လါမ့ၤ ၆သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်တန့ခၠါကီၢ်ဆၣ်စှီၤခိၣ်သဝီကရူၢ်ဟီၣ်ကဝီၤအပူၤကညီဖီၣ်စုကဝဲၤကရူၢ်ကရၢတဖၣ်မၤဝဲတၢ်သူၣ်ထီၣ်ဘှီထီၣ်ကျဲအဃိ,စံၥ်လီၢ်လၢဘူးဒီးကျဲတဖၣ်ဘၣ်ဟးဂီၤဝဲဒီးသဝီကမျၢၢ်လီၢ်ကဝီၤဖိတဖၣ်ဖံးအီၣ်မၤအီၣ်က့ၤဝဲတၢ်တသ့ဘၣ်အဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
စှီၤခိၣ်သဝီကရူၢ်ထိၣ်ကီးကိကစၢၢ်ဒီးသ့ၣ်ကတံၤတၢ်ဟးထီၣ်က့ၤလီၤကျဲ(၂)ဘိအပူၤတၢ်မၤဂ့ၤတ့ထီၣ်ဘှီထီၣ်ဝဲကျဲအဃိ,မဲးဒီးလၢၢ်လ့တဖၣ်လီၤဝဲလၢကမျၢၢ်တဖၣ်စံၥ်လီၢ်ခီးလီၢ်အဖီခိၣ်တနံၣ်အံၤတၢ်ဖံးအီၣ်မၤအီၣ်က့ၤဝဲတၢ်တသ့လၢၤဘၣ်အဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးဒီးကမျၢၢ်စံၥ်လီၢ်ပှဲၥ်လီၢ်ဟးဂီၤအဖီခိၣ်စှီၤခိၣ်သဝီလီၢ်ကဝီၤပိၥ်ခွါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ပှၤတ့ကျဲမၤကျဲအံၤစးထီၣ်ဘၣ်ဟးဂီၤဝဲဒူသဝီပူၤကမျၢၢ်တီၤဒီးတၢ်လီၢ်တၢ်ကျဲဃုၥ်ဒီးစံၥ်လီၢ်ကျီးလီၢ်တဖၣ်ဒီဒူၣ်လံန့ၣ်လီၤ.အဃိန့ၣ်တနံၣ်အံၤပှၤမၤအီၣ်စံၥ်တအိၣ်လၢၤဘၣ်.မ့အိၣ်သနၥ်က့ကအိၣ်ဒၣ်ထဲစှၤကိၥ်ဂၤလီၤ.အအံၤမ့မ့ၢ်လၢကစၢၢ်န့ၣ်လီၤတသုးအဃိလၢစံၥ်ပူၤပှဲၥ်ပူၤကဲထီၣ်က့ၤမဲး,ပှၤမၤအီၣ်တၢ်ပျၢ်လီၤထံတဘူၣ်ဘၣ်.ပှၤမၤစံၥ်တသ့လၢၤဘၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ခီဖျိကမျၢၢ်ဖံးအီၣ်မၤအီစံၥ်ပှဲၤတသ့လၢၤဘၣ်အဃိတၢ်ကီတၢ်ခဲအိၣ်ထီၣ်ဝဲလၢတၢ်အိၣ်ဆိးဖံးမၤအီၣ်အီတကပၤဒီးတၢ်ဒိးန့ၢ်ဘၣ်ဘုဟုအဂ့ၢ်,အဝဲစံးစ့ၢ်ကီးဝဲဒၣ်န့ၣ်လီၤ.
စှီၤခိၣ်သဝီကရူၢ်ဟီၣ်ကဝီၤအပူၤတကီၢ်ခါခဲအံၤခီဖျိတၢ်တ့ထီၣ်ကျဲဒီးတၢ်မၤစ့ၢ်ကီးဝဲခီပနံၥ်တၢ်သူၣ်ထီၣ်ဆီလီၤတဖၣ်အိၣ်ဝဲအဃိလီၢ်ကဝီၤဖိတဖၣ်အိၣ်ဝဲဒီးတၢ်ဘၣ်ယိၣ်ဘၣ်ဘှီအဂ့ၢ်,သ့ၣ်ညါဘၣ်န့ၣ်လီၤ.
ကရူၢ်ကရၢတဖၣ်အတၢ်ဖံးတၢ်မၤအဖီခိၣ်တၢ်ဘၣ်ယိၣ်အိၣ်လၢခါဆူညါစံၥ်လီၢ်ပှဲၥ်လီၢ်တဖၣ်ကဟးဂီၤကွံၥ်ဝဲခဲလၢၥ်အဂ့ၢ်,ကွံလ့လီၢ်ကဝီၤကမျၢၢ်ပိၥ်မုၣ်တဂၤစံးစ့ၢ်ကီးဝဲဒၣ်ဒ်အံၤန့ၣ်လီၤ.
