လါအီကူး ၁၀ သီ, ၂၀၂၆ နံၣ်, ခ့ၣ်အဲးစံၣ်
ကညီသးစၢ် စီၤလ့ လၢအဘၣ်တၢ်သ့ၣ်ညါအီၤအါလၢကညီဖိအကျါဒီး ဆါတၢ်လၢ(online)ပူၤအံၤန့ၣ် ဖဲတနံၤအံၤဂီၤခီအဆၢ ကတီၢ်န့ၣ် တၢ်ထံၣ်န့ၢ်အီၤလၢအစၢၢ်လီၤကိၥ်မၤသံလီၤသးလၢ ကီၢ်ကၠီၣ်တဲၣ် တးကီၢ်ရ့ၣ် ဖိးဖြးကီၢ်ဆၣ် ကၠီးခဲးသဝီအမုဂါဟံၣ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
စီၤလ့လၢအသးနံၣ်အိၣ်ဝဲ(၂၄)နံၣ်မ့ၢ်ဝဲပှၤနီၢ်သဘျ့အံၤ ဖဲတနံၤအံၤလါအီကူးထီၣ် ၁၀ သီအံၤ တၢ်ရဲၣ်တၢ်ကျဲၤအိၣ်လၢကထီၣ်ဝဲနဲၢ် ဘၣ်ဆၣ် ဖဲမဟါ လါအီကူး ၉ သီ မုၢ်နၤခီအခါန့ၣ် လဲၤဟးဝဲလၢအမုဂါ ပှၤဂဲၤဒိဖိ စီၤလီၤအဲၣ်အမိဟံၣ်ဝံၤ မုၢ်ဆ့ၣ်ထီၣ်တနံၤအံၤဂီၤခီ အဆၢကတီၢ်န့ၣ် တၢ်က့ၤထံၣ်အီၤအစၢၢ်လီၤကိၥ်သံလၢတၢ်ဟးလီၢ်ပူၤဒီး တဘျီဃီတၢ်လဲၤဆှၢအီၤဆူဖိးဖြးတၢ်ဆါဟံၣ်န့ၣ်လီၤ.
စီၤလ့အတၢ်မၤသံလီၤသးအံၤ တၢ်မ့က့ၤထံၣ်အစိၣ်ဖဲတဂီၤအံၤဘၣ်ဆၣ် တၢ်တယးကွၢ်ဝဲလၢအစၢၢ်လီၤကိၥ် ကဘၣ်ကဲထီၣ် သးလၢမုၢ်နၤခီလံအဃိ ဒ်သိးကသ့ၣ်ညါဘၣ်အသံအဂ့ၢ်အကျိၤဒီးသံအဆၢကတီၢ်အခါဖဲလဲၣ်အဂီၢ် တုၤလၢမုၢ်ဃ့ၢ်လီၤ ၁ နၣ်ရံၣ်အံၤ တစုအိၣ်ဒံးဝဲလၢတၢ်ဆါဟံၣ်တၢ်ကွဲးကါသမံသမိးလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်စီၤလ့အမိၢ်စံးဝဲအသိးန့ၣ် တချုးတၢ်ကဲထီၣ်သးဒီးစီၤလ့ဒ်အံၤဒံးဘၣ်အခါ အဝဲတူၢ်ဘၣ်ဝဲလၢအသးဖှီၣ်တပယူၥ်ဃီအသိး တနံၤအံၤဘၣ်လၢအက ဘၣ်ထီၣ်ဝဲနဲၢ်စ့ၢ်ကီးအိၣ်ဝဲအဂ့ၢ်န့ၣ် လၢကညီပှၤဂဲၤဒိဖိ နီၢ်လါစ့ဖီ ရၤလီၤဝဲလၢတၢ်ဂီၤမူပူၤအံၤတဆီ အမိစံးဝဲအသိး သ့ၣ်ညါဘၣ်န့ၣ်လီၤ.
တကီၢ်ခါခဲအံၤ စီၤလ့ အံၤမ့ၢ်အစၢၢ်သံလီၤကိၥ်မၤသံလီၤသးလၢတၢ်ဂ့ၢ်မနုၤအဃိလဲၣ်န့ၣ် တၢ်မ့တသ့ၣ်ညါဝဲလီၤတံၢ်လီၤဆဲးဒံးဘၣ် ဘၣ်ဆၣ် တၢ်ကဲထီၣ်သးဒီးအီၤအံၤ ကမ့ၢ်ဝဲဒၣ်လၢအတၢ်တူၢ်ဘၣ်,တၢ်ဆိမိၣ်သးဘၣ်ဖှီၣ်အါလီၢ်ခံကတၢၢ်တူၢ်ဝဲတန့ၢ်လၢၤဘၣ်အဃိ တၢ်ဘၣ်ဟဲကဲထီၣ်သးဒီးအီၤဒ်အံၤလီၤအဂ့ၢ်န့ၣ် အဟံၣ်ဖိဃီဖိဃုၥ်ဒီးပှၤမၤသကိးတၢ်ဒီးအီၤတဖၣ်ပဲၥ်ထံနီၤဖးစံးဝဲန့ၣ်လီၤ.
စီၤလ့ အံၤ မ့ၢ်ဝဲဒၣ်ကညီပှၤဂဲၤဒိဖိတဂၤလၢအဘၣ်တၢ်သ့ၣ်ညါအီၤအါလၢကီၢ်ပူၤကီၢ်ချၢထံဆၢကီၢ်ဆၢ အိၣ်ဒီးတၢ်သူၣ်ဆူၣ်သးဂဲၤ လၢတၢ်ဖံးတၢ်မၤပူၤ, အဲၣ်အဟံၣ်ဖိဃီဖိ ဒီး တကးဒံးဘၣ်လၢအဟံၣ်ဖိဃီဖိအဂီၢ်မ့ၢ်ပှၤတဂၤလၢဃုကျိၣ်ဃုစ့ ထုးထီၣ်ဆါဝဲ အတၢ်ကစၢ်တၢ်တိၢ်သ့ၣ်တဖၣ်န့ၣ်လီၤ.
