လါမးရှး ၂၃ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ၀့ၢ်မဲၢ်ဆီးအပူၤ ဖဲတနံၤအံၤလါမးရှး ၂၃ သီ ဂီၤခီ ၉း၀၀ နၣ်ရံၣ်အဆၢ ကတီၢ်န့ၣ် ခီကီၢ်ဆၣ်သူလ့ၤတီၤထီကၠိမၤ၀ဲဒၣ်(၂၀၂၃-၂၀၂၄)နံၣ်ကတၢၢ်တၢ်ပျၢ်ကၠိမူးတၢ်ရဲၣ်တၢ်ကျဲၤန့ၣ်လီၤႉ
တၢ်ပျၢ်ကၠိမူးတၢ်ရဲၣ်တၢ်ကျဲၤအပူၤ (BMWEC)ၦၤပၢၤလီၢ်ဆ့ၣ်နီၤ သရၣ်မုၣ် နီၢ်ဆၣ်အဲၣ် ကတိၤအိးထီၣ်၀ဲ တၢ်ရဲၣ်တၢ်ကျဲၤမူးဒီး ဆၣ်သူလ့ၤကၠိ ၦၤနဲၣ်တၢ် သရၣ်မုၣ် နီၢ်ဖီရ့ၣ် ဖးဖျါထီၣ်၀ဲ(၂၀၂၃-၂၀၂၄) နံၣ်ကတၢၢ် တၢ်ပာ်ဖျါဒီးခိၣ်နၢ်ၦၤဘၣ်မူဘၣ်ဒါကတိၤဟ့ၣ်ဂ့ၢ်ဟ့ၣ်ဘါလီၤ၀ဲတၢ်န့ၣ်လီၤႉ
တနံၣ်အံၤ(၂၀၂၃-၂၀၂၄)တၢ်သိၣ်လိနံၣ်အဂီၢ်ခီဖျိကၠိဖိမိၢ်ပၢ်အတၢ်ဆီၣ်ထွဲမၤစၢၤကၠိတၢ်လိၣ်ဘၣ်သ့ၣ်တဖၣ်အဃိ ပမၤဘၣ်၀ဲဒၣ်ကၠိတၢ်ရဲၣ်တၢ်ကျဲၤသ့ၣ်တဖၣ်၀ံၤ၀ဲဂ့ၤဂ့ၤဘၣ်ဘၣ်လီၤအဂ့ၢ်န့ၣ် ဆၣ်သူလ့ၤကၠိ ၦၤနဲၣ်တၢ် သရၣ်မုၣ် နီၢ်ဖီရ့ၣ် စံး၀ဲန့ၣ်လီၤႉ
အ၀ဲစံး၀ဲလၢ“တနံၣ်အံၤ(၂၀၂၃-၂၀၄)တၢ်မၤလိနံၣ် ပဘၣ်လဲၤခီဖျိတၢ်တၤဒီးၦၤအါမးႉ တဘျီတခီၣ်ပသးလီၤဘှံး လီၤတီၤလၢပတၢ်ဖံးတၢ်မၤလၢပကဘၣ်ရဲၣ်ကျဲၤအီၤဒ်သိးကလဲၤသးလၢအဂ့ၢ်အ၀ီႉဘၣ်ဆၣ်ပအိၣ်ဒီးကၠိဖိမိၢ်ပၢ်လၢ အသူၣ်ဆူၣ်သးဂဲၤလၢအဆီၣ်ထွဲမၤစၢၤပကၠိတၢ်လိၣ်ဘၣ်သ့ၣ်တဖၣ်ႉခီဖျိအ၀ဲသ့ၣ်အတၢ်ဆီၣ်ထွဲမၤစၢၤၦၤအဃိ တၢ်ကီတၢ်ခဲပမ့ဘၣ်ကွၢ်ဆၢၣ်မဲာ်သနါက့န့ၣ်ပလဲၤခီဖျိအီၤသ့ဒီးပမၤဘၣ်၀ဲကၠိတၢ်ရဲၣ်တၢ်ကျဲၤတဖၣ်၀ံၤ၀ဲဂ့ၤဂ့ၤဘၣ်ဘၣ်လီၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါနံၣ်လၢကဟဲ(၂၀၂၄-၂၀၂၅)တၢ်သိၣ်လိနံၣ်အဂီၢ်စ့ၢ်ကီးဆၣ်သူလ့ၤကၠိ ကဘၣ်ကွၢ်ဆၢၣ်မဲာ်၀ဲ ကၠိတၢ်မၤလိတီၤဒၢးတကူတလၢဒီးတကးဒံးဘၣ်လၢကၠိတၢ်လဲၤတရံးသးအဂီၢ်စ့ၢ်ကီးတၢ်ဆီၣ်ထွဲမၤစၢၤလီၤစှၤ၀ဲဒၣ်အါန့ၢ် အလီၢ်အဂ့ၢ်န့ၣ် သရၣ်မုၣ် နီၢ်ဖီရ့ၣ် စံးအါထီၣ်၀ဲန့ၣ်လီၤႉ
တၢ်ပျၢ်ကၠိမူးတၢ်ရဲၣ်တၢ်ကျဲၤအပူၤန့ၣ်တၢ်ဟ့ၣ်လီၤက့ၤကတီၤဆိကၠိဖိဒီး(၁၂)တီၤကၠိဖိႇ(GED)ကၠိဖိလၢအဖျိထီၣ် သ့ၣ်တဖၣ်အလံာ်အုၣ်သး(Certificate)ဒီးတကးဒံးဘၣ်တၢ်ဟ့ၣ်လီၤ၀ဲၦၤကၠိဖိလၢအဒိးန့ၢ်ဘၣ်ခိၣ်ဖးနီၣ်ဂံၢ်တၢႇခံႇသၢ သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢတၢ်စံၣ်လီၤကၠိဘျီ၀ဲအံၤသးခုဒိၣ်မးလၢကၤဘၣ်ဆ့ကၤသူတဘ့ၣ်အံၤဒီးခါဆူညါတၢ်ရဲၣ်တၢ်ကျဲၤအိၣ်လၢ ကဆဲးထီၣ်ဖၠၣ်စိမိၤကၠိ(University)လၢအီၤလါပူၤအဂ့ၢ်န့ၣ် နီၢ်ကရ့ၣ်စ်ထူကဲ လၢအဖျိထီၣ်(GED)တနံၣ်ညါအံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
