လါယူၤလံ ၂၉ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖလူဒီးလ့က့ၣ်ကိၥ်ဟီၣ်ကဝီၤအပူၤ စးထီၣ်ဖဲတလါအံၤလါယူၤလံထီၣ်အံၤန့ၣ် တၢ်ဒုးက့ၤကဲထီၣ် ကဒါဝဲလၢဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီး ပယီၤသုးအဘၢၣ်စၢၤဒိၣ်ဒိၣ်မုၢ်မုၢ်ဒီး တုၤလၢခဲအံၤ တၢ်ဒုးဆဲး ကဲထီၣ်ဒံးဝဲအဖၢမုၢ်န့ၣ်လီၤ.
ဒ်န့ၣ်အသိးဖလူဟီၣ်ကဝီၤလၢဒုးယၤတၢ်သဘံၣ်သဘုၣ်ကဲထီၣ်အံၤန့ၣ်အိၣ်ဝဲဒၣ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ် ဒိၣ် (DKBA) တၢ်ပၢဟီၣ်ကဝီၤအပူၤန့ၣ်လီၤ.
ဖဲလါယူၤလံ ၂၇ သီအနံၤစ့ၢ်ကီး ကၠီးခဲးဟီၣ်ကဝီၤလၢကၠါဖၠၣ်တၢ်ဖံးတၢ်မၤအိၣ်ဝဲအလီၢ်လၢအမ့ၢ်စ့ၢ်ကီးဝဲ(DKBA)တၢ်ပၢဟီၣ်ကဝီၤ အံၤ ပယီၤသုးနုၥ်လီၤဖီၣ်ဝဲတၢ်ဒီး ဖဲန့ၣ်ဖီၣ်န့ၢ်ဝဲထံဂုၤကီၢ်ဂၤအထံဖိကီၢ်ဖိဃုၥ်ဒီးတရူးထံဖိကီၢ်ဖိပၥ်ဖှိၣ်ခဲလၢၥ်(၇၇၇)ဂၤဒံးအဂ့ၢ်န့ၣ် သုးမီၤစိရိၤထုးထီၣ်ပၥ်ဖျါဃၥ်ဝဲအိၣ်န့ၣ်လီၤ.
ဟီၣ်ကဝီၤဖဲန့ၣ်အပူၤ ဒုးယၤတၢ်ဖ့ၣ်စၢဟဲက့ၤအိၣ်ထီၣ်ကဒါဒီး တၢ်နုၥ်လီၤဖီၣ်ကၠါဖၠၣ်တၢ်ဖံးတၢ်မၤလီၢ်ကဲထီၣ်ဝံၤလီၢ်ခံ ဖဲတနံၤအံၤ လါယူၤလံ ၂၉ သီ အံၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်((DKBA) ထုးထီၣ်ပၥ်ဖျါဝဲလံၥ်တၢ်နဲၣ်လီၤတဘ့ၣ်လၢ အပှၤသုးဖိသံၣ်ဖိအဂီၢ် ဟဲအိၣ်ထီၣ်ဝဲဒၣ်န့ၣ်လီၤ.
ဒ်လံၥ်တၢ်နဲၣ်လီၤအပူၤပၥ်ဖျါဝဲအသိးန့ၣ် ဘၣ်ဃးဖလူဟီၣ်ကဝီၤလၢဒုးယၤတၢ်သဘံၣ်သဘုၣ်ကဲထီၣ်အံၤန့ၣ် တၢ်ဖီလၥ်သုးဖိသံၣ်ဖိ တဖၣ်တဘၣ်နုၥ်လီၤပၣ်ဃုၥ်ပၣ်ဂီၢ်မၤဘၣ်ထွဲသးဘၣ်ဒီး မ့နုၥ်လီၤပၥ်ဃုၥ်ပၣ်ဂီၢ်မၤဘၣ်ထွဲသးန့ၣ် ကဟံဝဲအရ့တဲၥ်တဲၥ်ဖျုဖျု အဂ့ၢ်န့ၣ် ဟ့ၣ်ပလီၢ်ဝဲဒၣ် န့ၣ်လီၤ.
ဘၣ်ဆၣ်မ့ဘၣ်ကွၢ်လၢလံၥ်တၢ်နဲၣ်လီၤတၢ်ပၥ်ဖျါအံၤအပူၤန့ၣ် ပှၤသုးဖိသံၣ်ဖိတဘၣ်နုၥ်လီၤမၤဘၣ်ထွဲသးဒီး ကရူၢ်ဖဲလဲၣ် တဒူၣ်လဲၣ်ခီန့ၣ် ပၥ်ဖျါဝဲဆှဲဆှဲလဲလဲတအိၣ်ဝဲဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤဒ်သိးကသ့ၣ်ညါဘၣ်တၢ်ဂ့ၢ်တၢ်ကျိၤလီၤတံၢ်လီၤဆဲးအဂီၢ်န့ၣ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးသံကွၢ်ဝဲ (DKBA)ခိၣ်နၢ်ပှၤဘၣ်မူဘၣ်ဒါဘၣ်ဆၣ် စံးဆၢကဒါဝဲတအိၣ်နီမံၤဒံးဘၣ် န့ၣ်လီၤ.
