လါအ့ဖြ့ၣ် ၁၅ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)လူၤသီကီၢ်ဆၣ်အပူၤ ဖဲမဟါအနံၤခီဖျိသုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်အဃိ ဒ့ၣ်ပူၤနိၣ်ဟီၣ်ကဝီၤ ကညီကူၣ်သ့ဆဲးလၤဝဲၤကျိၤ(KECD)စုတီၤဖီလၥ် MTJC ကၠိဃုၥ်ဒီးတီၤထီကၠိတၢ်သူၣ်ထီၣ်လီၤပှီၢ်ဟးဂီၤဝဲ အါမးအဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
လူၤသီကီၢ်ဆၣ် ပ့က့ကရူၢ် ဒ့ၣ်ပူၤနိၣ်ဟီၣ်ကဝီၤအပူၤ ဖဲမဟါတါလီၤလါအ့ဖြ့ၣ် ၁၄ သီ မုၢ်နၤခီ ၁၀း၀၀ ဃၣ်ဃၣ်အဆၢကတီၢ် တၢ်ဒုးကဲထီၣ်တအိၣ် သုးမီၤစိရိၤကဘီယူၤ လဲၤတ့ၢ်လီၤဝဲမ့ၣ်ပိၢ်တစှၤန့ၢ်(၅)ဘျီဒီး ဖဲန့ၣ် (Mutraw Junior College-MTJC)ကၠိ ဒီး ဒ့ၣ်ပူၤနိၣ်တီၤထီကၠိ(၂)ဖျၢၣ်အံၤလီၤပှီၢ်ဟးဂီၤလီၤကရဲဝဲခဲလၢၥ်ဃၣ်ဃၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ် ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
တချုးကဘီယူၤဟဲခးလီၤတၢ် ကၠိတၢ်သူၣ်ထီၣ်လီၤပှီၢ်ဟးဂီၤကဲထီၣ်ဒံးဘၣ်ဖဲအပူၤကွံၥ်လါအ့ဖြ့ၣ် ၁၃ သီ ဟါခီ ၈း၀၀ နၣ်ရံၣ်ဃၣ် ဃၣ်အဆၢကတီၢ်န့ၣ်စ့ၢ်ကီး လၢဒ့ၣ်ပူၤနိၣ်ဟီၣ်ကဝီၤအပူၤ သုးမီၤစရိၤအကဘီယူၤဟဲတ့ၢ်လီၤမ့ၣ်ပိၢ်ကဲထီၣ်ဒံးဝဲန့ၣ်လီၤ.
လၢကဘီယူၤဟဲတ့ၢ်လီၤ မ့ၣ်ပိၢ်ဘျီဝဲအံၤစ့ၢ်ကီးကမျၢၢ်တၢ်ဘၣ်ဒိဘၣ်ထံးမ့တအိၣ်ဘၣ်ဆၣ်ဟံၣ်တၢ်သူၣ်လီၤပှီၢ် ဟး ဂီၤတစှၤ န့ၢ်ဝဲ(၃)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဘၣ်ဃးကဘီယူၤဟဲခးလီၤတၢ်ခံသီတပယူၥ်ဃီအံၤန့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲလၢ “ဖဲ ၁၃ သီ ဟါခီ ၈း၀၀ နၣ်ရံၣ်န့ၣ်ကဘီယူၤဟဲခးတၢ်ဖဲဒ့ၣ်ပူၤနိၣ်အံၤ.အဃိဘၣ်ဟးဂီၤပှၤဟံၣ်ကအိၣ်လၢသၢဖျၢၣ်လွံၢ်ဖျၢၣ်ညါ.မ့မ့ၢ် ပှၤကညီန့ၣ်တၢ်ဘၣ်ဒိဘၣ်ထံးတအိၣ်ဘၣ်.မ့ဝံၤလၢခံတနံၤ ၁၄ သီ ကဘၣ်ဖဲမုၢ်နၤခီ ၉း၅၅ အခါန့ၣ် ဟဲခးလီၤကဒီးတၢ်တဝီအဃိ မုၢ်တြီၢ်(MTJC)ကၠိဟးဂီၤဝဲဒၣ်ဒီး ဒ့ၣ်ပူၤနိၣ်တီၤထီကၠိစ့ၢ်ကီးဟးဂီၤဝဲလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤ အံၤန့ၣ်လီၤ.
