(သုးက့ ၅)တၢ်ဒုးတလါအတီၢ်ပူၤ တၢ်ဒုးကဲထီၣ်(၉၀)ဘျဲၣ် ပယီၤသုးသံဘၣ်ဒိ(၇၀)ဘျဲၣ်အကျါပၣ်ဃုၥ် သုးရ့ၣ်ခိၣ်ဒီးသုးခိၣ်စိပတီၢ် (၆)ဂၤ

လါအီကူး ၅ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ လါယူၤလံတၢ်ဒုးတလါအတီၢ်ပူၤ ပယီၤသုးသံ ဘၣ်ဒိ ဘၣ်ထံး(၇၀)ဘျဲၣ်အကျါ ပၣ်ဃုၥ်ဝဲသုးရ့ၣ်ခိၣ်ဒီးသုးခိၣ်စိပတီၢ်(၆)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤ လါအီကူး ၅ သီအံၤန့ၣ်လီၤ.

(သုးက့ ၅)တၢ်ပၢဟီၣ်ကဝီၤအပူၤ အပူၤကွံၥ်လါယူၤလံထီၣ် ၁ သီတုၤ ၃၁ သီလၢတလါအတီၢ်ပူၤ ဟီၣ်ကဝီၤကညီဒီကလုၥ်တၢ် ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ တၢ်ဒုးကဲထီၣ်ပၥ်ဖှိၣ်အိၣ်ဝဲ(၉၁)ဘျီဒီး ဖဲန့ၣ်ပယီၤသုးတကပၤ သံဝဲ(၂၃)ဂၤ, ဘၣ်ဒိဘၣ်ထံး(၅၅)ဂၤအဂ့ၢ်န့ၣ် စံးဝဲန့ၣ်လီၤ.

ဒီးလၢပယီၤသုးသံ(၂၃)ဂၤအံၤအကျါပၣ်ဃုၥ်ဝဲ သုးခိၣ်စိ(၁)ဂၤ ဒီး ဘၣ်ဒိဘၣ်ထံး(၅၅)ဂၤအကျါပၣ်ဃုၥ်ဝဲ သုးရ့ၣ်ခိၣ်-၂ (၂)ဂၤ, သုးခိၣ်စိ(၃)ဂၤတကးဒံးဘၣ်အမဲၥ်ညါ (KNLA)မၤဟးဂီၤဃုၥ်ဝဲပယီၤသုးအသိလ့ၣ်(၅)ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးဟီၣ်ကဝီၤအပူၤ လၢလါယူၤလံတလါအတီၢ်ပူၤအံၤစ့ၢ်ကီး ပယီၤသုးခးလီၤဝဲကျိဖးဒိၣ်(၁၈)ဘျီ, တ့ၢ်လီၤဝဲဒြိမ့ၣ်ပိၢ်(၄၄)ဘျီ ဒီး ကဘီယူၤလဲၤခးလီၤတၢ်လၢဒူသဝီကမျၢၢ်အိၣ်ဆိးတၢ်ဖံးအီၣ်မၤအီၣ်လီၢ်ကျဲ(၃၃)ဘျီညါအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.

ဒီးလၢပယီၤသုးအကျိဖးဒိၣ်,ကဘီယူၤဒီးဒြိသ့ၣ်တဖၣ်အံၤအဃိ ကမျၢၢ်သံတအိၣ် ဘၣ်ဒိဘၣ်ထံးဝဲ(၆)ဂၤဒီး ကမျၢၢ်ဟံၣ်ဟးဂီၤဝဲ (၅၀)ဖျၢၣ်, တၢ်ဘါယွၤသရိၥ်ဃုၥ်ဒီးကၠိဖိဟံၣ်ဒွဲဟးဂီၤစ့ၢ်ကီးဝဲ(၄)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

(သုးက့ ၅)ဟီၣ်ကဝီၤအပူၤ ဖဲအပူၤကွံၥ်လါယူၤတလါအတီၢ်ပူၤန့ၣ်စ့ၢ်ကီး ပယီၤသုးဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်ဝဲအဘျီ(၇၀)ဘျဲၣ်ဒီး ပယီၤသုးသံ(၂၃)ဂၤ,ဘၣ်ဒိဘၣ်ထံးဝဲ(၅၄)ဂၤဒံးန့ၣ်လီၤ.