လါအ့ဖြ့ၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်လီၢ်ဆၣ်အပူၤ ခီဖျိလၢသုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်အဃိ ဘၣ်သံဝဲ(Grade-8)ကၠိဖိမုၣ်တဂၤဒီး ဘၣ်ဒိဘၣ်ထံး(၅)ဂၤအကျါပၣ်ဃုၥ်ဝဲဖိသၣ်,မိၢ်ဒၢအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါဒီး လီၢ်ခၢၣ်သး(KECD)ထုးထီၣ်ပၥ်ဖျါစံးဝဲ န့ၣ်လီၤ.
ဖဲလါအ့ဖြ့ၣ် ၂၈ သီ မုၢ်ထူၣ် ၁၂း၅၅ မံးနံးအဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဖဲလီၢ်မုၢ်သီသဝီပူၤ တီၤထီကၠိ အခိၣ်အဃၢၤအဃိ ကၠိဖိမုၣ်နီၢ်အဲၣ်တူၢ်လိၥ်မူ(၁၆)နံၣ် အံၤသံဝဲအသိး ကၠိအံၤအဘီဒၢၣ်တၢ်သူၣ်ထီၣ်ဟးဂီၤစ့ၢ်ကီးဝဲ(၂)ဖျၢၣ် ဘၣ်ဟဲကဲထီၣ်ဝဲ ဒ်အံၤအဂ့ၢ်န့ၣ် (KECD)ပှၤဘၣ်မူဘၣ်ဒါစံးဝဲန့ၣ်လီၤ.
(KECD)ပှၤဘၣ်မူဘၣ်ဒါတဂၤစံးဝဲလၢ“ကဘီယူၤတဲတ့ၢ်လီၤတၢ်ဘျီဝဲအံၤလီၤတဲၥ်ဝဲလၢလီၢ်မုၢ်သီတီၤထီကၠိအခိၣ်အဃၢၤလီၤ. အဃိဘၣ်သံဝဲနီၢ်အဲၣ်တူၢ်လိၥ်မူ အဝဲန့ၣ်အအိၣ်(၁၆)နံၣ်ဒီးအိၣ်ဝဲ(Grade-8)လီၤ.တကးဒံးဘၣ်မ့ဝံၤဆၣ်နဲၣ်ကျဲဟံၣ်ဒွဲဟးဂီၤ (၂)ဖျၢၣ်.ဟံၣ်ဒွဲအခိၣ်ဒုး,အကပၤ,အဒူၣ်လီၤပှီၢ်ဟးဂီၤဝဲဒီဖျၢၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤခးလီၤဝဲလၢတၢ်လီၢ်(၄)တီၤအဃိ ကၠိဖိသံ,ဟံၣ်ဒွဲတၢ်သူၣ်ထီၣ်ဟးဂီၤအမဲၥ်ညါ ကမျၢၢ်ဘၣ်ဒိဝဲ(၅)ဂၤအကျါပၣ်ဃုၥ်ဝဲဖိသၣ်ဆံးဒီးမိၢ်ဒၢ,ပှၤဖၢစၢ်သ့ၣ်တဖၣ်အဂ့ၢ်န့ၣ် လၢၢ်ဒိၣ်ကီၢ်ဆၣ် ပဒိၣ်စီၤဝါမုၢ် စံးစ့ၢ်ကီးဝဲဒ်အံၤန့ၣ်လီၤ.
