လါမ့ၤ ၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤ(၆)လါအတီၢ်ပူၤ ခီဖျိလၢသုးမီၤစိရိၤအတၢ်ဟူးတၢ်ဂဲၤအကလုၥ်ကလုၥ် အဃိ ကမျၢၢ်ထံဖိကီၢ်ဖိသံဘၣ်ဒိဘၣ်ထံးဝဲ(၄၀၀)ဘျဲၣ်ဒီး တၢ်သူၣ်ထီၣ်ဟးဂူၥ်ဟးဂီၤပၥ်ဖှိၣ်အိၣ်ဝဲ(၆၀၀)ဖျၢၣ်အဂ့ၢ်န့ၣ် ကညီဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ထုးထီၣ်ပၥ်ဖျါဝဲဖဲတနံၤအံၤလါမ့ၤ ၁ သီအံၤန့ၣ်လီၤ.
ဒ်(KPSN)အလံၥ်တၢ်ပၥ်ဖျါပူၤအသိးန့ၣ် စးထီၣ်(၂၀၂၅)လါအီးကထိဘၢၣ် တုၤ(၂၀၂၆)လါမးရှး လၢ(၆)လါအတီၢ်ပူၤ သုးမီၤစိရိၤ သူဝဲဒၣ်ဒြိ,ကျိဖးဒိၣ်,ကဘီယူၤခးလီၤဝဲတၢ်လၢခ့ၣ်အဲၣ်ယူၣ် ကီၢ်ရ့ၣ်/သုးက့(၆)ဘ့ၣ် တၢ်ပၢဟီၣ်ကဝီၤ ပူၤ တစှၤန့ၢ် (၁,၄၆၁) ဘျီညါန့ၣ်လီၤ.
ခီဖျိလၢသုးမီၤစိရိၤအတၢ်ဟူးတၢ်ဂဲၤတၢ်ဖံးတၢ်မၤသ့ၣ်တဖၣ်အံၤအဃိ ကမျၢၢ်ထံဖိကီၢ်ဖိသံပၥ်ဖှိၣ်အိၣ်ဝဲ(၁၃၅)ဂၤ,ဘၣ်ဒိဘၣ်ထံး (၂၇၀)ဂၤဒီး ကၠိ(၁၅)ဖျၢၣ်,သီခါဖၠၣ်(၁၃)ဖျၢၣ်,တၢ်ဘါယွၤသရိၥ်(၇)ဖျၢၣ်, တၢ်ဆါဟံၣ်(၁)ဖျၢၣ် ဒီးဟံၣ်တၢ်သူၣ်ထီၣ်(၅၆၄)ဖျၢၣ် ပၥ်ဖှိၣ်ခဲလၢၥ်(၆၀၀)ဟးဂီၤဝဲဒၣ်အဂ့ၢ်န့ၣ် (KPSN)စံးဝဲန့ၣ်လီၤ.
ဒီးဖဲန့ၣ်အကျါထဲဒၣ်တၢ်သံတၢ်ဘၣ်ဒိဘၣ်ထံးလီၤန့ၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃) သံ(၅၃)ဂၤ,ဘၣ်ဒိ(၆၅)ဂၤ/ ဘျံးဒဝဲၢ်ကီၢ်ရ့ၣ် (သုးက့ ၄) သံ(၃၁)ဂၤ,ဘၣ်ဒိ(၅၆)ဂၤ/ မုၢ်တြီၢ်ကီၢ်ရ့ၣ်(သုးက့ ၅) သံ(၆)ဂၤ,ဘၣ်ဒိ(၃၀)ဂၤ/ ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ ပူၤ ကမျၢၢ်သံ(၅)ဂၤ,ဘၣ်ဒိ(၆)ဂၤ/ တီအူကီၢ်ရ့ၣ်(သုးက့ ၂) သံ(၂)ဂၤ,ဘၣ်ဒိ(၇)ဂၤဒီး ဒူပျၥ်ယၥ်ကီၢ်ရ့ၣ် (သုးက့ ၆)ဟီၣ်ကဝီၤပူၤ သံ(၃)ဂၤ,ဘၣ်ဒိ(၂)ဂၤန့ၣ်လီၤ.
ဒ်န့ၣ်အသိးခီဖျိလၢကျိဖးဒိၣ်,ဒြိဒီးကဘီယူၤအံၤအဃိ ချၢၣ်လွံၢ်ထူၣ်ကီၢ်ရ့ၣ်ပူၤတၢ်သူၣ်ထီၣ်ဟးဂီၤ(၂၃၇)ဖျၢၣ်,ဘျံးဒဝဲၢ်ကီၢ်ရ့ၣ် (၂၁၅)ဖျၢၣ်, မုၢ်တြီၢ်ကီၢ်ရ့ၣ်(၇၆)ဖျၢၣ်,ဒူသထူၣ်ကီၢ်ရ့ၣ်(၄၅)ဖျၢၣ်,တီအူကီၢ်ရ့ၣ်(၁၄)ဖျၢၣ်ဒီး ဒူပျၥ်ယၥ်ကီၢ်ရ့ၣ်(၁၃)ဖျၢၣ်အဂ့ၢ်န့ၣ် (KPSN)စံးဝဲန့ၣ်လီၤ.
