လါအီကူး ၁၀သီ, ၂၀၂၆နံၣ်, ခ့ၣ်အဲးစံၣ်.
ခါလၢကဟဲလါအီးကူၥ်, (၁၂)သီအနံၤအံၤမ့ၢ်ဝဲ ပကညီမၤထူရၤပှဲၤထီၣ်ဝဲ(၇၆)ဝီတဝီဒီး ပဝဲကညီဖိတဖၣ် အလီၢ်အိၣ်လၢ ပကဘၣ်သ့ၣ်နီၣ်ထီၣ်က့ၤ ပမၤထူရၤလၢအလဲၤပူၤကွံၥ်သ့ၣ်တဖၣ်ဒီး အံးထွဲကွၢ်ထွဲ ကဟုကယၥ်က့ၤ မၤထူရၤဟံၣ်ဖိဃီဖိလၢ အိၣ်လီၤတဲၥ်သ့ၣ်တဖၣ်ဒီး ဟံးထီၣ်ဖီၣ်ထီၣ်မူဒါလၢ အိၣ်လီၤတဲၥ်တ့ၢ်သ့ၣ်တဖၣ်ဒ်သိး မၤလၢထီၣ်ပှဲၤထီၣ်က့ၤ လီၢ်ခၢၣ်သး-ကညီပိၥ်မုၣ်ကရၢထုးထီၣ်ပၥ်ဖျါဆီၣ်သခူထီၣ်ဝဲဒၣ်န့ၣ်လီၤ.
မ့ၢ်တုၤဃီၤ လၢမၤထူရၤမုၢ်နံၤဒီး ပအိၣ်သ့ၣ်နီၣ်ဘၣ်ပခိၣ်နၢ်သိၣ်ဒူး လၢလုၢ်ထီၣ်သးသမူတဖၣ် တကးဘၣ်အမဲၥ်ညါ ပအိၣ်သ့ၣ်နီၣ်ဘၣ်ဃုၥ်ဒီး ပပှၤကလုၢ်ကမျၢၢ်လၢ ဆၢထၢၣ်ဃုၥ်ဒီး ပကညီတၢ်ပၢၢ်ဆၢလၢ ဘၣ်တၢ်မၤသံအီၤလၢ သုးမီၤစိရိၤတဖၣ်စ့ၢ်ကီး မ့ၢ်ဝဲဒၣ် မၤထူရၤန့ၣ်လီၤအဂ့ၢ် ကညီပိၥ်မုၢ်ကရၢခိၣ် သရၣ်မုၢ်နီၣ်ကညီဖီစံးဝဲဒၣ်န့ၣ်လီၤ.
အဝဲစံးဝဲလၢ ” ပမ့ၢ်တဲမၤထူရၤန့ၣ် ပတသ့ၣ်နီၣ်ထဲလၢပသုးမုၢ်သံၣ်ဘိဘၣ် မ့မ့ၢ်တခီပအိၣ်းသ့ၣ်နီၣ်ဘၣ် ပပှၤကမျၢၢ်လၢအဆၢၣ်ထၢၣ်သဃဲၤတၢ်ဒီး ပကညီတၢ်ပၢၢ်ဆၢ လၢဘၣ်တၢ်မၤသံအီၤလၢ သုးမီၤစိရိၤတဖၣ်ဒီး အဝဲသ့ၣ်တဖၣ်မ့ၢ်ဝဲဒၣ်မၤထူရၤစ့ၢ်ကီးန့ၣ်လီၤ. လၢတၢ်န့ၣ်အဃိ ပမ့ၢ်တဲလီၤပသးလၢပအဲၣ်ကညီဒီး ပကဘၣ်အိၣ်သ့ၣ်နီၣ်ဘၣ်ပမၤထူရၤ, ဟံးထီၣ်ဖီၣ်ထီၣ်က့ၤမူဒါလၢအိၣ်လီၤတဲၥ်သ့ၣ်တဖၣ်, ပကဘၣ်မၤဖျါထီၣ်က့ၤပမၤထူရၤအတၢ်မိၣ်န့ၢ်သးလီဒ်အမ့ၢ် မုၢ်တနံၤပအိၣ်ဒီးထံသဘျ့ကီၢ်သဘျ့ ဒ်ပှၤတကလုၥ်အသိးဒီး ပကအိၣ်သ့ၣ်နီၣ်အံးထွဲကွၢ်ထွဲစ့ၢ်ကီးပမၤထူရၤသ့ၣ်တဖၣ် အဟံၣ်ဖိဃီဖိလၢအိၣ်လီၤတဲၥ်တ့ၢ်အဂ့ၢ်န့ၣ်လီၤ.” စံးဝဲဒၣ်န့ၣ်လီၤ.
