လါယူၤလံ ၁၀ သီ, ၂၀၂၆ နံၣ်, ခ့ၣ်အဲးစံၣ်
ဘံလ့ဝ့ၢ် ဘုလိၥ်ကျိဝၢ်ခီ ဒီၣ်ယၣ်ကရူၢ်ဒီး ကဒံၣ်ပူၤကရူၢ်လၢအိၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်ပူၤ အံၤ ဖဲပယီၤသုးကျိၤနုၥ်လီၤဟူးဂဲၤအခါ ဒွဲၣ်အူအီၣ်ကွံၥ်ဝဲကမျၢၢ်ဟံၣ်,သိလ့ၣ်အမဲၥ်ညါ ဖီၣ်က့ၤကိးဝဲကမျၢၢ်(၁)ဂၤ ဒီးက့ၤစိၥ် ဃုၥ်ဝဲသိလ့ၣ်တစှၤန့ၢ်(၁၀)ခိၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤလံ ၅ သီဒီး ၆ သီအနံၤ ပယီၤသုးတြိၤ(၄၄)စုတီၤဖီလၥ် ခီၣ်သုးရ့ၣ်(ခလရ-၈), နီၣ်ဂံၢ်(၃၁၄)အမျိၥ် သုးရ့ၣ် ဒီး (ဗျူစောထီး)သုးပၥ်ဖှိၣ်အဂၤ(၁၀၀)ဘျဲၣ် ဟဲထီၣ်ဒီးနုၥ်လီၤဝဲလၢဒီၣ်ယၣ်ကရူၢ် ကၠဲးတူၣ်ကိသဝီဒီး ကဒံၣ်ပူၤကရူၢ် ကၠဲးကၠံၣ်ခးသဝီအပူၤ တၢ်ဒုးကဲထီၣ်ဝဲဒီးဟီၣ်ကဝီၤ(KNLA) သုးရ့ၣ်-၂ အပှၤဝံၤ ပညိၣ်ဃုၥ်ဝဲကမျၢၢ်လၢအတၢ်ကမၣ် တအိၣ် ဘၣ်ဘၣ်ဟဲအိၣ်ထီၣ်ဝဲဒ်အအံၤအသိးန့ၣ်လီၤ.
ပယီၤသုးပၥ်ဖှိၣ်တဖၣ်အံၤဖဲဝဲသ့ၣ်ဟဲထီၣ်နုၥ်လီၤသဝီပူၤအခါ ဒွဲၣ်အူအီၣ်ကွံၥ်ဝဲ ကၠဲးတူၢ်ကိသဝီ-ကၠဲးကၠံၣ်ခးသဝီဘၢၣ်စၢၤ ကမျၢၢ်ဟံၣ်(၆)ဖျၢၣ်လၢအဘၣ်တၢ်တ့ထီၣ်တ့ၢ်အီၤဖဲတၢ်စဲလီၤထံကီၢ်ဒီဘ့ၣ်တၢ်ပတုၥ်တၢ်ခး(NCA)ဆၢကတီၢ်အခါအံၤဒီး တကးဒံးဘၣ် ဟံဆူၣ်က့ၤစိၥ်ဃုၥ်ဝဲကမျၢၢ်အတၢ်ဖိတၢ်လံၤ,သိၣ်လ့ၣ်အါမးလၢအပၣ်ဃုၥ်ဝဲ(လဲၤစ့ၤ)သိလ့ၣ်သ့ၣ်တဖၣ်န့ၣ်လီၤ.
ဒ်ခ့ၣ်အဲၣ်ယူၣ်တၢ်မၤနီၣ်ပူၤအိၣ်ဝဲအသိးန့ၣ် ဟံၣ်(၆)ဖျၢၣ်လၢတၢ်ဒွဲၣ်အူအီၣ်ဝဲတဖၣ်န့ၣ် ဟံၣ်တၢး(၃)ဖျၢၣ်, ဟံၣ်ဝၣ်(၂)ဖျၢၣ်, ဟံၣ်သ့ၣ်(၁)ဖျၢၣ် ဒီး ဟံၣ်ကစၢ်န့ၣ်မ့ၢ်ဝဲ မၣ်အ့မံၣ်စၤ, မၣ်နဒၤမၠ့ၣ်, မၣ်မဲယိလ့, စီၤဖါသူဒံၣ်, အီၤကိၤကိၤမၠ့ၣ်, စီၤပျီၢ်ဖီ သ့ၣ်တဖၣ်အံၤအဟံၣ်ဒီး လၢန့ၣ်အမဲၥ်ညါစိဃုၥ်ဝဲကၠဲးတူၢ်ကိသဝီဖိ နါမိမိ အကျးဆါတၢ်ပူၤ တၢ်ဖိတၢ်လံၤသ့ၣ် တဖၣ် န့ၣ်လီၤ.
