လါအီကူၥ် ၁၃သီ, ၂၀၂၆နံၣ်, ခ့ၣ်အဲးစံၣ်,
ပှၤဟံးန့ၢ်ဆူၣ် ကီၢ်ပယီၤထံကီၢ်တၢ်စိကမီၤ သုးကရူၢ် အခိၣ် မ့အီၣ်လဲၣ် အတၢ်လဲၤထံၣ်လိၥ်သးဒီး ကၠီၣ်တဲၣ် ထံကီၢ် ခိၣ် နၢ်တဖၣ်အခါဃ့ထီၣ်ဝဲ လၢ တၢ်ကမၤဃံးထီၣ်ဝဲ ခီကီၢ်ဆၢ တၢ်စိၥ်ဆှၢစုကဝဲၤပီးလီဒီး မၤဃံးထီၣ်တၢ်သမံသမိး အဂ့ၢ်, သ့ၣ်ညါဘၣ်န့ၣ်လီၤ.
လၢကီၢ်ကၠီၣ်တဲၣ်ကိတိၥ်ခိၣ်ကျၢၢ်(Anutin Charnvirakul) အတၢ်ကွဲမုၥ်တဆီ, အပူၤကွံၥ် လါအီကူၥ် (၆) သီအပူၤ သုးကရူၢ်အခိၣ် မ့အီၣ်လဲၣ် လဲၤတ့ၢ်ဝဲဆူဘီကီၢ်ဝ့ၢ် ဒီး တၢ်ထံၣ်လိၥ်တၢၣ်ပီၣ်အပူၤ ဃ့ထီၣ်ဝဲလၢ တၢ်ကကး တံၥ်ကွံၥ်ဝဲ ထံဆၢကီၢ်ဆၢ တၢ်စိၥ်ဆှၢစုကဝဲၤပီးလီဒီး မၤဃံးထီၣ်တၢ်သမံသမိးအဂ့ၢ်, တၢ်ထံၣ်လိၥ်အိၣ်သကိးဝံၤ အ လီၢ်ခံ (Anutin) ကတိၤပၥ် ဖျါထီၣ်ဝဲလၢ ကၠီၣ်တဲၣ် တၢ်ကစီၣ်သန့ တဖၣ်အပူၤန့ၣ်လီၤ.
(Anutin) ကတိၤပၥ်ဖျါဝဲဒၣ်လၢ “မ့အီၣ်လဲၣ်ပၥ်ဖျါထီၣ်ဝဲလၢ ကီၢ်ပယီၤပူၤကလုၥ်ဒူၣ်ဖီၣ်စုကဝဲၤကရူၢ်ကရၢတဖၣ် သူဝဲတၢ်စုကဝဲၤပီးလီ တနီၤန့ၣ်,အဝဲဃုထံၣ်သမံသမိးသ့ၣ်ညါဘၣ်ဝဲလၢ အမ့ၢ်တၢ်ဖိတၢ်လံၤလၢအိၣ်ဟဲလၢ ကီၢ်ကၠီၣ် တဲၣ် ဒီး ဘၣ်တၢ်ထုးထီၣ်အီၤလၢကီၢ်ကၠီၣ်တဲၣ် (Made in Thailand) အဃိ စုကဝဲၤသ့ၣ်တဖၣ်အံၤ သုတလဲၤနုၥ် ဆူကီၢ်ပယီၤပူၤလၢၤတဂ့ၤအဂီၢ်အနီၢ်ကစၢ်ဃ့ထီၣ်ဝဲလၢ တၢ်ကပံးဒီးပၢၤဃၥ်ဝဲကီၢ်ဆၢတၢ်စိၥ်ဆှၢစုကဝဲၤပီးလီ အ ကျဲသ့ၣ်တဖၣ်န့ၣ်လီၤ. ”
ဒီး မ့အီၣ်လဲၣ် အတၢ်ဃ့ထီၣ်အဖီခိၣ်, “ထံၣ်ဃုၥ်ဝဲလၢအမ့ၢ်တၢ်လၢအကြၢးဝဲဘၣ်ဝဲ”ဒီး ဆၢတဲၥ်ဝဲလၢ ကပၥ်ဖှိၣ် မၤသကိးတၢ်လၢ တၢ်ဂ့ၢ်အံၤအဖီခိၣ်အဂ့ၢ်, ကၠီၣ်တဲၣ်ကိတိၥ်ခိၣ်ကျၢၢ် (Anutin)ကတိၤပၥ်ဖျါဃုၥ်ဝဲ န့ၣ် လီၤ.
လၢန့ၣ်အမဲၥ်ညါ, တၢ်ထံၣ်လိၥ်သးဒီး မ့အီၣ်လဲၣ်အံၤ တဲအိၣ်သကိးတ့ၢ်ဝဲ တၢ်ပၥ်ဖှိၣ်မၤသကိး တၢ်ဘၣ်ဃးဒီး ခီကီၢ် ဆၢ တၢ်သဝံသဝါတၢ်အလုၢ်ခုၣ်, တၢ်ဘၣ်အၢဘၣ်သီ, ထံကျိတၢ်အစုၣ်အပျၢ်, တၢ်ထီဒါကသံၣ်မူၤဘှီးဒီး ကီၢ်ဆၢတၢ် ဘံၣ်တၢ်ဘၢ, တၢ်မုၥ်တၢ်ခုၣ်ဂ့ၢ်ဝီ တဖၣ် အဂ့ၢ် ပၥ်ဖျါဃုၥ်ဝဲန့ၣ်လီၤ.
