လါအ့ဖြ့ၣ် ၁၆ သီ, ၂၀၂၆ နံၣ်, ခ့ၣ်အဲးစံၣ်
စှၤသီအတီၢ်ပူၤ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢသုးမီၤစိရိၤလဲၤတ့ၢ်လီၤမ့ၣ်ပိၢ်တပယူၥ်ဃီအံၤ ခီဖျိလဲၤတ့ၢ်လီၤ ကဒီးဝဲမ့ၣ်ပိၢ်အဃိ ကမျၢၢ်သံ(၄)ဂၤဒီးဘၣ်ဒိဘၣ်ထံးအဂၤ(၁၀)ဘျဲၣ်အဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ် လီၤ.
ဖဲမဟါလါအ့ဖြ့ၣ် ၁၅ သီ တါလီၤခံသီတသီ ကဘၣ်ဖဲဟါခီ ၃း၀၀ နၣ်ရံၣ်ဘျဲၣ်အဆၢကတီၢ်န့ၣ် သုးမီၤစိရိၤ(Jet fighter)ဒီး (Y-12)ကဘီယူၤ လဲၤတ့ၢ်လီၤကဒီးဝဲမ့ၣ်ပိၢ်ဒိၣ်ဒိၣ်မုၢ်မုၢ်လၢလူၤသီကီၢ်ဆၣ် ဘုလိၥ်ကျိဟီၣ်ကဝီၤ ဃဲပၤကရူၢ် ဒူသဝီပူၤအဃိ ဟံၣ်တၢ်သူၣ်ထီၣ်အူအီၣ်လီၤဘျဲးကွံၥ်ဝဲ (၉)ဖျၢၣ် န့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤဟံၣ်အူအီၣ်ဟးဂီၤအမဲၥ်ညါ ဃဲပၤကမျၢၢ်သံဝဲ(၄)ဂၤဒီးဘၣ်ဒိဘၣ်ထံး(၁၃)ဂၤ ဘၣ်ဟဲကဲ ထီၣ်ဝဲဒ်အံၤလီၤ အဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတဂီၤအံၤဒ်အံၤန့ၣ်လီၤ.
“ဖဲမဟါ ၁၅ သီဟါခီမုၢ်ဟါလီၤ ၃ နၣ်ရံၣ်ဘျဲၣ်အခါန့ၣ် ပယီၤသုးကဘီယူၤဒုးသုးဟဲခးတၢ်လၢဘုလိၥ်ကျိတြီၤ ဃဲပၤသဝီ ဒီး တၢ်လီၢ်လၢအဂုၤအဂၤနါက့ခးဝဲတနီၤ. ပဒိးန့ၢ်က့ၤတၢ်ကစီၣ်ဖဲတဂီၤအံၤန့ၣ်ဟံၣ်န့ၣ်အူအီၣ်ဝဲ(၉)ဖျၢၣ်.သဝီဖိန့ၣ်ဘၣ်ဒိဝဲဒၣ်(၁၃)ဂၤ. သံဝဲဒၣ်(၄)ဂၤ.တုၤလၢခဲအံၤန့ၣ်ပှၤဃုလိၥ်သးတဘၣ်လၢၤဒံးဘၣ်အဃိတၢ်ကစီၣ်အလီၤတံၢ်လီၤဆဲးန့ၣ်တန့ၢ်ဒံးဘၣ်”အဂ့ၢ်န့ၣ် စံးဝဲန့ၣ်လီၤ.
ဘၣ်ဃးကဘီယူၤဟဲခးလီၤတၢ်လီဃဲပၤသဝီပူၤဘျီဝဲအံၤဒ်လီၢ်ကဝီၤကမျၢၢ်ပၥ်ထီၣ်ဝဲတၢ်ဂီၤမူအသိးန့ၣ် ဟံၣ်လၢအအူအီၣ်တဖၣ် အိၣ်ဝဲလၢကျဲကပၤခံခီယၢ်ပၤဒီး ဖဲကမျၢၢ်လဲၤကွၢ်ဝဲအခါတၢ်သူၣ်ထီၣ်တဖၣ်မ့ၣ်အူအီၣ်အပလုၢ်ထီၣ်,မ့ၣ်အူလၣ်ကဲၤဒံးဝဲ အိၣ်တနီၤ ဒီးဒ်န့ၣ်အသိးဟံၣ်လၢမ့ၣ်အူအီၣ်ဝဲတဖၣ်အကျါစ့ၢ်ကီးပၣ်ဃုၥ်ဝဲကျးဆါတၢ်,သိလ့ၣ်ဒီးဆဲးကၢးသ့ၣ်တဖၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
လၢကဘီယူၤတ့ၢ်လီၤမ့ၣ်ပိၢ်အံၤအဃိလီၢ်ကဝီၤကမျၢၢ်သံဘၣ်ဒိဘၣ်ထံးတဖၣ်အကျါပိၥ်ခွါအမဲၥ်ညါမ့ၢ်အပၣ်ဃုၥ်ပိၥ်မုၣ်ပိၥ်မၢၤ,ဖိသၣ်အိၣ်/တအိၣ်န့ၣ်ပခ့ၣ်အဲးစံၣ်ဃုသ့ၣ်ညါမၤလီၤတံၢ်အီၤအဖၢမုၢ်န့ၣ်လီၤ.
တကးဒံးဘၣ်ကဘီယူၤဟဲခးလီၤတၢ်ဖဲန့ၣ်ဝံၤတနၤဃီဖဲမုၢ်နၤခီ ၉း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ကဘီယူၤဟဲခးလီၤကဒီး တၢ်လၢဃဲပူၤကရူၢ် မီလ့ၤခိၣ်ဟီၣ်ကဝီၤပူၤဒံးဒီးဘၣ်ဆၣ်တၢ်ဘၣ်ဒိဘၣ်ထံးကဲထီၣ်တအိၣ်နီမံၤဘၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲန့ၣ်လီၤ.
(သုးက့ ၅)ဟီၣ်ကဝီၤအပူၤတချုးတၢ်ကဲထီၣ်သးအံၤဒံးဘၣ်စးထီၣ်ဖဲတချုးတါလီၤလါအ့ဖြ့ၣ် ၁၀ သီ, ၁၁ သီ, ၁၃ သီ ဒီး တါလီၤ ၁၄ သီအနံၤစ့ၢ်ကီး သုးမီၤစိရိၤကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်လၢဘုသိၣ်ကီၢ်ဆၣ်ဒီးလူၤသီကီၢ်ဆၣ်ပူၤ တပယူၥ်ဃီအဃိ ကမျၢၢ်ဘၣ်ဒိဘၣ်ထံးအမဲၥ်ညါ(MTJC)ကၠိ,ဒ့ၣ်ပူၤနိၣ်တီၤထီကၠိဃုၥ်ဒီး ဟံၣ်တၢ်သူၣ်ထီၣ်ဟးဂီၤလီၤပှီၢ်ဝဲအါမးန့ၣ်လီၤ.