“တနံၤညါအံၤယသးခုဒိၣ်မးဘၣ်မနုၤလဲၣ်န့ၣ်လၢယတၢ်အိၣ်မူပူၤန့ၣ်(graduation)ဒ်အံၤတအိၣ်နီတဘျီဒံးဘၣ်ႉ လၢမဟိတနံၣ်န့ၣ်ယစံၣ်လီၤ၀ဲ(၁၂)တီၤႇမ့မ့ၢ်တနံၣ်ညါအံၤခီန့ၣ်ယစံၣ်လီၤ၀ဲ(GED)ႉယသးခုဒိၣ်မးခီဖျိလၢယကၤဘၣ်၀ဲဆ့ကၤအသူတဘ့ၣ်အံၤလီၤႉခါဆူညါယတၢ်အိၣ်မူတၢ်ရဲၣ်တၢ်ကျဲၤဒုအကီတစဲးႉဘၣ်မနုၤအဃိလဲၣ်န့ၣ်ခဲအံၤပက့ၤလၢကီၢ်ပယီၤတန့ၢ်ဘၣ်ႉယ(ဖးစ်ပိး)တအိၣ်စ့ၢ်ကီးဘၣ်အဃိယကမၤ(volunteer)က့ၤလၢဆၣ်သူလ့ၤကၠိအံၤဒီး ယကထီၣ်ကၠိမၤလိတၢ်လၢ(အီၤလါ) University မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးခါဆူညါဒ်သိးကက့ၤမၤတၢ်လၢၦၤတ၀ၢပူၤကန့ၢ်အဂီၢ်န့ၣ် စီၤအီၤကၠီၤကၠီၤ လၢအဖျိထီၣ်(GED) အံၤစ့ၢ်ကီး တဲဖျါထီၣ်အတၢ်တိာ်ပာ်ဒ်အံၤန့ၣ်လီၤႉ
အ၀ဲစံး၀ဲလၢ“ယပာ်ကဖၢလၢယသးသ့လၢ(ဆၣ်သူလ့ၤကၠိ)အံၤမၤစၢၤယၤလၢလံာ်မ့ၢ်တကပၤမ့ၢ်ဂ့ၤႇတၢ်မၤတကပၤ မ့ၢ်ဂ့ၤမီၤနီၤႉအဃိယဖျိထီၣ်(နွီ)ဂ့ၤဂ့ၤ၀ါ၀ါလီၤႉခဲအံၤဒ်သိးယကထီၣ်ဆဲး(University)အဂီၢ်န့ၣ် ယလဲၤမၤလိတၢ် လၢကညီတၢ်ကရၢကရိတခါလၢဘၣ်ဃးၦၤဂ့ၢ်၀ီခွဲးယာ်ကရူၢ်မီၤနီၤႉခါဆူညါဒ်သိးက့ၤမၤစၢၤကဒါက့ၤၦၤတ၀ၢ (community)ကသ့အဂီၢ်န့ၣ်ယတိာ်ပာ်လၢယကထီၣ်၀ဲဒၣ်(CMU)ကံၣ်မဲယူၣ်နံၣ်၀ၢၣ်စတံၣ် လၢ(social science majors) လၢအသိၣ်လိဘၣ်ဃးၦၤဂ့ၢ်၀ီတကပၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
တနံၣ်အံၤဆၣ်သူလ့ၤတီၤထီကၠိမၤ၀ဲတၢ်ပျၢ်ကၠိမူးအိၣ်လံ၀ဲ(၁၆)၀ီတ၀ီလံဒီးတနံၣ်အံၤ(၂၀၂၃-၂၀၂၄)တၢ်သိၣ်လိနံၣ်အဂီၢ် ၦၤ(၁၂)တီၤကၠိဖိဒီး(GED)ကၠိဖိဖျိထီၣ်၀ဲဒၣ်ခဲလၢာ်(၄၄)ဂၤဒီး ဒ်န့ၣ်အသိးတၢ်ဟ့ၣ်လီၤလံာ်အုၣ်သး ဘျီ၀ဲအံၤ ပၣ်ဃုာ်စ့ၢ်ကီး(GED)ကၠိဖိ ၂၄ ဂၤ လၢအဖျိထီၣ်တ့ၢ်ဖဲ(၂၀၂၂-၂၀၂၃)တၢ်သိၣ်လိနံၣ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ပျၢ်ကၠိမူးတၢ်ရဲၣ်တၢ်ကျဲၤဘျီ၀ဲအံၤအပူၤ ကၠိၦၤဘၣ်မူဘၣ်ဒါ,သရၣ်, သရၣ်မုၣ်, ၦၤကၠိဖိဃုာ်ဒီး ကၠိဖိမိၢ်ပၢ် ဟဲထီၣ် ကအိၣ်လၢအဂၤ(၂၀၀၀)ဃၣ်ဃၣ်ညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ
