(သုးက့ ၁)ဟီၣ်ကဝီၤတလါအတီၢ်ပူၤ သုးမီၤစိရိၤတ့ၢ်လီၤဝဲမ့ၣ်ပိၢ်,ကျိဖးဒိၣ်အဘျီ(၁၁၀)ဘျဲၣ်,ကမျၢၢ်သံဘၣ်ဒိ(၁၁)ဂၤဒီး သီခါဖၠၣ်ဃုၥ်ဒီးတၢ်သူၣ်ထီၣ်ဟးဂီၤ(၇၀)ဘျဲၣ်

လါမ့ၤ ၁၀ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်ကဝီၤ လါအ့ဖြ့ၣ်တလါအတီၢ်ပူၤသုးမီၤစရိၤလဲၤတ့ၢ်လီၤဝဲမ့ၣ်ပိၢ်,ခးလီၤဝဲကျိဖး ဒိၣ်ခဲလၢၥ်အိၣ်ဝဲအဘျီ(၁၁၀)ဘျဲၣ်ဒီး ကမျၢၢ်သံဘၣ်ဒိဘၣ်ထံး(၁၁)ဂၤအမဲၥ်ညါသီခါဖၠၣ်ဃုၥ်ဒီးတၢ်သူၣ်ထီၣ်ဟးဂီၤလီၤကရဲဝဲ အဖျၢၣ် (၇၀)ဘျဲၣ် အဂ့ၢ်န့ၣ် သ့ၣ်ညါဘၣ်လၢတလါတဘျီကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ.

ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် လါအ့ဖြ့ၣ် ၁ သီ တုၤ ၃၀ သီ လၢတလါအတီၢ်ပူၤ သုးမီၤစိရိၤသူဝဲ(Jet fighter) , (Y-12), ပၤရၤမီၤတၤလ့ၤထံ ခးစိဃီၤဝဲကျိဖးဒိၣ်(၁၁၉)ဘျီဒီးမ့မ့ၢ်လၢအဖျၢၣ်ခီန့ၣ် တ့ၢ်လီၤဝဲပီၣ်(၅၀၀),(၃၀၀)မ့ၣ်ပိၢ်,(၁၂၀ မမ), (၁၂၂ မမ)ကျိဖးဒိၣ်,အီး လံးကၢး,ခရဲၤစတၤ ပၥ်ဖှိၣ်ခဲလၢၥ်အိၣ်ဝဲအဖျၢၣ်(၃၄၀)ခိၣ်ဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ခီဖျိလၢမ့ၣ်ပိၢ်ဒီးကျိဖးဒိၣ်အကလုၥ်ကလုၥ်အံၤအဃိ ကမျၢၢ်သံဝဲ(၂)ဂၤ,ဘၣ်ဒိထံး(၉)ဂၤဒီး ဟံၣ်(၆၉)ဖျၢၣ်, ကျးဆါတၢ်(၂)ဖျၢၣ်, သီခါဖၠၣ်(၄)ဖျၢၣ်,ကၠိတၢ်သူၣ်ထီၣ်(၁)ဖျၢၣ်,ကျးဆါရ့ၣ်နီၣ်သိ(၂)ဖျၢၣ်အူအီၣ်ဟးဂူၥ်ဟးဂီၤဝဲလီၤကရဲဝဲဒၣ်စုၥ်စုၥ်အသိး ထိး,ကျီၢ်, ထွံၣ်ဆၣ်ဖိ ကီၢ်ဖိသံဘၣ်ဒိဘၣ်ထံးဃုၥ်ဒီးရီဘၢၣ်ကျီးတၢ်ဖံးအီၣ်မၤလီၢ်လၢအဂၤဟးဂီၤဝဲဒၣ်အါမးန့ၣ်လီၤ.

ဒ်န့ၣ်အသိးလၢတလါအတီၢ်ပူၤအံၤစ့ၢ်ကီး ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုၥ် ဂၢၤသးကရၢ (KNDO)သုးပၥ်ဖှိၣ်အဘၢၣ်စၢၤ တၢ်ခးလိၥ်သးကဲထီၣ်ဝဲ(၂၅)ဘျီအဃိ ပယီၤသုးတကပၤ(၂၅)ဂၤ,ဘၣ်ဒိ(၂၄)ဂၤဒီး တၢ်ဖီၣ်သမူန့ၢ်ဝဲ(၁၄)ဂၤ အမဲၥ်ညါ ပယီၤသုးအသိလ့ၣ်ဟးဂီၤ(၂)ခိၣ်,တၢ်သူၣ်ထီၣ်ဟးဂီၤ(၂)ဖျၢၣ် အဂ့ၢ်န့ၣ် ဒူသထူၣ်ကီၢ်ရ့ၣ် တၢ်မၤနီၣ်စရီအပူၤ ပၥ်ဖျါဝဲန့ၣ်လီၤ.

တကးဒံးဘၣ်လၢတၢ်ဒုးဘျီဝဲအံၤအပူၤစ့ၢ်ကီး မ့မ့ၢ်(KNLA)သုးပၥ်ဖှိၣ်တကပၤန့ၣ် ဘၣ်ဟ့ၣ်လီၤ ကွံၥ်အသးသမူလၢထံကီၢ်ဒီး ပှၤကလုၥ်အဂီၢ်ခဲလၢၥ်(၅)ဂၤ, ဘၣ်ဒိဘၣ်ထံးဝဲ(၁၂)ဂၤဒီး ပှၤသ့ၣ်တဖၣ်အံၤသံဘၣ်ဒိ ဘၣ်ထံးဝဲလၢ တၢ်ထီၣ်လ့က့ၣ်သုးကလၢၤ တၢ်ဒုးအပူၤခီဖျိလၢသုးမီၤစိရိၤအမ့ၣ်ပိၢ်,ကျိဖးဒိၣ်တဖၣ်အဃိန့ၣ်လီၤ.

တကးဒံးဘၣ်လ့ၣ်က့ၣ်သုးကလၢၤလၢ(KNLA)သုးပၥ်ဖှိၣ်ထီၣ်ဝဲန့ၢ်ဖဲလါအ့ဖြ့ၣ် ၁၂ သီ တၢ်ဒုးဘျီဝဲန့ၣ်အပူၤစ့ၢ်ကီး တၢ်မၤပယီၤ သုးသံဘၣ်ဒိဘၣ်ထံး,တၢ်ဖီၣ်သမူန့ၢ်ဝဲအမဲၥ်ညါတၢ်မၤန့ၢ်ဝဲ ကျိစဲး(၁)ခိၣ်,အပျီ(၁)ခါ, MA1(၇)ခိၣ်, MA2(၄)ခိၣ်, MA3 (၅)ခိၣ်, ဒြိ (၁)ဘ့ၣ်, စကီးဒြိ(၁)ဘ့ၣ်, (၈၁ မမ)အချံ(၅)ဖျၢၣ်, ARအချံ(၃၇၄၆)ဖျၢၣ်, (၆၀ မမ)အချံ(၂၀)ဖျၢၣ်, (၄၀ မမ)အချံ(၁၀၀)ဖျၢၣ်, အံၤနၤကၤအချံ(၃၀)ဖျၢၣ်ဃုၥ်ဒီးသုးတၢ်ပီးတၢ်လီလၢအဂၤတၢ်မၤန့ၢ်ဝဲဒၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤ ပၥ်ဖျါဝဲန့ၣ်လီၤ.

လီၢ်ခံကတၢၢ်တၢ်အိၣ်သးခဲအံၤလ့က့ၣ်သုးကလၢၤလီၤလံဘၣ်ဆၣ်တးပီသုးကလၢၤလၢအိၣ်ဘူးဒီးသုးကလၢၤအံၤ(KNLA)သုးပၥ်ဖှိၣ် ဆဲးထီၣ်ဝဲဒီးတုၤလၢခဲအံၤဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤအသိး စးထီၣ်လၢတၢ်လဲၤထီၣ်ခးဝဲ သုးကလၢၤတုၤလၢခဲအံၤ ကဘီယူၤ,ကျိဖးဒိၣ်ဒီးပၤရၤမီၤတၤလ့ၤထံကဘီယူၤဟဲတ့ၢ်လီၤဝဲ မ့ၣ်ပိၢ်,ကျိဖးဒိၣ်လၢသုးကလၢၤ အခိၣ်အဃၢၤ,ဒူသဝီပူၤ အိၣ်ဝဲကိးမုၢ်နံၤဒဲးဃၣ်ဃၣ်တကးဒံးဘၣ် လီၢ်ကဝီၤကမျၢၢ်အဂၤ(၂၀၀၀၀)ဃၣ်ဃၣ် တုၤလၢခဲအံၤ က့ၤဟံၣ်က့ၤဃီတဘူၣ်ဒံးဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

(သုးက့ ၁)ဟီၣ်ကဝီၤအပူၤအပူၤကွံၥ်လါမးရှးတလါအတီၢ်ပူၤန့ၣ်စ့ၢ်ကီး ခီဖျိလၢသုးမီၤစိရိၤကဘီယူၤဒီးကျိဖးဒိၣ်အကလုၥ်ကလုၥ် အံၤအဃိ ကမျၢၢ်သံဘၣ်ဒိဘၣ်ထံးဝဲ(၉)ဂၤဒီးဟံၣ်,သီခါဖၠၣ်တၢ်သူၣ်ထီၣ်ခဲလၢၥ်(၄)ဖျၢၣ်ဟးဂီၤကဲထီၣ်ဒံးဝဲဒၣ်န့ၣ်လီၤ.