လီၤ.