လါအီကူး ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်,မူဒီးဆီထံးကီၢ်ဆၣ်ဟီၣ်ကဝီၤ လါယူၤလံ ၁ သီ တုၤ ၃၁ သီ လၢတလါအတီၢ်ပူၤ ကဘီယူၤ,ကျိဖးဒိၣ်ဒီးဟီၣ်လၥ်မ့ၣ်ပိၢ်အဃိ လီၢ်ကဝီၤကမျၢၢ်သံဝဲ(၅)ဂၤအဂ့ၢ်န့ၣ် သ့ၣ်ညါဘၣ် လၢကီၢ်ရ့ၣ်တၢ်မၤနီၣ်စရီအပူၤ န့ၣ်လီၤ.
ဒ်တၢ်မၤနီၣ်စရီပူၤအိၣ်ဝဲအသိးန့ၣ် လါယူၤလံတလါအတီၢ်ပူၤ ကဘီယူၤလဲၤခးလီၤတၢ်(၁၁)ဘျီ တ့ၢ်လီၤမ့ၣ်ပိၢ် (၁၄)ဖျၢၣ်, ပယီၤသုးခးလီၤစိဝဲကျိဖးဒိၣ်(၁၀)ဘျီ ခးလီၤဝဲအသၣ်(၃၃)ဖျၢၣ်ဒီး ခးလီၤတၢ်ဒီးဒြိ(၁၈)ဘျီ တ့ၢ်လီၤဝဲအသၣ်(၃၆)ဘျီ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးမ့ၢ်ဘၣ်ကွၢ်လၢတၢ်မၤနီၣ်မၤဃါပူၤလီၤတံၢ်လီၤဆဲးန့ၣ် ခီဖျိလၢသုးမီၤစိရိၤအကျိဖးဒိၣ်,ကဘီယူၤအဃိ ကမျၢၢ်သံ(၃)ဂၤဒီး လၢဟီၣ်လၥ်မ့ၣ်ပိၢ်အံၤအဃိ ကမျၢၢ်သံ(၂)ဂၤ,ဘၣ်ဒိစ့ၢ်ကီးဝဲ(၂)ဂၤန့ၣ်လီၤ.
တကးဒံးဘၣ်လၢသုးမီၤစိရိၤအတၢ်ဟူးတၢ်ဂဲၤသ့ၣ်တဖၣ်အံၤအဃိ ကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်ဃုၥ်ဒီးကျးတၢ်သူၣ်ထီၣ် ဟးဂီၤဝဲ (၃)ဖျၢၣ်န့ၣ်လီၤ.
လၢန့ၣ်အမဲၥ်ညါ တလါအတီၢ်ပူၤအံၤစ့ၢ်ကီး မူဒီးဆီထံးကီၢ်ဆၣ်အပူၤ ပယီၤသုးဖီၣ်ဝဲကမျၢၢ်(၆)ဂၤဒီး ဖဲန့ၣ်အကျါသးစၢ်(၂)ဂၤ လၢအမ့ၢ် စီၤအါထူ(၁၈)နံၣ်ဒီး စီၤန့ၢ်ကၠီးခဲ(၂၄)နံၣ်သ့ၣ်တဖၣ်အံၤ တၢ်ဆှၢထီၣ်အဝဲသ့ၣ် ဆူသုးတၢ်သိၣ်လိလီၢ် အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤ အပူၤကွံၥ်လါယူၤတလါအတီၢ်ပူၤန့ၣ်စ့ၢ်ကီး သုးမီၤစိရိၤအံၤသူဝဲဒြိ,ကျိဖးဒိၣ် လဲၤခးလီၤတၢ်ဒီးကဘီယူၤပၥ်ဖှိၣ်အိၣ်ဝဲ(၁၂)ဘျီဒီး ဖဲန့ၣ်ကမျၢၢ်သံဘၣ်ဒိဘၣ်ထံး(၇)ဂၤ, ဟံၣ်,ကၠိတၢ်သူၣ်ထီၣ်ဟးဂီၤ (၅)ဖျၢၣ် အဂ့ၢ်န့ၣ် သ့ၣ်ညါဘၣ်လၢတလါတဘျီတၢ်မၤနီၣ်စရီအပူၤန့ၣ်လီၤ.
