လါအီကူၥ် ၄သီ, ၂၀၂၆နံၣ်, ခ့ၣ်အဲးစံၣ်,
တၢ်သုတပၥ်ပနီၣ်ဝဲ သုးကရူၢ်အခိၣ်မ့အီၣ်လဲၣ်လၢ အမ့ၢ်ကီၢ်ပယီထံကီၢ်(ကီၢ်ခိၣ်)လၢအဖိးသဲစးတဂ့ၤ ဒီး ကၠီၣ်တဲၣ်ပဒိၣ်ပပှၢ်တဖၣ် ကပတုၥ်ကွံၥ်ဝဲ တၢ်ပၥ်ဖှိၣ်မၤ သကိးတၢ်ဒီး သုးကရူၢ်အံၤ အဂီၢ် (Justice For Myanmar) ဃ့ထီၣ် ပၥ်ဖျါထီၣ်ဝဲဒၣ် ဖဲမဟါလါအီကူၥ် (၃)သီ အနံၤန့ၣ်လီၤ.
ပှၤဟံးန့ၢ်ဆူၣ် ကီၢ်ပယီၤထံကီၢ် တၢ်စိကမီၤသုးကရူၢ်အခိၣ် မ့အီၣ်လဲၣ်အံၤ လၢကီၢ်ကၠီၣ်တဲၣ် ကိတိၥ်ဝဲၤကျိၤခိၣ်ကျၢၢ် (Prime Minister)(Anutin Charnvirakul) အတၢ်ကွဲမုၥ်တဆီ တလါအံၤလါအီကူၥ် (၆)သီဒီး (၇)သီ အနံၤအပူၤ ကလဲၤဃီၤဝဲဒၣ်ဆူ ကီၢ်ကၠီၣ်တဲၣ်ပူၤ အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ကၠီၣ်တဲၣ်ပဒိၣ် အတၢ်ကွဲမုၥ် သုးကရူၢ်အခိၣ်(ပှၤတူၢ်ကွီၢ်,ပှၤမၤကမၣ်သဲစး)မ့အီၣ်လဲၣ် ဒ် ဖိးသဲစးတၢ်ရ့လိၥ်မုၥ် လိၥ် တၢ်ထံၣ်လိၥ်တၢၣ်ပီၣ် အဖီခိၣ်, ကၠီၣ်တဲၣ်အတၢ်ဆၢတဲၥ် အံၤ, (Justice For Myanmar)ထီဒါဝဲတဲၥ်တဲၥ် ဖျုဖျု အဂ့ၢ်, ပၥ်ဖျါ ထီၣ်ဝဲဒၣ်န့ၣ်လီၤ.
ဒီး သုးကရူၢ်အခိၣ်မ့အီၣ်လဲၣ်လၢ အမဲရကၤ, ဘြ့ၣ်ထ့ၣ်ရှ်, ယူရပၤ(EU), ခဲနဒၣ် ဒီး အီၣ်စထြ့လယါ ထံကီၢ် ဒိၣ်ထီတဖၣ် ဖီၣ်ဃံးဃၥ် ဝဲဒၣ်တဂၤအံၤ ကၠီၣ်တဲၣ်ပဒိၣ်ပပှၢ်တဖၣ် တဘၣ်ပၥ်ပနီၣ်ဝဲ လၢ အမ့ၢ်ပှၤ ဖိးသဲစးဘၣ်ဒီး ကပတုၥ်ကွံၥ် ဝဲမုၢ်ကျိၤဝဲၤကွၥ် တၢ်ပၥ်ဖှိၣ်မၤသကိးတၢ်တဖၣ် ခဲအံၤ အဂ့ၢ် (Justice For Myanmar) ပၥ်ဖျါဝဲဒၣ်စ့ၢ်ကီး န့ၣ် လီၤ.
မ့အီၣ်လဲၣ် အံၤ လၢတၢ်သုးထီထီၣ်ဝဲ တၢ်ဝံစိၥ်တီဆှၢ ဒီး တၢ်ဘျၢလီၤပၥ်လီၤ တၢ်ဖံး တၢ် မၤတဖၣ်အဂီၢ် လၢကီၢ်ကၠီၣ်တဲၣ်-ကီၢ်ပယီၤမုၢ်ကျိၤဝဲၤကွၥ် ကီၣ်ကးတဆီ, အိၣ်ကတီၤသးလၢ ထံကီၢ်ခံဘ့ၣ်မုၢ်ကျိၤဝဲၤကွၥ်တၢ်ဖံး တၢ်မၤ ခိၣ်နၢ် တဖၣ် အတၢ်ထံၣ်လိၥ်တၢၣ်ပီၣ် တၢ်ရဲၣ်တၢ်ကျဲၤဒီး, တၢ်အံၤအဖီခိၣ် ပှၤလၢကထံၣ်လိၥ်တၢၣ်ဒီးအဝဲလၢအမ့ၢ် ကၠီၣ် တဲၣ် ခီပနံၥ် ခိၣ်နၢ်တဖၣ်စ့ၢ်ကီး မ့ၢ်ဝဲပှၤလၢ အကပၣ်ဃုၥ်ပၣ်ဂီၢ်ဝဲဒၣ်လၢ တဖိးသဲစးသုးကရူၢ်အတၢ်ဖံးတၢ်မၤပူၤအဂ့ၢ်, (Justice For Myanmar) ပၥ်ဖျါဝဲစ့ၢ်ကီးန့ၣ်လီၤ.