“ကွံလ့သဝီပူၤဒုမ့မ့ၢ်ခဲအံၤပှၤစံၥ်လီၢ်ပှဲၥ်လီၢ်ဟးဂီၤတအိၣ်ဒံးဘၣ်.ဘၣ်ဆၣ်တၢ်မၤတၢ်သူၣ်ထီၣ်ဆီလီၤခီၣ်ပနံၣ်တၢ်ရဲၣ်တၢ်ကျဲၤတဖၣ်န့ၣ်ဘူးထီၣ်ဒီးပစံၥ်လီၢ်ကျီးလီၢ်ပတၢ်ဖံးအီၣ်မၤအီၣ်တၢ်လီၢ်ဂုၢ်ဂုၢ်လီၤ.အသုမ့ဆီလီၤလံဒုကမၤဝဲတၢ်တိၥ်ပၥ်အိၣ်လီၤ.အဃိန့ၣ်ခါဆူညါပဘၣ်ယိၣ်လၢပတၢ်လီၢ်ကဟးဂီၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
ကျဲလၢတၢ်တ့ထီၣ်ဘှီထီၣ်ဒီးမၤဘၣ်ဒိဘၣ်ထံးဝဲကမျၢၢ်တၢ်ဖံးအီၣ်မၤအီၣ်လီၢ်တဖၣ်အံၤမ့ၢ်ဝဲကညီတၢ်မုၥ်တၢ်ခုၣ်ကီၣ်ကးကရၢ(KNU/KNLAPC)ဒီးကညီဒီကလုၥ်သုးမုၢ်ဒိၣ်(KNA)အတၢ်တိၤကျဲၤတဖၣ်အဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ.
ဒီးတၢ်ဘၣ်ဒိဘၣ်ထံးအဖီခိၣ်,အပူၤကွံၥ်လၢတၢ်ဘှါရှဲဝဲတၢ်ဂ့ၢ်ကီအံၤအဂီၢ်ကမျၢၢ်လီၢ်ကဝီၤခိၣ်နၢ်ဒီးလီၢ်ကဝီၤဖိတဖၣ်ပၥ်ဖျါထီၣ်ဝဲဒၣ်အတၢ်ဂ့ၢ်ကီဆူလီၢ်ကဝီၤကရူၢ်ကရၢဘၣ်ထွဲပှၤဘၣ်မူဘၣ်ဒါတဖၣ်အအိၣ်အိၣ်ဝဲဘၣ်ဆၣ်တၢ်ဟံးထီၣ်ဖီၣ်ထီၣ်ဘှါရှဲဝဲတအိၣ်ဝဲဒၣ်ဘၣ်အဂ့ၢ်,လီၢ်ကဝီၤဖိတဖၣ်စံးဝဲဒၣ်စ့ၢ်ကီးန့ၣ်လီၤ.
လၢတၢ်န့ၣ်အဃိ,ဘၣ်ဃးဒီးကမျၢၢ်တၢ်ဘၣ်ဒိဘၣ်ထံးတၢ်ဂ့ၢ်အံၤအပူၤကွံၥ်လါမ့ၤ(၅)သီအနံၤအပူၤခ့ၣ်အဲၣ်စံၣ်ကညီတၢ်ကစီၣ်ဆဲးကျိးသံကွၢ်တ့ၢ်ဝဲကညီတၢ်မုၥ်တၢ်ခုၣ်ကီၣ်ကးကရၢ(KNU/KNLAPC)ပှၤကတိၤတၢ်ပၢသုးခိၣ်ဒိၣ်စိစီၤကၠီၣ်ညိၣ်ဒီး(KNU/KNLAPC)တကပၤစံးဝဲဒၣ်ဒ်အံၤန့ၣ်လီၤ.
“လၢတၢ်တ့ထီၣ်ဘှီထီၣ်ကျဲအဃိကမျၢၢ်တၢ်ဘၣ်ဒိဘၣ်ထံးအိၣ်န့ၣ်ပတသ့ၣ်ညါထွဲနီဘျီဒံးဘၣ်.ဘၣ်ဆၣ်မ့အိၣ်သပှၢ်ကတၢၢ်န့ၣ်ပှၤလၢဘၣ်ဒိဘၣ်ထံးတဖၣ်တီၣ်ဖျါထီၣ်တၢ်ဂ့ၢ်သ့န့ၣ်လီၤ.ပတဲသကိးဘှါရှဲသကိးသ့ဝဲလီၤ.ပဟီၣ်ကဝီၤအပူၤခီကရူၢ်ကရၢအိၣ်အါဖုအဖီခိၣ်မ့ၢ်ဖဲလဲၣ်တဖုကဘၣ်ဟံမူဒါဘှါရှဲဝဲန့ၣ်ပကဃုဃိထံၣ်သ့ၣ်ညါဒီးရဲၣ်ကျဲၤမၤအီၤလၢအဂ့ၤကတၢၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
စှီၤခိၣ်သဝီကရူၢ်ဟီၣ်ကဝီၤအပူၤလီၢ်ကဝီၤဖိသ့ၣ်တဖၣ်အံၤတၢ်တ့ထီၣ်ဘှီထီၣ်ကျဲဒီတကတီၢ်အပူၤသဂၢၢ်ဘၣ်ဝဲတၢ်ဖံးအီၣ်မၤအီၣ်စံၥ်ပှဲၥ်တၢ်ဂ့ၢ်ကီအိၣ်ထီၣ်ဝဲဒီးသဂၢၢ်ဘၣ်စ့ၢ်ကီးဝဲယံၥ်လၢတနံၣ်ဃၣ်ဃၣ်လံအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ခီဖျိတၢ်တ့ထီၣ်ဘှီထီၣ်ကျဲအဃိစှီၤခိၣ်သဝီကရူၢ်ပူၤကွံလ့,စှီၤခိၣ်,ထိၣ်သူခံ,သ့ၣ်ကတံၤ,ကိမလ့သဝီ(၅)ဖျၢၣ်အပူၤစံၥ်ပှဲၥ်တၢ်ဖံးအီၣ်မၤအီၣ်လီၢ်ကျဲဘၣ်ဟးဂီၤဝဲအိၣ်ဝဲလၢအလီၢ်(၂၀)ဒီး(၃၀)ခိၣ်ဃၢၤလံအဂ့ၢ်,ဒူသဝီခိၣ်နၢ်တဖၣ်စံးဝဲဒၣ်န့ၣ်လီၤ.
