လါမးရှး ၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ြကဲၢ်ကီၢ်ဆၣ် ထံဆၢကီၢ်ဆၢသုးကလၢၤလၢအဘၣ်ဟ့ၣ်ဆှူဝဲတဖၣ် လၢကထီၣ်ဟံ န့ၢ်က့ၤဝဲအဂီၢ် ပယီၤသုးလၢအဟဲထီၣ်တုၤဖဲတၢ်ကြဲၢ်ဝ့ၢ်ဆၢခိၣ် တီၤလိကၠီၤကစၢၢ်ခီၣ်ထံးအံၤတဖၣ် ဂုၤကဒါလီၢ်ခံအဂ့ၢ်န့ၣ် သ့ၣ်ညါ ဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးအံၤလၢကထီၣ်ဟံန့ၢ်က့ၤနီၣ်တယၢ်လူၢ်,တၤလဲၤ,မီၤဖိက့ၣ်သုးကလၢၤသ့ၣ်တဖၣ်အံၤအဂီၢ် တချုးအဝဲသ့ၣ်တုၤ တီၤလိကၠီၤ ဒံးဘၣ်ဖဲအပူၤကွံၥ်လါဖ့ၤဘြူၤအါရံၤ ၂၃ သီအနံၤန့ၣ် လၢတၢ်ြကဲၢ်ဝ့ၢ်အံၤတဆီပယီၤသုးနီၣ်ဂံၢ်(၂၀၀)ဃၣ်ဃၣ်လၢအ ဟဲထီၣ်တဖၣ်အံၤဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်ဝဲန့ၣ်လီၤ.
တကးဒံးဘၣ်ပယီၤသုးတဖၣ်အံၤဖဲအတုၤလၢတီၤလိကၠီၤကစၢၢ်ခီၣ်ထံးအခါန့ၣ်စ့ၢ်ကီး တၢ်ဒုးဆဲးကဲထီၣ်ဒံးဝဲဒီး(KNLA)သုးပၥ်ဖှိၣ် အဘၢၣ်စၢၤဘၣ်ဆၣ်ဖဲအပူၤကွံၥ်ခံသီသၢသီအခါန့ၣ်ပယီၤသုးတဖၣ်အံၤတဆဲးထီၣ်ဆူညါဂုၤကဒါလီၢ်ခံဆူ တၢ်ြကဲၢ်ကရူၢ် နိၣ်ချၢၣ် သဝီဒီး ကမါခိၣ်သဝီတကပၤ အဂ့ၢ်န့ၣ် ကီၢ်ဆၣ်နဲၣ်ရွဲၣ်သဃဲၤ ပဒိၣ်စီၤပူလူး စံးဝဲန့ၣ်လီၤ.
အဝဲစံးဝဲလၢ“ပယီၤသုးလၢအိၣ်တီၤလိကၠီၤကစၢၢ်ခီၣ်ထံးတဖၣ်န့ၣ်ခဲအံၤတအိၣ်ဖဲန့ၣ်လၢၤဘၣ်က့ၤသုးခံက့ၤအိၣ်ကဒက့ၤလၢနိၣ်ချၢၣ်သဝီဒီး ကမါခိၣ်သဝီန့ၣ်လံ.အဂုၤလီၢ်ခံကအိၣ်လၢ(၃)သၢလံ.လၢတၢ်ြကဲၢ်ဝ့ၢ်ပူၤနါက့ပယီၤသုးအိၣ်လီၤလီၤဆီဆီမီၤနီၤ. အဝဲသ့ၣ်ဂုၤကဒါလီၢ်ခံန့ၣ်လၢတၢ်ဂ့ၢ်မနုၤလဲၣ်တၢ်တသ့ၣ်ညါဝဲဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ် လီၤ.
စးထီၣ်ဖဲလါဖ့ၤဘြူၤအါရံၤ ၂၃ သီ ပယီၤသုးလဲၤထီၣ်ဒီတကတီၢ်အပူၤန့ၣ် ပယီၤသုးတကပၤသံဘၣ်ဒိဘၣ်ထံးဝဲ အဂ့ၢ်န့ၣ် ဟီၣ်ကဝီၤတၢ်ကစီၣ်ပၥ်ဖျါဝဲအိၣ်ဘၣ်ဆၣ် ဒ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိးန့ၣ် ထဲဒၣ်ဖဲတၢ် ၂၃ သီတနံၤန့ၣ် ခီဖျိလၢတၢ်ဒုးကဲထီၣ်အံၤအဃိ ပယီၤသုးတကပၤသံ(၂)ဂၤ,ဘၣ်ဒိ(၈)ဂၤအဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤပယီၤသုးဂုၤကဒါလီၢ်ခံလံဘၣ်ဆၣ်အိၣ်ဒံးဝဲလၢနိၣ်ချၢၣ်,ကမါခိၣ်သဝီပူၤဒီးအဝဲသ့ၣ်အံၤ တၢ်ရဲၣ်တၢ်ကျဲၤကဆဲး အိၣ် ဒ်လဲၣ်တၢ်တသ့ၣ်ညါဝဲဒံးဘၣ်အဃိကရူၢ်(၂)ဘ့ၣ်ပူၤကမျၢၢ်လၢအဃ့ၢ်ထီၣ်တဖၣ်တုၤလၢခဲအံၤက့ၤဟံၣ်က့ၤဃီတဘူၣ်ဒံးဘၣ် အဂ့ၢ် န့ၣ် ကီၢ်ဆၣ်နဲၣ်ရွဲၣ်သဃဲၤ စံးအါထီၣ်ဝဲန့ၣ်လီၤ.
“ကမျၢၢ်လၢအဃ့ၢ်ထီၣ်တဖၣ်န့ၣ်က့ၤတဘူၣ်ဒံးဘၣ်.အိၣ်ဒၣ်အဝဲသ့ၣ်န့ၣ်က့ၤကွၢ်ဆူၣ်ဟံၣ်.ပှၤလၢအဘုၣ်ဃၥ်တၢ်ဖိတၢ်လံၤထိး,ကျီၢ်,ပနၢ်တဖၣ်န့ၣ် က့ၤဘုၣ်လီၤအဆၣ်ဝံၤဟဲက့ၤကဒါဒ်န့ၣ်လီၤ. က့ၤမံတ့ၢ်ဒုတဘူၣ်ဒံးဘၣ်”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးလၢဒုးယၤတၢ်သဘံၣ်သဘုၣ်အံၤအဃိ တၢ်ကြဲၢ်ကရူၢ်ဒီးဖါကၣ်ကရူၢ်ပူၤ ဒူသဝီကမျၢၢ်လၢအဃ့ၢ်ထီၣ်တဖၣ် ဒ်သိးကဒိး န့ၢ်ဘၣ်တၢ်အီၣ်တၢ်အီတၢ်ဆီၣ်ထွဲမၤစၢၤအဂီၢ်တၢ်ပၥ်ဖျါထီၣ်ဆူတၢ်ဖီခိၣ်လံဘၣ်ဆၣ် တုၤလၢခဲအံၤတၢ်မၤစၢၤတတုၤဒံးဝဲဘၣ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တၢ်ကြဲၢ်ဝ့ၢ်ခိၣ်ဃၢၤစးထီၣ်ဖဲတၢ်ဒုးက့ၤကဲထီၣ်ကဒါဒီတကတီၢ်အပူၤန့ၣ် ခီဖျိလၢဒြိဒီးကျိဖးဒိၣ်အံၤအဃိ မိနဲ(မိုးနိုင်း)သဝီဖိ ဘၣ်ဒိဘၣ် ထံးဝဲ(၆)ဂၤဒီး ပှၤသ့ၣ်တဖၣ်အံၤခီဖျိကျိအက့အခီအိၣ်တ့ၢ်လၢအမိၢ်ပှၢ်ပူၤအဃိ ဘၣ်လဲၤထုးထီၣ်ဝဲကျိအက့အခီ လၢဝ့ၢ်ပူၤအိၣ်ဝဲ အဂ့ၢ်န့ၣ် သ့ၣ်ညါဘၣ်လၢသဝီပှၤဘၣ်မူဘၣ်ဒါအအိၣ်န့ၣ်လီၤ.
နီၢ်တယၢ်လူၢ်,တၤလဲၤ,မီၤဖိက့ၣ်သုးကလၢၤလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤပူၤလၢ ပယီၤသုးဂုၤကျဲးစၢးလဲၤထီၣ်ဝဲအံၤန့ၣ် ဖဲအပူၤကွံၥ်(၂၀၂၄)ဒီး(၂၀၂၅)နံၣ်ထီၣ်အခါန့ၣ် ဘၣ်တၢ်ထီၣ်ဒုးန့ၢ်ဝဲလၢ ဟီၣ်ကဝီၤကညီ ဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ်သ့ၣ်တဖၣ်အံၤန့ၣ်လီၤ.