လၢတၢ်န့ၣ်အဃိကီၢ်ရ့ၣ်/သုးက့(၆)ဘ့ၣ်အံၤအကျါ ချၢၣ်လွံၢ်ထူၣ်ကီၢ်ရ့ၣ်,မုၢ်တြီၢ်ကီၢ်ရ့ၣ်ဒီးဘျံးဒဝဲၢ်ကီၢ်ရ့ၣ်(၃)ဘ့ၣ်အံၤ ဘၣ်ကွၢ် ဆၢၣ်မဲၥ်ဝဲ တၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအါကတၢၢ်လီၤဒီး ဘၣ်ဆၣ်မ့မ့ၢ်လၢဒူပျၥ်ယၥ်ကီၢ်ရ့ၣ်ခီန့ၣ် သဂၢၢ်ဘၣ်ဝဲ တၢ်သံတၢ်ဘၣ်ဒိဘၣ်ထံးစှၤဒိၣ်န့ၢ်ဒံးကီၢ်ရ့ၣ်လၢအဂၤတဖၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ကီၢ်ရ့ၣ်/သုးက့လၢအဂၤတၢ်ကဲထီၣ်သးတၢ်မၤနီၣ်တဖၣ်တၢ်ပၥ်ဖျါဝဲမ့အိၣ်ဘၣ်ဆၣ် လီၤဆီဒၣ်တၢ်မ့မ့ၢ်လၢဖၣ်အၣ်ကီၢ်ရ့ၣ်(သုးက့ ၇)ခီန့ၣ် ခီဖျိတဒိးန့ၢ်ဘၣ်ဝဲတၢ်ဂ့ၢ်တၢ်ကျိၤဘၣ်အဃိ တၢ်ကဲထီၣ်သးလၢ(၆)လါအတီၢ်ပူၤအံၤ တပၣ်ဃုၥ်ဝဲလၢ တၢ်မၤနီၣ်မၤဃါ တၢ်ပၥ်ဖျါအပူၤဘၣ်အဂ့ၢ်န့ၣ် (KPSN)စံးဝဲန့ၣ်လီၤ.
စးထီၣ်လၢ(၂၀၂၁)သုးဟံန့ၢ်တၢ်စိတၢ်ကမီၤတုၤဃီၤလၢ(၂၀၂၆)လါမးရှးအံၤ ကမျၢၢ်ထံဖိကီၢ်ဖိသံဘၣ်ဒိဘၣ်ထံး, တၢ်သူၣ်ထီၣ် ဟးဂီၤအနီၣ်ဂံၢ်ဟဲအါထီၣ်ကွ့ၢ်ကွ့ၢ်ဒီးလၢန့ၣ်အမဲၥ်ညါ လီၢ်ကဝီၤကမျၢၢ်ပှၤလီၢ်အိၣ်ကမှံဖိအနီၣ်ဂံၢ်စ့ၢ်ကီး အနီၣ်ဂံၢ် အိၣ်ထီၣ်တုၤ ဝဲလၢ (၂.၄) ခံကကွဲၢ်လွံၢ်ကလီၢ်ညါန့ၣ်လီၤ.လၢတၢ်န့ၣ်အဃိ ကမျၢၢ်ထံဖိကီၢ်ဖိလၢအဃ့ၢ်ထီၣ်တဖၣ်အဂီၢ် လိၣ်ဘၣ်ဝဲဂ့ၢ်ဂီၢ်အူ တၢ်ဆီၣ်ထွဲမၤစၢၤ(စ့ပၥ်ကီၤ)အဂ့ၢ်န့ၣ် (KPSN)စံးဝဲန့ၣ်လီၤ.
တကတီၢ်ဃီသုးမီၤစိရိၤလၢအလုၢ်သ့ၣ်ခါပတၥ်မၤကမၣ်ပှၤဟီၣ်ခိၣ်ဖိခွဲးယၥ်သ့ၣ်တဖၣ်အံၤကဆိကတီၢ်သးအဂီၢ် ထံဂုၤကီၢ်ဂၤကပတုၥ်ကွံၥ်တၢ်ဆါန့ၢ်ကျိချံပှၥ်သၣ်,ကဘီယူၤသိ,ကဟ့ၣ်အါထီၣ်ဝဲတၢ်ဆီၣ်သနံးဒီး ကဟ့ၣ်အါထီၣ်ဝဲခီကီၢ်ဆၢ တၢ်ဆီၣ်ထွဲမၤစၢၤလၢပှၤဃ့ၢ်မှံဟးဖျိးတဖၣ်အဂီၢ်အဂ့ၢ်န့ၣ် (KPSN)ဃ့ထီၣ်ဝဲလၢလံၥ်တၢ်ပၥ်ဖျါအပူၤအိၣ်ဝဲန့ၣ်လီၤ.
သုးမီၤစိရိၤအံၤစးထီၣ်လၢအဟံန့ၢ်တၢ်စိတၢ်ကမီၤဒီတကတီၢ်တုၤလၢခဲအံၤန့ၣ် သူဝဲဒၣ်ဒြိ,ကျိဖးဒိၣ်,ကဘီယူၤဟးခးလီၤတၢ်လၢ ကလုၥ်ဒူၣ်ဖီၣ်စုကဝဲၤကရူၢ်ကရၢတၢ်ပၢဟီၣ်ကဝီၤပူၤတပတုၥ်အသးအိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ.လၢတၢ်န့ၣ်အဃိ(KPSN),ကညီဂံၢ်ခီၣ်ထံးတၢ်ကရၢကရိအမဲၥ်ညါ ကလုၥ်ဒူၣ် ဂံၢ်ခီၣ်ထံးတၢ်ကရၢကရိလၢအဂၤတဖၣ် စ့ၢ်ကီးဃ့ထီၣ်ဝဲထံဂုၤကီၢ်ဂၤ လၢကပတုၥ်ကွံၥ်တၢ်ဆါန့ၣ် ကျိချံပှၥ်သၣ်,ကဘီယူၤ သိဒီးကဟ့ၣ်ဝဲတၢ်ဆီၣ်သနံး ဆူသုးမီၤစိရိၤအံၤလၢကျဲအကပၤကပၤ အိၣ်ဝဲတလီၢ်လီၢ်န့ၣ်လီၤ.