ဒ်န့ၣ်အသိး တကီၢ်ခါခဲအံၤ မုၣ်ကမဲ ဖိၣ်ဃဲ မၤထူရၤဟံၣ်ဖိဃီဖိတဖၣ် အိၣ်တ့ၢ်ဝဲဒၣ်အါမးဒီး ပတကြးလဲၤကပၤအဝဲသ့ၣ်တဖၣ်ဘၣ် မ့မ့ၢ်တခီ မူဒါအိၣ်လၢ ပဝဲကိးဂၤဒဲးအစုပူၤ လၢပကဘၣ်ဆီၣ်ထွဲမၤစၢၤအဝဲ ဟ့ၣ်ဂံၢ်ဟ့ၣ်ဘါ လၢခါဆူညါအတၢ်လဲၤကျဲအဂီၢ်အဂ့ၢ် တဲအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါ ပဝဲကညီကလုၥ်အံၤ ပမ့ၢ်စံးလီၤပသးလၢပအဲၣ်ပပှၤကလုၥ်န့ၣ်ဒီး ပကဘၣ်မၤပပှၤကလုၥ်တၢ်ဖံးတၢ်မၤန့ၣ်လီၤ. ဘၣ်ဆၣ် ပမ့ၢ်တမၤပပှၤလုၥ်တၢ်ဖံးတၢ်မၤဘၣ်ဒီး မ့ၢ်ဒၣ်ပလီလီၤပနီၢ်ကစၢ်သးဒီး ပတပၥ်လုၢ်ပၥ်ပှ့ၤပပှၤကလုၥ်ဘၣ်(KWO)ပၥ်ဖျါဝဲဒၣ်လၢအလံၥ်ဟ့ၣ်ယုၢ်အပူၤန့ၣ်လီၤ.
လၢတၢ်န့ၣ်အဃိ ခါလၢကဟဲလါအီကူၥ်(၁၂)သီ ကညီမၤထူရၤမုၢ်နံၤပှဲၤထီၣ် (၇၆) ဝီတဝီအံၤ ပကအိၣ်သ့ၣ်နီၣ်ထီၣ်က့ၤ ပပှၤကလုၥ်ခိၣ်နၢ် သိၣ်ဒူဒီးထံဖိကီၢ်ဖိလၢ လုၢ်ထီၣ်သးသမူတဖၣ်အဂ့ၢ်ဒီး ပဟံးထီၣ်ဖီၣ်ထီၣ်က့ၤ ပတၢ်ပၢၢ်ဆၢတၢ်ဖံးတၢ်မၤလၢ ခါဆူညါ ပဖိပလံၤတဖၣ် ကအိၣ်ဘၣ်ဒ်သိးပှၤတကလုၥ်အသိးဒီး ကထူၣ်ဖျဲးထီၣ်လၢ သုးမီၤစိရိၤတၢ်ပၢဆူၣ်ပၢစိးကလုၥ်ဒိၣ်စိသနူအဖီလၥ်အဂ့ၢ်ဆီၣ်သခူစ့ၢ်ကီးဝဲဒၣ်န့ၣ်လီၤ.
ဒ်န့ၣ်အသိး လၢပပှၤကလုၥ်တၢ်ပၢၢ်ဆၢကမၤနၢၤတၢ်အဂီၢ် ကညီဖိလၢထံဂုၤကီၢ်ဂၤတဖၣ် ကကတိၤခဲးန့ၢ်တၢ်လၢပပှၤကလုၥ်ဂီၢ် ဒီး ဒ်သိးထံဂုၤကီၢ်ဂၤပဒိၣ်တဖၣ် ကဟ့ၣ်တၢ်ဆီၣ်သနံးလၢ ပယီၤသုးမီၤစိရိၤအိၣ်ဒီး ပဝဲကညီကလုၥ်လၢထံလီၢ်ကီၢ်ပူၤ ဒီး ကီၢ်ဆၢတဖၣ် ပကဘၣ်ပၥ်ဖှိၣ်မၤသကိးတၢ်လၢ ပပှၤကလုၥ်တၢ်ပၢၢ်ဆၢဂီၢ်ဒီး မၤလိသ့ထီၣ်ပဖိပလံၤသ့ၣ်တဖၣ်လၢ တၢ်သ့တၢ်ဘၣ်အကလုၥ်ကလုၥ်တုၤပတၢ်မၤနၢၤတစုအဂ့ၢ် (KWO)စံးဝဲဒၣ်န့ၣ်လီၤ.
