လါမ့ၤ ၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ဟီၣ်ကဝီၤအပူၤ ခီဖျိကဘီယူၤလဲၤတ့ၢ်လီၤကဒီးမ့ၣ်ပိၢ်အဃိ ကမျၢၢ်ဘၣ်ဒိ(၃)ဂၤအကျါ ပၣ်ဃုၥ်ဝဲဖိသၣ်(၂)လါဘျဲၣ်တဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤဟါခီအခါန့ၣ်လီၤ.
တနီသရံၣ်ကီၢ်ဆၣ်အပူၤ ဖဲတနံၤအံၤလါမ့ၤ ၂ သီ ဟါခီ ၂း၀၀ နၣ်ရံၣ်အဆၢကတီၢ်န့ၣ် သုးမီၤစိရိၤ(Jet Fighter)ကဘီယူၤ လဲၤတ့ၢ် လီၤဝဲပီၣ်(၂၅၀)မ့ၣ်ပိၢ်(၂)ဖျၢၣ်လၢမိဒီၢ်ဝ့ၢ်ပူၤအဃိ ကမျၢၢ်ပိၥ်မုၣ်(၁)ဂၤ,ပိၥ်ခွါ(၁)ဂၤဒီးဖိသၣ်(၂)လါဘျဲၣ်တဂၤအံၤ ဘၣ်ဒိဘၣ်ထံးဝဲ အမဲၥ်သၣ်,အစု, အကပၤ,အခီၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လီၢ်ကဝီၤပှၤဘၣ်မူဘၣ်ဒါလၢထံၣ်တၢ်ကဲထီၣ်သးအံၤဒီးအမဲၥ်တဂၤစံးဝဲလၢ“ဖဲတဟါအံၤ ၂း၁၅ မံးနံးအခိၣ်အဃၢၤန့ၣ် ကဘီယူၤဟဲတ့ၢ်လီၤမ့ၣ်ပိၢ်ဖဲ(မိဒီၢ်)ဝ့ၢ်ပူၤလီၤ.ကမျၢၢ်ဘၣ်ဒိ(၃)ဂၤ.ဖဲန့ၣ်အကျါန့ၣ်ပၣ်ဃုၥ်ဒီးဖိသၣ်ပိၥ်ခွါအိၣ်(၂)လါတဂၤ. ယဆိမိၣ်ဒုသးသမူတၢ်ဘၣ်ယိၣ်တအိၣ်ဘၣ်,အိၣ်ဒၣ်အသးပ့ၤနီၣ်အသးဒ်န့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်ကဘီယူၤဟဲတ့ၢ်လီၤမ့ၣ်ပိၢ်ဘျီဝဲအံၤ တၢ်ဘၣ်ဒိဘၣ်ထံးအမဲၥ်ညါဟံၣ်တၢ်သူၣ်ထီၣ်လီၤပှီၢ်ဟးဂီၤဝဲ(၂)ဖျၢၣ်အကျါ တဖျၢၣ်န့ၣ်လီၤပှီၢ်လီၤကရဲဒီတဖျၢၣ်အသိး ကဘီယူၤဟဲခးလီၤတၢ်ဝဲအံၤဟံၣ်ခိၣ်ဟံၣ်ဃၢၤတဖၣ်မ့ၣ်အူအီၣ်ဝဲအဃိ တၢ်တယးလၢ ကပၣ်ဃုၥ်ဝဲဒီးမ့ၣ်ပိၢ်လၢအအူအီၣ်တၢ်အံၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
သုးမီၤစိရိၤအံၤဒ်သိးထံဂုၤကီၢ်ဂၤကပၥ်ပနီၣ်အီၤအဂီၢ်န့ၣ် မၤတ့ၢ်ဝဲတၢ်ဃုထၢအယီၤအဘျၣ်,ကျဲးစၢးဒုးအိၣ်ထီၣ်ဝဲပဒိၣ်တဖုဘၣ်ဆၣ် ပၥ်တၢ်ခးပနီၣ်သူဝဲကျိဖးဒိၣ်,ကဘီယူၤလဲၤတ့ၢ်လီၤဝဲတၢ်လၢကမျၢၢ်အိၣ်ဆိးလီၢ်ကျဲကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် စံးဝဲန့ၣ်လီၤ.
တနီသရံၣ်ကီၢ်ဆၣ်လၢသုးမီၤစိရိၤကဘီယူၤလဲၤခးလီၤအံၤ အဘူးကတၢၢ်ဖဲအပူၤကွံၥ်လါအ့ဖြ့ၣ် ၂၇ သီအနံၤစ့ၢ်ကီး ကဘီယူၤလဲၤ တ့ၢ်လီၤဝဲပီၣ်(၃၀၀)မ့ၣ်ပိၣ်လၢမဲးဝါဟီၣ်ကဝီၤပူၤ(၂)ဘျီ,မီတီၣ်ဝ့ၢ် ကဝီၤဒ့ပူၤ(၄)ဘျီ တ့ၢ်လီၤဝဲတစှၤန့ၢ်(၁၂)ဖျၢၣ်အဃိ ကမျၢၢ်ဒီမါဝၤ သံကွံၥ်ဝဲ(၂)ဂၤဒီး (ပြည်ဖြိုးထွန်းကုမ္ပဏီ)တၢ်သူၣ်သိထူၣ်တၢ်တိၥ်ကျဲၤ ပှၤမၤတၢ်ဖိအိၣ်ဆိးလီၢ်ကျဲဘၣ်ဒိဘၣ်ထံး ဟးဂီၤကဲ ထီၣ်ဒံးဝဲန့ၣ်လီၤ.
ဒ်(KPSN)တၢ်မၤနီၣ်မၤဃါပူၤအိၣ်ဝဲအသိးန့ၣ် (၂၀၂၅)လါအီးကထိဘၢၣ် တုၤ(၂၀၂၆)လါမးရှး လၢ(၆)လါအတီၢ်ပူၤ ခ့ၣ်အဲၣ်ယူၣ် ကီၢ်ရ့ၣ်/သုးက့တဖၣ်အကျါ ကီၢ်ရ့ၣ်(၃)ဘ့ၣ်လၢဘၣ်ကွၢ်ဆၢၣ်မဲၥ်ဝဲတၢ်သံတၢ်ပှၢ်,တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအါကတၢၢ် န့ၣ် ဘျံးဒဝဲၢ်ကီၢ်ရ့ၣ်(သုးက့ ၄)အံၤ ပၣ်ဃုၥ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