ဒ်လီၢ်ခၢၣ်သး(KECD)ထုးထီၣ်ပၥ်ဖျါဝဲအသိးန့ၣ် မဟါအနံၤခီဖျိလၢသုးမီၤစိရိၤ(jet fighter)အံၤ အဃိ (Mutraw Junior College-MTJC)ကၠိဟးဂီၤအမဲၥ်ညါ ကၠိဖိအိၣ်လီၢ်(ဘီဒၢၣ်)တၢ်သူၣ်ထီၣ်,ကၠိဝဲၤဒၢးတၢ်သူၣ်ထီၣ်,လံၥ်ရိဒၢး,တီၤဒၢးဒီး ကၠိဘျီၣ်ဒိၣ် (ဟီခါ)သ့ၣ်တဖၣ်လီၤပှီၢ်ဟးဂူၥ်ဟးဂီၤဝဲဒိၣ်ဒိၣ်မုၢ်မုၢ်န့ၣ်လီၤ.
ကဘီယူၤဟဲတ့ၢ်လီၤမ့ၣ်ပိၢ်ဘျီဝဲအံၤခီဖျိဘၣ်လၢနံၣ်ကတၢၢ်ကၠိပျၢ်လံအဃိ တၢ်သံဘၣ်ဒိဘၣ်ထံးဘၣ်ထံးကဲထီၣ်တအိၣ်ဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
(သုးက့ ၅)ဟီၣ်ကဝီၤအပူၤ ဖဲအပူၤကွံၥ်လါအ့ဖြ့ၣ် ၁၀ သီဒီး ၁၁ သီအနံၤစ့ၢ်ကီး လၢဘုသိၣ်ကီၢ်ဆၣ် ခီပူးကရူၢ်အပူၤ ခီဖျိသုးမီၤစိရိၤ ကဘီယူၤလဲၤတ့ၢ်လီၤမ့ၣ်ပိၢ်အံၤအဃိ ကမျၢၢ်ဘၣ်ဒိဘၣ်ထံးဝဲ(၂)ဂၤဒီးဟံၣ်(၂)ဖျၢၣ်,တၢ်ဆါဟံၣ်တၢ်သူၣ်ထီၣ်(၂)ဖျၢၣ်ဟးဂီၤဘၣ်ဒိ ဘၣ်ထံးကဲထီၣ်ဒံးဝဲန့ၣ်လီၤ.
သုးမီၤစိရိၤလၢအလုၢ်သ့ၣ်ခါပတၥ်မၤကမၣ်ဝဲပှၤဟီၣ်ခိၣ်ဖိခွဲးယၥ်န့ၢ်လၢ(၅)နံၣ်ဘျဲၣ်အံၤန့ၣ် စးထီၣ်ဖဲအပူၤကွံၥ်တချုးတါလီၤ ဒံးဒီးတုၤလၢတါလီၤအကတီၢ်အံၤ လီၤဆီဒၣ်တၢ်လၢ(သုးက့ ၁),(သုးက့ ၅)ဒီး(သုး ၆),(သုးက့ ၇)ဟီၣ်ကဝီၤအပူၤ တရ့ဝဲမုၢ်နံၤ ဒိၣ်မုၢ်နံၤထီလၢၤဘၣ်ဒီးမ့မ့ၢ်တခီ ဆဲးသူဒံးဝဲဒၣ်ကဘီယူၤဟးခးလီၤတၢ်ကိးမုၢ်နံၤဒဲးဃၣ်ဃၣ်အဃိ တၢ်သံတၢ်ဘၣ်ဒိဘၣ်ထံး,တၢ် ဟးဂူၥ်ဟးဂီၤစ့ၢ်ကီး ကဲထီၣ်ဝဲတပယူၥ်ဃီန့ၣ်လီၤ.
