လါအီကူး ၁၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ကရူၢ်(၂)ဘ့ၣ် (၃)သီအတီၢ်ပူၤ ကဘီယူၤအဃိ ကမျၢၢ်သံဘၣ်ဒိဘၣ်ထံးဝဲ(၇)ဂၤဒီး တၢ်သူၣ်ထီၣ်ဟးဂီၤပၥ်ဖှိၣ်အိၣ်ဝဲ(၅၈)ဖျၢၣ်အဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ်မူ ဘၣ်ဒါန့ၣ်လီၤ.
ဒွဲၣ်လိကီၢ်ဆၣ်အပူၤ လါအီကူးထီၣ် ၃ သီ, ၅ သီ ဒီး ၆ သီအနံၤ ကဘီယူၤလဲၤတ့ၢ်လီၤဝဲ မ့ၣ်ပိၢ်လၢ ထံသဘျုၣ်ထၣ် ကရူၢ် ထံလီၤသံးထၣ်သဝီ, ဘီသိၣ်ထၣ်သဝီ, ထီးမဲထၣ်သဝီ, ထံသဲလ့သဝီ ဒီး လ့ခီၣ်ထံးကရူၢ် ဒဲထၣ်သဝီ, ထံဘီလီၥ်သဝီ, ဆၢၣ်ရံၥ်ကၠိသဝီ သ့ၣ်တဖၣ်အံၤအပူၤန့ၣ်လီၤ.
လၢကဘီယူၤအတၢ်လဲၤခးလီၤတၢ်အံၤအဃိ ကရူၢ်ခံဘ့ၣ်အံၤ(၃)သီအတီၢ်ပူၤ ကမျၢၢ်သံ(၃)ဂၤအကျါပၣ်ဃုၥ်ဖိသၣ်(၆)နံၣ်တဂၤဒီး ဘၣ်ဒိဘၣ်ထံးဝဲ နးနးကျံၤကျံၤ(၄)ဂၤဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
တကးဒံးဘၣ်ကမျၢၢ်သံဘၣ်ဒိဘၣ်ထံးအမဲၥ်ညါ ကမျၢၢ်ဟံၣ်(၅၆)ဖျၢၣ်,သီခါဖၠၣ်တၢ်သူၣ်ထီၣ်(၂)ဖျၢၣ်ဒီး သိလ့ၣ်ယီၢ်(၁)ခိၣ် ဘၣ်ဒိဘၣ်ထံးဟးဂီၤဝဲအသိး ထိးသံဃုၥ်စ့ၢ်ကီးဝဲ(၁)ဒုအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါအတၢ်မၤနီၣ်မၤဃါပူၤအသိး သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်(သုးက့ ၅)တၢ်ပၢဟီၣ်ကဝီၤအပူၤ လၢကထီၣ်ဒိၣ်စိမၤန့ၢ်က့ၤတၢ်လီၢ်လၢအဘၣ်ဟ့ၣ်ဆှူဃၥ်ဝဲသ့ၣ်တဖၣ်အံၤအဂီၢ် စးထီၣ်လၢလါမ့ၤ ပယီၤသုးအံၤသူဝဲဒၣ်အဂံၢ်အဘါနၢၤနၢၤအမဲၥ်ညါသူစ့ၢ်ကီးဝဲတၢ်ဟူးတၢ်ဂဲၤလၢကလံၤကျါအိၣ်ဝဲကိးမုၢ်နံၤဒဲး အဆၢတတဲၥ်ဝဲဘၣ်န့ၣ်လီၤ.
ဒီးစးထီၣ်လၢပယီၤသုးအတၢ်ဟဲထီၣ်ဟူးဂဲၤလၢ(၃)လါဘျဲၣ်အတီၢ်ပူၤအံၤ ကမျၢၢ်သံဘၣ်ဒိဘၣ်ထံး,တၢ်ဟးဂူၥ်ဟးဂီၤကဲထီၣ်မ့အိၣ် ဘၣ်ဆၣ် စးထီၣ်ဖဲလါအီကူးထီၣ်အံၤန့ၣ် လီၢ်ကဝီၤကမျၢၢ်လၢအိၣ်ဘူးလိၥ်သးဒီးပယီၤသုးလဲၤထီၣ်ဟူးဂဲၤလီၢ်အခိၣ်အဃၢၤ တဖၣ်အမဲၥ်ညါ ကမျၢၢ်လၢအိၣ်စီၤစုၤယံၤဒီးအဝဲသ့ၣ်တဖၣ်စ့ၢ်ကီး ဘၣ်ကွၢ်ဆၢၣ်မဲၥ်ဝဲတၢ်သံတၢ်ဘၣ်ဒိဘၣ်ထံးဟဲအိၣ်ထီၣ်ဝဲ တပယူၥ်ဃီအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ စံးဝဲန့ၣ်လီၤ.
တကီၢ်ခါခဲအံၤ ပယီၤသုးလၢအတုၤအိၣ်ဖဲကတၢတံၥ်ကရူၢ်ပူၤအံၤတဖၣ်ဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ်အဘၢၣ်စၢၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤကိးမုၢ်နံၤဒဲးဃၣ်ဃၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.