ဒ်န့ၣ်အသိး, တၢ်ထံၣ်လိၥ်တၢၣ်ပီၣ် အပူၤ မုၢ်ကျိၤဝဲၤကွၥ်တၢ်ဖံးတၢ်မၤ အကျိၤအကျဲလၢ တၢ်ကအၢၣ် လီၤတူၢ်လိၥ် ဝဲတဖၣ် မ့ၢ်ဝဲတၢ်ပၣ်ဃုၥ်ပၣ်ဂီၢ်လၢ သုးကရူၢ် အတၢ်မၤကမၣ်ကွီၢ်မ့ၣ်သဲစးဒီး မၤကမၣ်မၤထီဒါပှၤဟီၣ်ခိၣ်ဖိခွဲးယၥ် တဖၣ်လီၤအဃိ, ဘၣ်သဂၢၢ်ဝဲဒီး ထံဂုၤကီၢ်ဂၤတၢ်ဖီၣ်ဃံးအိၣ်ဝဲသ့အဂ့ၢ် (Justice For Myanmar) ဟ့ၣ်ပလီၢ်ဝဲဒၣ်န့ၣ်လီၤ.
ဒ်(Justice For Myanmar) ဃုထံသ့ၣ်ညါဘၣ်ဝဲအသိးန့ၣ်,ကီၢ်ကၠီၣ်တဲၣ်ဒီး ကီၢ်ပယီၤထံကီၢ် သုးကရူၢ်အခိၣ် မ့အီၣ်လဲၣ် အဘၢၣ်စၢၤ မုၢ်ကျိၤဝဲၤကွၥ်တၢ်ဒိးန့ၢ်ဘၣ်အဘျူးအဖှိၣ် ဒ် တၢ်ရၤလီၤဆါဂၥ်သဝံ, ရၤလီၤဆါ သုးဂ့ၢ်ဝီ စုကဝဲၤပီးလီ, ဆီၣ်ထွဲကဘီယူၤသိ, အိးထီၣ်န့ၢ်စ့တၢးတၢ်ဖံးတၢ်မၤ, ဘျၢလီၤဆါဟံၣ်ဃီဟီၣ်ခိၣ်ကပံၥ် ဒီး ကီၢ်ဆၢ တၢ်မၤကမၣ်ကွီၢ်မ့ၣ် တၢ်ဖံးတၢ်မၤ တဖၣ် အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
မ့အီၣ်လဲၣ်အံၤ ခီဖျိအတၢ်အမၤသံမၤဝီ မၤလီၤတူၥ်ဝဲ ပှၤကူပှၤကညီဒီး တၢ်မၤကမၣ်သုးဂ့ၢ်ဝီကွီၢ်မ့ၣ် အဃိ ကီၢ်ပယီၤပူၤ ပှၤဟူးဂဲၤလၢ ပှၤကညီဂ့ၢ်ဝီခွဲးယၥ်ဒီး ထံရုၢ်ကီၢ်သဲးဂ့ၢ်ဝီတဖၣ် ဃ့ထီၣ်ဝဲ ထံဂုၤကီၢ်ဂၤလၢ ကဟံးထီၣ်ဖီၣ်ထီၣ်ဝဲ မ့အီၣ်လဲၣ်အရ့ အိၣ်ဝဲတယူၥ်ဃီန့ၣ်လီၤ.
ဒ်န့ၣ်အသိး, အပူၤကွံၥ် (၂၀၂၄)နံၣ်အပူၤ ထံဂုၤကီၢ်ဂၤ ကွီၢ်ဘျီၣ်(ICC – International Criminal Court) အပီၢ်ရီခိၣ်ဃ့ထီၣ်တ့ၢ်ဝဲလၢတၢ်ဖီၣ်ဝဲသုးကီၣ်ကးအခိၣ်အိၣ်ဝဲအသိး Argentina ထံကီၢ် ဖဲၣ်ဒၢၣ်ရၢၣ်ကွီၢ်ဘျီၣ် (Federal Court of Argentina ) စ့ၢ်ကီး ထုးထီၣ်ဝဲလံၥ်ဟ့ၣ်တၢ်ခွဲးလၢ တၢ်ကဖီၣ်ဝဲ မ့အီၣ်လဲၣ် အိၣ်ဝဲအဂ့ၢ်,သ့ၣ်ညါ ဘၣ်န့ၣ် လီၤ.