ကီၢ်ကၠီၣ်တဲၣ်ကိတိၥ်ဝဲၤကျိၤခိၣ်ကျၢၢ်(Anutin) အတၢ်ထံၣ်လိၥ် တူၢ်လိၥ်ခီၣ်ဆၢ မ့လဲၣ်အဖီခိၣ်, ဂံၢ်ခီၣ်ထံၣ်တၢ်က ရၢကရိ(၁၆)ဖု, ထံဖိကီၢ်ဖိကမျၢၢ် ဒီး ကၠီၣ်တဲၣ်ဘျီၣ် ဒိၣ်ကရၢဖိတနီၤ တူၢ်လိၥ်ဝဲတသ့ဘၣ်အဃိ တၢ်မၤတ့ၢ်ဝဲ ပၥ်ဖျါ ထီၣ်သးဒီး တၢ်ဃ့ထီၣ်ဝဲလၢ တၢ်ကအိၣ်ဆၢထၢၣ်လၢ ဒံၣ်မိၣ်ကရ့ၣ်စံၣ်, တၢ်မုၥ်တၢ်ခုၣ်, ပှၤဟီၣ်ခိၣ်ဖိခွဲးယၥ်ဂ့ၢ်ဝီ တကပၤအိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး,
တကးဒံးဘၣ်, ကီၢ်ကၠီၣ်တဲၣ်အံၤ ခီဖျိမ့ၢ်ဝဲဒံၣ်မိၣ်ကရ့ၣ်စံၣ် ထံကီၢ်တဘ့ၣ်အဃိ, တၢ်ထံၣ်လိၥ်သးဒီး မၤတၢ်ထံၣ်လိၥ် အိၣ်ဖှိၣ် တၢ်ပၥ်ဖှိၣ်မၤသကိးတၢ်ဒီးပှၤမၤကမၣ်ကွီၢ်မ့ၣ်သဲစး,ပှၤဟီၣ်ခိၣ်ဖိခွဲးယၥ် သုးမီၤစိရိၤအခိၣ် မ့အီၣ်လဲၣ်အံၤ ဒုး အိၣ်ထီၣ်ဝဲ တၢ်ပဲၥ်ထံနီၤဖးဒီး တၢ်သံကွၢ်လၢကီၢ်ကၠီၣ်တဲၣ်ထံဖိကီၢ်ဖိကမျၢၢ်ဒီး ထံကီၢ်ခိၣ်နၢ်ဘၢၣ်စၢၤအဂ့ၢ် သ့ၣ် ညါဘၣ်န့ၣ်လီၤ.
မ့အီၣ်လဲၣ်အံၤ (၂၀၂၁)နံၣ် ဟံးန့ၢ်ဆူၣ်ကွံၥ်ဝဲ ကီၢ်ပယီၤထံကီၢ် တၢ်စိကမီၤအလီၢ်ခံ ခီဖျိမၤဝဲ တၢ်ထီၣ်ဒုး လၢ ကမျၢၢ်ထံဖိကီၢ်ဖိအဖီခိၣ် ဒီး မၤကမၣ်ဝဲ ဒုးယၤကွီၢ်မ့ၣ်သဲစးတၢ်သိၣ်တၢ်သီတဖၣ်အဃိ, အပူၤကွံၥ်(၂၀၂၄)နံၣ် အ ပူၤ ထံဂုၤကီၢ်ဂၤကွီၢ်ဘျီၣ်(ICC – International Criminal Court)အပီၢ်ရီခိၣ်ဃ့ထီၣ်တ့ၢ်ဝဲလၢ တၢ်ကဖီၣ်ဟံးန့ၢ် ဝဲအီၤအရ့ အိၣ်ဝဲအသိး, (Argentina)ဖဲၣ်ဒၢၣ်ရၢၣ်ကွီၣ်ဘျီၣ် (Federal Court of Argentina)စ့ၢ်ကီးထုးထီၣ်ဝဲ လံၥ် ဟ့ၣ်တၢ်ပျဲလၢတၢ်ကဟံးထီၣ်ဖီၣ်ထီၣ်ဝဲအီၤ အရ့ အိၣ်ဝဲဘၣ်ဆၣ်, ခံခီခံကပၤ ထံကီၢ်လၢ ဒိးန့ၢ်ဘၣ်နီၢ်ကစၢ် တၢ်ဘၣ်ဘျူးဘၣ်ဖှိၣ်ဒ်အမ့ၢ် တရူး,အ့ၣ်ဒံယါ,ရၢရှါ, ကၠီၣ်တဲၣ်, လါအိၣ်,ခၣ်ဘီဒံယါ, မလ့ရှါသ့ၣ်တဖၣ်အံၤ တူၢ် လိၥ်ခီၣ်ဆၢ ဝဲ အီၤ အိၣ်ဝဲတယူၥ်ဃီ အဂ့ၢ်, သ့ၣ်ညါဘၣ်န့ၣ်လီၤ.