တကးဒံးဘၣ်ပယီၤသုးအံၤဒွဲၣ်အူကမျၢၢ်ဟံၣ်,စိၥ်ဃုၥ်ဝဲတၢ်ဖိတၢ်လံၤအမဲၥ်ညါ ဒွဲၣ်အူအီၣ်စ့ၢ်ကီးကမျၢၢ်အသိလ့ၣ်(၂)ခိၣ်ဒီး က့ၤစိၥ်ဝဲ သိလ့ၣ်တီၣ်ပနံၥ်တၢ်ဖိတၢ်လံၤဃုၥ်ဒီးဟံၣ်သိလ့ၣ်ကအိၣ်လၢအခိၣ်(၁၀),အခိၣ်(၁၀)ဘျဲၣ်ညါအဂ့ၢ်န့ၣ် ဒူသဝီ ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးပယီၤသုးအံၤဖဲအဝဲသ့ၣ်နုၥ်လီၤလၢသီပူၤအခါ ဖီၣ်မၤဒၢၣ်စ့ၢ်ကီးဝဲကမျၢၢ်ပှၤနီပနံၥ်တၢ်ဖိတၢ်လံၤသိလ့ၣ်ကစၢ် ဃုၥ်ဒီး ကမျၢၢ်လၢအဂၤတစှၤန့ၢ်(၄)ဂၤဘၣ်ညါဒီး ပှၤသ့ၣ်တဖၣ်အံၤပျၢ်လီၤက့ၤဝဲတနံၤဃီဖဲန့ၣ်ဘၣ်ဆၣ် မ့မ့ၢ်ကမျၢၢ် လၢအခိၣ်နူၥ် တမၤတၢ်မၤအါအါဘၣ်တဂၤအံၤခီန့ၣ် ပယီၤသုးဖီၣ်က့ၤကိးဝဲတုၤလၢခဲအံၤတၢ်ပျၢ်လီၤက့ၤတဲတအိၣ်ဒံးဘၣ် အဂ့ၢ်န့ၣ် သ့ၣ်ညါ ဘၣ်န့ၣ် လီၤ.
ဘၣ်ဃးပယီၤသုးအတၢ်နုၥ်လီၤဒွဲၣ်အူအီၣ်ကမျၢၢ်ဟံၣ်,ဟံကမျၢၢ်တၢ်ဖိတၢ်လံၤ,သိလ့ၣ်ဒီးဖီၣ်က့ၤ ကိးဝဲကမျၢၢ်တၢ်ဂ့ၢ်အံၤန့ၣ် ဒူသဝီပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤစံးဝဲလၢ“ပှၤသဝီဖိလၢပယီၤသုးဖီၣ်အီၤခဲအံၤတဂၤန့ၣ် အမံၤလၢ ခိၤထဲၣ်အူ အသးနံၣ်အိၣ်(၃၈)နံၣ်(၄၀)နံၣ်အခိၣ်အဃၢၤလီၤ. အဝဲန့ၣ်မၤသးအခိၣ်နူၥ်တပှဲၤအါအါဘၣ်. ခဲအံၤမ့ၢ်ပှၤက့ၤကိး ပှၤလဲၤ ပၥ်အီၤ ဖဲလဲၣ်န့ၣ်အဟံၣ်ဖိဃီဖိတသ့ၣ်ညါဝဲဘၣ်”အဂ့ၢ်န့ၣ် စံးဝဲန့ၣ်လီၤ.
ကၠဲးတူၢ်ကိသဝီ-ကၠဲးကၠံၣ်ခးသဝီဘၢၣ်စၢၤ အပူၤကွံၥ်လါယူၤလံ ၅ သီ ဒီး ၆ သီ ပယီၤသုးဒီးဟီၣ်ကဝီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်လၢခံသီအတီၢ်ပူၤအခါန့ၣ် ပယီၤသုးတကပၤသံဝဲ(၅)ဂၤ, ဘၣ်ဒိဘၣ် ထံး (၉)ဂၤ တကးဒံးဘၣ် တၢ်မၤန့ၢ်ဝဲပယီၤသုးအသိလ့ၣ်(၃)ခိၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်လၢ(သုးက့)ပှၤဘၣ်မူဘၣ်ဒါ န့ၣ်လီၤ.
ဒီးပယီၤသုးအံၤခီဖျိလၢတၢ်သံတၢ်ဘၣ်ဒိဘၣ်ထံးအါအဃိ ဖဲလါယူၤလံ ၆ သီ ဟါခီအဆၢကတီၢ် ဂုၤကဒါလီၢ်ခံလံအဖီခိၣ် တကီၢ်ခါခဲအံၤဒူသဝီကမျၢၢ်လၢအဃ့ၢ်ထီၣ်သ့ၣ်တဖၣ်ဟဲက့ၤအိၣ်လၢအဟံၣ်အဃီအိၣ်ဝဲတနီၤလံဘၣ်ဆၣ် ဘၣ်အိၣ်ဒံးဝဲ လၢတၢ်ပလီၢ်ပဒီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
