လါမ့ၤ ၉ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ညၣ်ပျၤခံလၢစဲဘူးလိၥ်အသးဒီးခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ထံမိၢ်ပှၢ်ဟီၣ်ကဝီၤ အံၤ ဖဲမဟါအနံၤ ကၠီၣ်တဲၣ်ပှၤဘၣ်မူဘၣ်ဒါတဂၤလၢမၤစၢၤတၢ်လၢထံကီၢ်ဆၢအံၤ ဘၣ်တၢ်ခိးခးအီၤလၢ(KTLA)သုးခိၣ်အဲၣ်ခွံအပှၤ ဒီး တၢ်ဒွဲၣ်အူအီၣ်ကွံၥ်ဝဲအသိလ့ၣ် အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ဖဲမဟါလါမ့ၤ ၈ သီ ဟါခီအဆၢကတီၢ်န့ၣ် လၢကလဲၤမၤစၢၤတၢ်အဂီၢ် လၢသိလ့ၣ်တခိၣ်အပူၤ ကၠီၣ်တဲၣ်ပှၤဘၣ်မူဘၣ်ဒါအံၤဒီး အသကိးတဂၤဃုၥ်ဒီး ပှၤဆါ(၂)ဂၤ ပၥ်ဖှိၣ်ခဲလၢၥ်(၄)ဂၤ ဖဲအလဲၤတုၤဝဲဖဲ ညၣ်ပျၤခံတၢ်လီၢ်အံၤအခါန့ၣ် ကီၢ်သူလ့ၤသုးမုၢ်ဒိၣ် (KTLA)သုးခိၣ်အဲၣ်ခွံအပှၤခးဝဲလၢကျဲပူၤန့ၣ်လီၤ.
လၢ(KTLA)အတၢ်ခိးခးဝဲဘျီဝဲအံၤခီဖျိပှၤအိၣ်လၢသိလ့ၣ်ပူၤတဖၣ်အံၤဃ့ၢ်ပူၤဖျဲးသးအဃိ သးသမူပူၤဖျဲးထီၣ်လၢတၢ်သံ အပူၤဒီးဘၣ်ဆၣ်မ့မ့ၢ်အသိလ့ၣ်ခီန့ၣ် ဘၣ်တၢ်ဒွဲၣ်အူအီၣ်ကွံၥ်ဝဲဒီတခိၣ်ညါအဂ့ၢ်န့ၣ် ဘျံးဒဝဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံးဝဲန့ၣ်လီၤ.
အဝဲစံးဝဲလၢ“အဝဲသ့ၣ်လဲၤတၢ်န့ၣ်လၢကါပူၤန့ၣ်ပၣ်ဝဲဒၣ်ခဲလၢၥ်(၄)ဂၤ.ပၣ်ဝဲဒၣ်ကၠီၣ်တဲၣ်ပှၤဘၣ်မူဘၣ်ဒါတဂၤ,အသကိးတဂၤဒီး ပှၤဆါ(၂)ဂၤ.တၢ်န့ၣ်အကလဲၤမၤစၢၤပှၤလၢထံဆၢကီၢ်ဆၢဒီးပှၤခိးခးလီၤအီၤလၢကျဲပူၤ.ပှၤခးအဝဲသ့ၣ်ဘျီအဝဲသ့ၣ်စံၣ်လီၤလၢကါပူၤ.မ့မ့ၢ်ကါန့ၣ်ကီၤလၤဖိအပှၤဒွဲၣ်အူအီၣ်ကွံၥ်ဝဲ.ကိၢ်ညၢ်လၢအတသံဘၣ်ဃ့ၢ်ပူၤက့ၤခီ.မ့ဘၣ်ဒုတၢ်ကီ.”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီ တၢ်ကစီၣ်န့ၣ်လီၤ.
ညၣ်ပျၤခံတၢ်လီၢ်လၢ(KTLA)အပှၤခးဝဲကၠီၣ်တဲၣ်ပှၤဘၣ်မူဘၣ်ဒါတဂၤအံၤအသိလ့ၣ်န့ၣ် တမ့ၢ်အိၣ်လၢဘျံးဒဝဲၢ်ကီၢ်ရ့ၣ်(သုးက့ ၄) ဟီၣ်ကဝီၤပူၤလိၤလိၤ ဘၣ်ဒီး မ့မ့ၢ်တခီ ခီဃီၤဝဲဆူကီၢ်ကၠီၣ်တဲၣ်တၢ်ပၢပူၤကအိၣ်လၢ(၃)ကံလိမံထၢၣ်လံအဖီခိၣ် ဘၣ်ဃး (KTLA)ခးဝဲကၠီၣ်တဲၣ်ထံဖိကီၢ်ဖိအံၤ မ့ၢ်တၢ်ကဲထီၣ်အဆိကတၢၢ်တဘျီအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
သုးခိၣ်အဲၣ်ခွံကရူၢ်အံၤ ဟံန့ၢ်ဝဲခီၣ်တဃၥ်အိၣ်ဆီလီၤသးဟူးဂဲၤဝဲဒၣ်ဖဲကီၢ်ကၠီၣ်တဲၣ် ဘီတံၢ်သဝီပူၤတကးဒံးဘၣ်အမဲၥ်ညါ အပူၤကွံၥ်အဝဲသ့ၣ်ကရူၢ်အံၤပၥ်ဃၥ်ဝဲစုကဝဲၤလၢကၠီၣ်တဲၣ်ပူၤတကပၤဒီး ဒိးလီၤဃၥ်ဝဲဟီၣ်လၥ်မ့ၣ်ပိၢ်,ခိးခးတၢ်လၢထံဆၢ ကီၢ်ဆၢအိၣ် ဝဲတလီၢ်လီၢ်အဂ့ၢ်န့ၣ် ဘျံးဒဝဲၢ်ကီၢ်ရ့ၣ် ပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
ဘျံးဒဝဲၢ်ဟီၣ်ကဝီၤဃုၥ်ဒီးထံဆၢကီၢ်ဆၢလၢသုးခိၣ်အဲၣ်ခွံဟူးဂဲၤညီနုၢ်ဝဲအလီၢ်တဖၣ်န့ၣ် တဘျီလၢ်လၢ်ဖဲဟီၣ်ကဝီၤ (KNLA) ဒီးကမျၢၢ်လ့ၢ်ထီၣ်လ့ၢ်လိၤအခါန့ၣ် (KTLA)လၢအဘၣ်တၢ်တီခိၣ်ရိၣ်မဲအီၤလၢသုခိၣ်အဲၣ်ခွံ(ကိး)ကီၤလၤဖိအံၤ ခိးခးဝဲတလီၢ်လီၢ် အဃိ (KNLA)အပှၤဃုၥ်ဒီးကမျၢၢ်သံကဲထီၣ်ဝဲခဲအံၤခဲအံၤန့ၣ်လီၤ.
အဘူးကတၢၢ်ဖဲအပူၤကွံၥ်လါအ့ဖြ့ၣ် ၂၂ သီအနံၤ လၢပီချိဟီၣ်ကဝီၤအပူၤ ခီဖျိ(KTLA)သုးခိၣ်အဲၣ်ခွံအပှၤခးဝဲအဃိ (KNLA)သုးရ့ၣ်-၁၂ အပှၤသံဝဲ(၄)ဂၤ ဒီး ကမျၢၢ်ဖိသၣ်ပိၥ်ခွါ(၁၀)နံၣ်ခိၣ်ဃၢၤတဂၤသံကဲထီၣ်ဒံးဝဲန့ၣ်လီၤ.