လါယူၤလံ ၂၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ရၤမတံ(မၠၣ်ဝတံၣ်ဝ့ၢ်)ကလံၤထံး လ့က့ၣ်ကိၥ်ဟီၣ်ကဝီၤ ယဲကိ(ရဲကုန်း) တၢ်ဒုးအပူၤ ပယီၤသုးဖိ(၂)ဟဲက့ၤပၥ်လီၤစုကဝဲၤလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ်အဂ့ၢ်န့ၣ် သ့ၣ်ညါဘၣ်လၢ တၢ်ပၢၢ်ဆၢကရူၢ် အအိၣ် န့ၣ်လီၤ.
ဖဲမဟါလါယူၤလံ ၂၈ သီအနံၤန့ၣ် (စကခ-၁၃)စုတီၤဖီလၥ် ခီၣ်ချ့သုးရ့ၣ်(ခမရ-၅၅၇)သုးရ့ၣ်အပှၤဖိ ၂ ဂၤလၢအသးနံၣ်ကအိၣ်ဝဲ (၃၀)ခိၣ်ဃၢၤအံၤ ယူၥ်ထီၣ်ဝဲနီၣ်တယၢ်ဝါ ဟဲက့ၤပၥ်လီၤစုကဝဲၤလၢ(KNLA) သုးရ့ၣ်-၂၇ အအိၣ် ဟဲက့ၤစိၥ်ဃုၥ်ဝဲကျိ(၃)ခိၣ်ဃုၥ်ဒီး အချံအသၣ်,ကျိဒိၣ်အချံသ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးပယီၤသုးအတၢ်ဟဲက့ၤပၥ်လီၤစုကဝဲၤဒီး လီၢ်ခံကတၢၢ်ဒုးယၤတၢ်အိၣ်သးအံၤန့ၣ် (KNLA)ပှၤဘၣ်မူဘၣ်ဒါလၢအိၣ် တၢ်မဲၥ်ညါတဂၤစံးဝဲ“ဒ်ပယီၤသုးဖိလၢအဟဲက့ၤပၥ်လီၤစုကဝဲၤတဖၣ်တဲဝဲအသိးန့ၣ် ပယီၤသုးအံၤတၢ်ဘၣ်အဝဲသ့ၣ်ဖးနးလံ. သုးရ့ၣ်ခိၣ်ကဒဲကဒဲတဲလိၥ်သးလၢ အဝဲသ့ၣ်တအဲၣ်ဒိးဆဲးထီၣ်ဝဲဆူညါလၢၤဘၣ်. ပယီၤသုးကျိၤဟးဂီၤဒီတဘိလီၤ. အဝဲသ့ၣ်ဘၣ်ဒိ ဘၣ်ထံးအါအဃိပၢၢ်တုၤလၢ က့ၤစိၥ်လီၤပှၤစိၣ်တသ့လၢၤဘၣ် ဘၣ်ပၥ်တ့ၢ်ဝဲဒ်န့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ပယီၤသုးဖိလၢအဟဲက့ၤဟ့ၣ်လီၤသးစုကဝဲၤ(၂)ဂၤအံၤန့ၣ် မ့ၢ်ဝဲသုးဖိသီဒီး အဝဲသ့ၣ်အံၤလၢအတၢ်ဟဲက့ၤဟ့ၣ်လီၤသးအဖီခိၣ် (KNLA) သုးရ့ၣ်-၂၇ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤ ဟ့ၣ်လီၤမၤစၢၤဝဲစ့အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကထီၣ်ဒိၣ်စိက့ၤမၠၣ်၀တံၣ်-ဂီၤလ့ၤကျဲအဂီၢ် စးထီၣ်လၢလါယူၤလံထီၣ်အံၤန့ၣ် ပယီၤသုးပၥ်ဖှိၣ်လၢအဟဲထီၣ်ဟူးဂဲၤ တဖၣ်အံၤ ဒီး ဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်ဝဲကိးမုၢ်နံၤဒဲးဃၣ်ဃၣ်အသိး လၢတၢ်ဒုးဒီတကတီၢ်အပူၤစ့ၢ်ကီး ပယီၤသုး တကပၤသံဘၣ်ဒိဘၣ်ထံးဝဲအါမးဒီး တနီၤန့ၣ်တူၢ်ဝဲတန့ၢ်ဃ့ၢ်ဖျိးထီၣ်ကွံၥ်ဝဲအိၣ်န့ၣ်လီၤ.
လၢတၢ်န့ၣ်အဃိ ဘၣ်ဃးပယီၤသုးအတၢ်ဟဲက့ၤပၥ်လီၤစုကဝဲၤအံၤ ဖဲအပူၤကွံၥ်လါယူၤလံ ၁၀ ဘျဲၣ်အခါ ပယီၤသုးဖိသီလၢ အဃ့ၢ်ဖျိးထီၣ်လၢတၢ်ဒးအပူၤ(၃)ဂၤ တၢ်ပၢၢ်ဆၢသုးကရူၢ်ဖီၣ်န့ၢ်ဝဲအသိး ဖဲ ၂၆ သီအနံၤစ့ၢ်ကီး ဟဲက့ၤပၥ်လီၤစုကဝဲၤ(၆)ဂၤ ဒံးအဂ့ၢ် န့ၣ် တၢ်ပၢၢ်ဆၢသုးကရူၢ်(ကျားသစ်နက်)သုးကျိၤ ထုးထီၣ်ပၥ်ဖျါဝဲအိၣ်န့ၣ်လီၤ.
တကီၢ်ခါခဲအံၤလၢရၤမတံကလံၤထံးဟီၣ်ကဝီၤအပူၤ ပယီၤသုး, ဘူးဒးကညီသုးမုၢ်ဒိၣ်(DKBA) သုးခိၣ်ဘိၤဘံၣ်အပှၤ, (BGF)သုးခိၣ်စီၤမိၣ်သိၤ အပှၤဒီး ဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲအဖၢမုၢ်န့ၣ်လီၤ.