လါမးရှး ၈ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်အပူၤ ဖဲမဟါအနံၤန့ၣ် ကီၢ်သူလ့ၤသုးမုၢ်ဒိၣ်(KTLA)အပှၤ ဖီၣ်မၤသံဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်-၁၂ အပှၤတဂၤဒီးကီၢ်ဆၣ်ပှၤမၤတၢ်ဖိတဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ဖဲမဟါလါမးရှး ၇ သီ ဂီၤခီ ၂း၀၀ နၣ်ရံၣ်အဆၢကတီၢ် လၢပီချိဟီၣ်ကဝီၤအပူၤ ဖဲ(KNLA)သုးရ့ၣ်-၁၂ အပှၤဒီး ကီၢ်ဆၣ် ပှၤမၤ တၢ်ဖိ(၂)ဂၤအံၤ အဝဲသ့ၣ်ဟံမူဒါလၢသုးဂ့ၢ်ဝီ,လီၢ်ကဝီၤတၢ်ဘံၣ်တၢ်ဘၢအဆၢကတီၢ် (KTLA)ကရူၢ်လၢအဘၣ်တၢ် တီခိၣ်ရိၣ် မဲအီၤ လၢ သုးခိၣ်စီၤအဲၣ်ခွံ(ကိး)ကီၤလၤဖိအံၤအပှၤတဖၣ် နုၥ်လီၤကဝီၤဖီၣ်သမူဝဲပှၤခံဂၤအံၤဝံၤမၤသံဝဲဆှူၣ်မဲၥ်ကဲၤမဲၥ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်ခ့ၣ်အဲၣ်ယူၣ်ကီၢ်ရ့ၣ်တၢ်ကစီၣ်တၢ်ဂီၤပူၤပၥ်ဖျါဝဲအသိးန့ၣ် သုးရ့ၣ်-၁၂ အပှၤဒီးကီၢ်ဆၣ်အပှၤခံဂၤအံၤတချုးတၢ်မၤသံဝဲဒံးဘၣ် အခါန့ၣ် ဖျါလီၤဂၥ်လၢတၢ်ကမၤဆါမၤဒၢၣ်မၤလီၤမၤပယွဲအဝဲသ့ၣ်နးနးကျံၤကျံၤဒီး အဖံးအဘ့ၣ်,အနၢ်ကု, အစုအခီၣ်မိၢ်ပှၢ်တနီၤ ဖျါလီၤဂၥ်လၢတၢ်ဒွဲၣ်ဝဲဒီးမ့ၣ်အူ,အဘ့ၣ်အိးလဲးထီၣ်အသးန့ၣ်လီၤ.
တချုးတၢ်ဂ့ၢ်ကဲထီၣ်သးအံၤဒံးဘၣ်ဖဲအပူၤကွံၥ်လါမးရှး ၄ သီ ဟါခီ ၃း၀၀ နၣ်ရံၣ်အဆၢကတီၢ်န့ၣ်စ့ၢ်ကီး ဖဲ(KNLA) သုးရ့ၣ်-၁၂ အပှၤကလဲၤမၤပှဲၤအါထီၣ်အဂံၢ်ဘါလၢတၢ်ထီၣ်ပယီၤသုးကလၢၤပူၤအံၤအဂီၢ်ဖဲလဲၤတုၤဝဲလၢသမံပိၥ်သီသဝီဒီး ကနဲဃီသဝီ ဘၢၣ်စၢၤအခါ ဘၣ်တၢ်ခိးခးဒံးအဝဲသ့ၣ်လၢ(KTLA)သုးခိၣ်အဲၣ်ခွံအပှၤအံၤဒံးန့ၣ်လီၤ.
တကးဒံးဘၣ်လၢသုးခိၣ်အဲၣ်ခွံအပှၤခိးခးဝဲဘျီဝဲန့ၣ်အဃိ (KNLA)သုးရ့ၣ်-၁၂ အပှၤသုးဖိ ဘၣ်ဒိဘၣ်ထံးဒံးဝဲ(၅)ဂၤ န့ၣ်လီၤ.
ဘၣ်ဃးဒီးတၢ်ဂ့ၢ်ကဲထီၣ်သးဘျီဝဲန့ၣ် ထံၣ်ဘၣ်လၢသုးခိၣ်အဲၣ်ခွံတဲလီၤဝဲလၢ(social media)ပူၤလၢ တချုးလၢတၢ်ဟဲကဲ ထီၣ်သးဒံးဘၣ်အခါန့ၣ် ဒဝဲၢ်ဆူမဲၥ်သမံၣ်ခံန့ၣ် စးထီၣ်ဟါခီ ၆း၀၀ တုၤ ဂီၤခီ ၆း၀၀ နၣ်ရံၣ်န့ၣ် လ့ၤတက့ၤ ဖီၣ်စုကဝဲၤကရူၢ်ကရၢ ဃုၥ်ဒီးသိလ့ၣ်,ကမျၢၢ်တဖၣ်တဘၣ်လ့ၢ်ထီၣ်လ့ၢ်လိၤဘၣ် အဂ့ၢ်န့ၣ် စံးလီၤဝဲန့ၣ်လီၤ.
ဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤ (KTLA)သုးခိၣ်အဲၣ်ခွံအပှၤဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) အဘၢၣ်စၢၤ တၢ်ဖ့ၣ်စၢတၢ်သဘံၣ်သဘုၣ်လၢအဟဲကဲထီၣ်လၢခံခီခံကပၤအဘၢၣ်စၢၤအံၤတဖၣ်တမ့ၢ်တၢ်အသီလၢၤဘၣ်ဘၣ်ဒီးမ့မ့ၢ်တခီစးထီၣ်လၢ(၂၀၂၃)အခါလံၤလံၤန့ၣ်ခီဖျိလၢ(KTLA)သုးခိၣ်အဲၣ်ခွံ အပှၤခးဝဲအံၤအဃိ သုးရ့ၣ်-၁၂ အပှၤသံဘၣ်ဒိဘၣ်ထံးကဲထီၣ်အိၣ်တ့ၢ်ဝဲ တလီၢ်လီၢ်န့ၣ် လီၤ.