“ဒုၣ်ဒါကဘီယူၤဟဲခးလီၤတၢ်ခဲလၢၥ်န့ၣ်တၢ်လီၢ်(၄)တီၤ.ကၠိဖိလၢအသံတဂၤန့ၣ်အအိၣ်လၢအဟံၣ်,ဘၣ်လၢအစံၣ်လီၤအိၣ်လၢတၢ်ပူၤအခါလီၤတဲၥ်တီတီတၢ်ပူၤခိၣ်ထိးအဃိအသံမီၤနီၤ.အဘၣ်ဒိန့ၣ်(၅)ဂၤ ပှၤတဖၣ်အံၤပှၤကၠိဖိတပၣ်ဘၣ်. ပၣ်ဝဲဒၣ်ဖိသၣ်(၃)နံၣ်တဂၤ,ပှၤမိၢ်ဒၢတဂၤ,ဒီး ပှၤလၢအဂၤတဖၣ်န့ၣ်အါတက့ၢ်ပိၥ်ခွါလီၤ.မ့မ့ၢ်ကၠိဘီဒၢၣ်ဒုဟးဂီၤခံဖျၢၣ် .မ့မ့ၢ်ဟံၣ်တၢ်သူၣ် ထီၣ်ဒုဟးဂီၤအါမးလီၤဒုၣ်ဒါကဘီယူၤဟဲတ့ၢ်လီၤမ့ၣ်ပိၢ်ဘျီဝဲအံၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လီၢ်မုၢ်သီတီၤထီကၠိဟီၣ်ကဝီၤတၢ်လီၢ်လၢသုးမီၤစိရိၤဟဲတ့ၢ်လီၤဝဲမ့ၣ်ပိၢ်အံၤန့ၣ် တၢ်ဒုးတၢ်ယၤကဲထီၣ်တအိၣ်ဝဲဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဖဲလါအ့ဖြ့ၣ် ၃ သီ မ့အီၤလဲၤကဲထီၣ်ကီၢ်ခိၣ်ဝံၤလီၢ်ခံ တၢ်ဘံၣ်တၢ်ဘၢစှၤလီၤဝဲဒီးခီဖျိသုးမီၤစိရိၤပဒိၣ်အတၢ်မၤတပျုၥ်တပျီၤအံၤအဃိ ဒူသဝီကမျၢၢ်ဘၣ်သံဘၣ်ပှၢ်,ကဲထီၣ်ပှၤဃ့ၢ်မှံဟးဖျိး,ဘၣ်အိၣ်လၢတၢ်ဘၣ်ယိၣ်ဘၣ်ဘှီလၢကျဲအကပၤကပၤအဂ့ၢ်န့ၣ် (KECD) အလံၥ်တၢ်ပၥ်ဖျါအပူၤ စံးစ့ၢ်ကီးဝဲန့ၣ်လီၤ.
သုးမီၤစိရိၤအံၤစးထီၣ်လၢ(၂၀၂၁)ဟံန့ၢ်တၢ်စိတၢ်ကမီၤလီၢ်ခံတဆီဘၣ်တဆီန့ၣ်သူဝဲကဘီယူၤ,ကျိဖးဒိၣ်လဲၤတ့ၢ်လီၤဝဲမ့ၣ်ပိၢ်လၢ ကလုၥ်ဒူၣ်ဖီၣ်စုကဝဲၤတၢ်ပၢဟီၣ်ကဝီၤ ဒူသဝီ,ကၠိ,တၢ်ဘူၣ်တၢ်ဘါလီၢ်,တၢ်ဆါဟံၣ်အိၣ်ဝဲတပယူၥ်ဃီတုၤလၢခဲအံၤန့ၣ်လီၤ.
ဒ်လီၢ်ခၢၣ်သး(KECD)အတၢ်မၤနီၣ်မၤဃါပူၤအသိးန့ၣ် (၂၀၂၁)တုၤ(၂၀၂၅)လၢယဲၢ်နံၣ်အတီၢ်ပူၤ ခီဖျိလၢသုးမီၤစိရိၤအကျိဖးဒိၣ်,ဒြိဒီး ကဘီယူၤအံၤအဃိ ခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်အပူၤ ကၠိဖိသံဝဲ(၂၉)ဂၤ,ဘၣ်ဒိ(၇၈)ဂၤဒီးကၠိတၢ်သူၣ်ထီၣ်ဟးဂီၤလီၤပှီၢ် ဘၣ်ဒိဘၣ်ထံးဝဲ(၄၅)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
