လါမ့ၤ ၅ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤ (၂၀၂၅)တနံၣ်အတီၢ်ပူၤန့ၣ် သုးမီၤစိရိၤအပှၤဟဲက့ၤပၥ်လီၤစုကဝဲၤအိၣ်ဝဲအဂၤ(၅၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
မူကီၢ်ဆၣ်,လၢၢ်ဒိၣ်ကီၢ်ဆၣ်ဒီးဆီထံးကီၢ်ဆၣ်ဟီၣ်ကဝီၤအပူၤ ၂၀၂၅ နံၣ် လါယနူၤအါရံၤတုၤလါဒံၣ်စ့ဘၢၣ် လၢတနံၣ်အတီၢ်ပူၤန့ၣ် လၢတၢ်အိၣ်သးအကလုၥ်ကလုၥ်အဃိ သုးမီၤစိရိၤအပှၤဃုၥ်ဒီးသုးဖိသီလၢအဘၣ်တၢ်ထၢန့ၢ်ဆူၣ်သုးတဖၣ်ဟဲက့ၤဟ့ၣ်လီၤစုကဝဲၤ ဟဲက့ၤပၥ်ဖှိၣ်မၤသကိးတၢ်ဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)သုးရ့ၣ်တဖၣ်အအိၣ်အိၣ်ဝဲ(၅၆)ဂၤ န့ၣ်လီၤ.
ဖဲန့ၣ်အကျါပယီၤသုးဖိလၢအဟဲက့ၤဟ့ၣ်လီၤသးတဖၣ်အါဒၣ်တက့ၢ်န့ၣ်ဘၣ်တၢ်ထၢန့ၢ်ဆူၣ်အဝဲသ့ၣ်ဝံၤတၢ်ဆှၢထီၣ်အီၤဆူ တၢ်ဒုးပျီပူၤဒီး အဝဲသ့ၣ်အံၤဖဲအဟဲက့ၤဟ့ၣ်လီၤသးအခါဟဲက့ၤစိၥ်ဝဲကျိချံပှၥ်သၣ်အိၣ်အသိးတနီၤန့ၣ်တပၣ်ဃုၥ်ဝဲဘၣ်အိၣ် အဂ့ၢ်န့ၣ် ကီၢ်ရ့ၣ်နဲၣ်ရွဲၣ်သဃဲၤ ပဒိၣ်စီၤနဲထူဘၠဲ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“လၢ(၂၀၂၅)ဒီတနံၣ်အတီၢ်ပူၤန့ၣ် ဒုၣ်ဒါဟဲက့ၤဟ့ၣ်လီၤသးအိၣ်ဝဲ(၅၆)ဂၤ.ပှၤလၢအဟဲက့ၤဟ့ၣ်လီၤသးန့ၣ်အါတက့ၢ်တၢ်ထၢန့ၢ်ဆူၣ် အဝဲသ့ၣ်လၢသုးဒီး တၢ်နီထီၣ်အဝဲသ့ၣ်ဆူတၢ်ဒုးပျီပူၤ.အဃိအဝဲသ့ၣ်န့ၣ်တသးအိၣ်မၤတၢ်ဘၣ်အဖီခိၣ်ဃုကျဲဒီးဟဲက့ၤလၢပအိၣ် တကပၤလီၤ.တနီၤန့ၣ်ဟဲက့ၤစိၥ်ဃုၥ်တၢ်စုကဝဲၤအိၣ်,တနီၤန့ၣ်တပၣ်ဘၣ်အိၣ်လီၤ”အဂ့ၢ်န့ၣ် စံးဝဲန့ၣ်လီၤ.
ဒီးသုးဖိသံၣ်ဖိလၢအဟဲက့ၤဟ့ၣ်လီၤသးတဖၣ်အံၤ တနီၤန့ၣ်လၢတၢ်အိၣ်သးအဖီခိၣ်က့ၤအိၣ်က့ၤဆိးဒီးအဟံၣ်ဖိဃီဖိအိၣ်အသိး ဘၣ်ဆၣ်တနီၤအကျါသ့ၣ်ညါဝဲလၢသုးမီၤစိရိၤအတၢ်ဖံးတၢ်မၤအံၤတဘၣ်ဘၣ်အဃိနုၥ်လီၤပၥ်ဖှိၣ်မၤသကိးလၢတၢ်ကရၢကရိ ပူၤအိၣ်ဝဲအဂ့ၢ်န့ၣ် မူကီၢ်ဆၣ်ပှၤဘၣ်မူဘၣ်ဒါ ပဒိၣ်စီၤစံးပတြၢၤ စ့ၢ်ကီးစံးဝဲန့ၣ်လီၤ.
“တနီၤန့ၣ်အပူၤကွံၥ်အိၣ်လၢဟံၣ်ဃုဖံးဃုမၤအဃိတၢ်ကဲထီၣ်သးဒ်အံၤဆဲးကျိးဝဲအဟံၣ်ဖိဃီဖိဒီးက့ၤမၤအီၣ်မၤအီတၢ်လၢ တၢ်ဘံၣ်တၢ်ဘၢအလီၢ်လီၤ.တနီၤခီဒုက့ၤတဘူၣ်ဘၣ်အိၣ်တ့ၢ်.တနီၤခီန့ၣ်က့ၤတဘူၣ်ဘၣ်တမ့ၢ်ဘၣ် ခီဖျိသုးမီၤစိရိၤအတၢ်ဖံး တၢ်မၤအံၤထံၣ်လၢအတဘၣ်ဘၣ်အဃိအိၣ်တ့ၢ်မၤသကိးက့ၤတၢ်ဒီးပကရူၢ်ကရၢဒုအိၣ်မီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
ဒ်န့ၣ်အသိးတနံၣ်အတီၢ်ပူၤ ပယီၤသုးဟဲက့ၤပၥ်လီၤစုကဝဲၤအမဲၥ်ညါဟီၣ်ကဝီၤ(KNLA)ဒီး(KNDO)သုးပၥ်ဖှိၣ်ဖီၣ်န့ၢ်ဝဲ ပယီၤသုးအပှၤအိၣ်စ့ၢ်ကီး ဝဲ(၃၄)ဂၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
သုးဟံန့ၢ်တၢ်စိတၢ်ကမီၤဝံၤလီၢ်ခံ ခ့ၣ်အဲၣ်ယူၣ် ကီၢ်ရ့ၣ်/သုးက့တဖၣ်အကျါလီၤဆီဒၣ်တၢ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)အံၤ မ့ၢ်ဟီၣ်ကဝီၤတဘ့ၣ်လၢ သုးမီၤစိရိၤအပှၤသုးဖိဒီးသုးဖိသီလၢဘၣ်တၢ်ထၢန့ၢ်ဆူၣ်သုးတဖၣ်ဟဲက့ၤလီၤစုကဝဲၤအိၣ်ဝဲတလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
