လါမးရှး ၁၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိကီၢ်ဆၣ်ဟီၣ်ကဝီၤအပူၤ ပယီၤသုးနုၥ်လီၤဟူးဂဲၤရၤလီၤသးဟဲအါထီၣ်ဒီး ကမျၢၢ်တၢ်သံတၢ်ဘၣ်ဒိဘၣ်ထံးစ့ၢ်ကီးအိၣ်ထီၣ်တပယူၥ်ဃီအသိးဒူသဝီအဖျၢၣ်(၁၀)ဘၣ်ဃ့ၢ်ထီၣ်ကဒီးဝဲအဂ့ၢ်န့ၣ် သ့ၣ်ညါ ဘၣ်လၢ ကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
လၢၢ်ဒိၣ်ကီၢ်ဆၣ်ပူၤစးထီၣ်ဖဲတလါအံၤလါမးရှး ၅ သီအနံၤ ပယီၤသုးကျိၤနုၥ်လီၤဟူးဂဲၤဝဲဒၣ်အါအါဂီၢ်ဂီၢ်လၢ (ရေတွင်းကုန်း) ကရူၢ်အပူၤဝံၤ တၢ်ဒုးကဲထီၣ်အကတီၢ်ပယီၤသုးအံၤသူဝဲဘၣ်ဒြိ,ကျိဖးဒိၣ်,ကဘီယူၤ တကးဒံးဘၣ်အမဲၥ်ညါခးသံဃုၥ်ဝဲ ကမျၢၢ် အဃိ ကမျၢၢ်သံတစှၤန့ၢ်အဂၤ(၃၀),ဘၣ်ဒိဘၣ်ထံးဝဲအါမးဒီး ဖီၣ်ဃၥ်စ့ၢ်ကီးဝဲကမျၢၢ်အိၣ်လၢအကယၤညါအသိး ဒူသဝီ(၅)ဖျၢၣ် ကမျၢၢ်(၄၀၀၀)ဘျဲၣ်ဘၣ်ဃ့ၢ်ထီၣ်ဒံးဝဲန့ၣ်လီၤ.
ဒ်ကီၢ်ရ့ၣ်ပှၤဘၣ်မူဘၣ်ဒါစံးဝဲအသိးန့ၣ် တကီၢ်ခါခဲအံၤပယီၤသုးလၢအနုၥ်လီၤဟူးဖဲ(ရေတွင်ကုန်း)ကရူၢ် ဒူသဝီပူၤအံၤတဖၣ် တုၤလၢခဲအံၤတဟးထီၣ်ဝဲဒံးဘၣ်အိၣ်ဆီလီၤသးဟူးဂဲၤဝဲဖဲန့ၣ်အဖၢမုၢ်အဃိ ကမျၢၢ်လၢဃ့ၢ်ထီၣ်တဖၣ်က့ၤဟံၣ်တဘူၣ်ဘၣ်ဟး အိၣ်ကဒုသးလၢတၢ်ဘံၣ်တၢ်ဘၢအဖၢမုၢ် န့ၣ်လီၤ.
ပယီၤသုးသ့ၣ်တဖၣ်အံၤအမဲၥ်ညါဖဲမဟါလါမးရှး ၁၇ သီ ဂီၤခီ ၅း၄၀ အဆၢကတီၢ်စ့ၢ်ကီး ပယီၤသုးနုၥ်လီၤဝဲဒၣ်လၢ (ဇရပ်ခင်) သဝီ,နၣ်စးလ့သဝီဒီးသဲဖၠူၤသဝီတဖၣ်အံၤပူၤဒီးဖဲအဝဲသ့ၣ်နုၥ်လီၤအခါစ့ၢ်ကီးခးသံကွံၥ်ဝဲ(ဇရပ်ခင်)သဝီဖိ ဖိသၣ်ပိၥ်ခွါ(၂)နံၣ်တဂၤ တကးဒံးဘၣ်ပယီၤသုးအံၤခးလီၤဝဲကျိဖးဒိၣ်,ဒြိဒီးကဘီယူၤအဃိသဝီတဖျၢၣ်ဃီဝဲ အံၤကမျၢၢ်ပိၥ်မုၣ်ဒီးပိၥ်ခွါလၢအသးနံၣ်ကအိၣ်ဝဲ (၃၄)ခိၣ်ဃၢၤအံၤဘၣ်ဒိဘၣ်ထံးဝဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဘၣ်ခ့ၣ် အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
တချုးပယီၤသုးကျိၤနုၥ်လီၤလၢသဝီ(၃)ဖျၢၣ်အံၤအပူၤဒံးဘၣ်ဖဲအပူၤကွံၥ်လါမးရှး ၁၃ သီအနံၤစ့ၢ်ကီး ပယီၤသုး ခီၣ်ချ့သုးရ့ၣ် (ခမရ-၃၀၇)ခးလီၤဝဲ(၁၂၀ မမ)ကျိဖးဒိၣ်(၃)ဖျၢၣ်လီၤတဲၥ်ပိၢ်ဖးထီၣ်ဝဲလၢသဲဖၠူၤသဝီသီအဃိ ဘၣ်သံဝဲကမျၢၢ် (၄)ဂၤဒီးဘၣ်ဒိ ဘၣ်ထံးဝဲဖိသၣ်ပိၥ်ခွါလၢအိၣ်ဒံးဝဲ(၃)လါတဂၤကဲထီၣ်ဒံးဝဲန့ၣ်လီၤ.
ခီဖျိလၢကျိဖးဒိၣ်အံၤအဃိ သဲဖၠူၤသဝီသီကမျၢၢ်လၢအသံ(၄)ဂၤအံၤအကျါပၣ်ဃုၥ်ဝဲဖိသၣ်ပိၥ်မုၣ်အနံၣ် (၁၀)တဂၤ ဒီး (၁၂)နံၣ်တဂၤ အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲမဟါအနံၤခီဖျိလၢပယီၤသုးကျိၤနုၥ်လီၤဟူးဂဲၤအံၤအဃိကမျၢၢ်သံဘၣ်ဒိဘၣ်ထံးအိၣ်ထီၣ်အဖီခိၣ် သဲဖၠူၣ်သဝီ လီၢ်လံၤ,စွ့ၤတဲဆူၣ်,ပီးကိ,သဲဖၠူၤသဝီသီ,စယးခ့ၣ်,နၣ်စးလ့,ယွၤသၤယၤ,သ့းတဲသဝီ, အနါဘီဒီးကၠီဆိသဝီ သဝီပၥ်ဖှိၣ် (၁၀)ဖျၢၣ် ကမျၢၢ်(၂၀၀၀)ဃၣ်ဃၣ်ဘၣ်ဃ့ၢ်ထီၣ်ကဒီးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်,မူဒီးဆီထံးကီၢ်ဆၣ်ဟီၣ်ကဝီၤပူၤ တကီၢ်ခါခဲအံၤပယီၤသုးအံၤတၢ်ဒုးကဲထီၣ်တအိၣ် ဘၣ် ဘၣ်ဆၣ်ဒူသဝီလၢအိၣ်ဘူးခူဝ့ၢ်ကျဲမုၢ်ဖးဒိၣ်အခိၣ်အဃၢၤတဖၣ်အံၤအသုးကျိၤနုၥ်လီၤဟူးဂဲၤတလီၢ်လီၢ် ဒီး ခီဖျိလၢအဝဲသ့ၣ်သူဝဲဒြိ, ကျိဖးဒိၣ်ဒီးကဘီယူၤအံၤအဃိ ကမျၢၢ်သံဘၣ်ဒိဘၣ်ထံးဟဲအိၣ်အါထီၣ်ဝဲဒၣ်ကွ့ၢ်ကွ့ၢ်အသိးကမျၢၢ်ပှၤဃ့ၢ်မှံဟးဖျိးစ့ၢ်ကီး အနီၣ်ဂံၢ်ကဟဲအါထီၣ်ဝဲ သ့အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
စးထီၣ်ဖဲလါမးရှးထီၣ်အံၤလၢ(သုးက့ ၃),(သုးက့ ၄),(သုးက့ ၅)ဟီၣ်ကဝီၤတဖၣ်အပူၤ သုးမီၤစိရိၤအံၤသူဝဲကဘီယူၤ ခးပညိၣ် ဝဲလီၢ်ကဝီၤကမျၢၢ်ထံဖိကီၢ်ဖိဟဲအိၣ်အါထီၣ်ဝဲကိးမုၢ်နံၤဒဲးန့ၣ်လီၤ.လၢတၢ်န့ၣ်အဃိသုးဂ့ၢ်ဝီကွီၢ်မ့ၣ်လၢသုးမီၤစိရိၤလုၢ်သ့ၣ်ခါပတၥ်မၤကမၣ်ဝဲအံၤကပတုၥ်ကွံၥ်အဂီၢ် ထံဂုၤကီၢ်ဂၤကဟ့ၣ်သုးမီၤစိရိၤတၢ်ဆီၣ်သနံးဆူၣ်ဆူၣ်ကိၤကိၤအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်လံၥ်ဃ့ထီၣ်ဝဲဖဲလါမးရှး ၁၂ သီအနံၤဒံးန့ၣ်လီၤ.
