လါအီကူး ၁၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၢ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်လၢသုးမီၤစိရိၤကဘီယူၤလဲၤခးလီၤတၢ်တလီၢ်လီၢ်အံၤန့ၣ် လဲၤတ့ၢ်လီၤကဒီးပီၣ်(၅၀၀)မ့ၣ်ပိၢ်အဃိ ဖိသၣ်ဃုၥ်ဒီးကမျၢၢ်သံ(၃)ဂၤ,ဘၣ်ဒိဘၣ်ထံးဝဲ(၈)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ် ပၥ်ဖျါဝဲဒၣ်ဖဲမဟါအနံၤန့ၣ်လီၤ.
ဖဲလါအီကူး ၁၀ သီ ဟါခီ ၄း၀၄ မံးနံးအဆၢကတီၢ် တၢ်ဒုးကဲထီၣ်တအိၣ် သုးမီၤစိရိၤ(Jet Fighter)ကဘီယူၤလၢအိၣ်တီအူ ကလံၤသုး အံၤ ဟဲတ့ၢ်လီၤဝဲပီၣ်(၅၀၀)မ့ၣ်ပိၢ် ၂ ဖျၢၣ်ဆူ ကျီမီၤခိၣ်သဝီ သီခါဖၠၣ်ဒီး ဖဲန့ၣ်မၤပံၤဖိသဝီဖိ နီၢ်ဆှံဒူဖီ(၄၀)နံၣ်လၢအမ့ၢ် ပှၤဃ့ၢ်မှံဟးဖျိးအံၤဒီး မၣ်နံၤလၤ(၄၀)နံၣ်,နီၢ်အဲၣ်ကၠါလ့(၉)နံၣ်လၢအမ့ၢ်ကျီမီၤခိၣ်သဝီဖိအံၤသံကွံၥ်ဝဲဖဲတၢ်ကဲထီၣ်သးန့ၣ်လီၤ.
တကးဒံးဘၣ်လၢန့ၣ်အမဲၥ်ညါလၢကဘီယူၤအတၢ်ဟဲခးလီၤတၢ်ဘျီဝဲအံၤ ကမျၢၢ်ဘၣ်ဒိဘၣ်ထံးစ့ၢ်ကီးဝဲ(၈)ဂၤဒီး ပှၤသ့ၣ်တဖၣ်အံၤ အကျါပၣ်ဃုၥ်ဝဲဖိသၣ်(၄)ဂၤအသိး ဟံၣ်ဃုၥ်ဒီးကျးတၢ်သူၣ်ထီၣ်(၃)ဖျၢၣ်,သိလ့ၣ်ယီၢ်(၂)ခိၣ်,ဘုဖီ(၁)ဖျၢၣ်,ကျီၢ်(၁)ဒု ဟးဂူၥ်ဟးဂီၤ ဘၣ်ဒိဘၣ်ထံးဝဲ အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်ခ့ၣ်အဲၣ်ယူၣ်အလံၥ်တၢ်ပၥ်ဖျါပူၤစံးဝဲအသိးန့ၣ် ကမျၢၢ်လၢအဘၣ်ဒိဘၣ်ထံးသ့ၣ်တဖၣ်န့ၢ်မ့ၢ်ဝဲ စီၤခိၣ်နူ(၅၅)နံၣ်, စီၤဘံထူ(၅၅)နံၣ်, စီၤအီၤကၠီၤမိ(၃၅)နံၣ်, နီၢ်သဲၣ်မၤအ့(၂၇)နံၣ်, စီၤကျၢၢ်စ့(၁၄)နံၣ်, နီၢ်မူကပြုၢ်ဝါ(၁၃)နံၣ်, နီၢ်ဆၢသယူၢ်ဖီ(၉)နံၣ်ဒီး စီၤပဟံၣ်ထူ(၅)နံၣ် သ့ၣ်တဖၣ်န့ၣ်လီၤ.
သုးမီၤစိရိၤလၢအလုၢ်သ့ၣ်ခါပတၥ်ဝဲဟီၣ်ခိၣ်ဒီဘ့ၣ်ကွီၢ်မ့ၣ်တပယူၥ်ဃီအံၤ လူၤပိၥ်မၤထွဲဝဲ(အၣ်စံၣ်ယၣ်)ထံကီၢ်အတၢ်သးလီၤပလိၥ် တၢ်ဆၢတဲၥ်(၅)ထံၣ်တအိၣ်ဘၣ်အမဲၥ်ညါ မ့မ့ၢ်တခီသူဝဲဒၣ်ဒြိ,ကျိဖးဒိၣ်ဒီးကဘီယူၤဟးလီၤဝဲတၢ်လၢကမျၢၢ်အိၣ်ဆိးလီၢ်ကျဲ ကိးမုၢ်နံၤဒဲးတကးဒံးဘၣ်ဖီၣ်,မၤသံကမျၢၢ်ထံဖိကီၢ်ဖိဒီးမၤထီဒါဝဲသုးကွီၢ်မ့ၣ်ကိးမုၢ်နံၤဒဲးတုၤလၢခဲအံၤတစုအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအမဲၥ်ညါ စးထီၣ်ဖဲလါအီကူးထီၣ်အံၤ ဟီၣ်ကဝီၤပူၤဒုးယၤတၢ်သဘံၣ်သဘုၣ် ကဲထီၣ် အိၣ်ဂ့ၤ,တအိၣ်ဂ့ၤ လၢဒူသထူၣ်ကီၢ်ရ့ၣ်(သုးက့ ၁), ဘျံးဒဝဲၢ်ကီၢ်ရ့ၣ်(သုးက့ ၄), မုၢ်တြီၢ်ကီၢ်ရ့ၣ်(သုးက့ ၅) , ဒူပျၥ်ယၥ်ကီၢ်ရ့ၣ် (သုးက့ ၆)ဟီၣ်ကဝီၤဒူသဝီအပူၤ သုးမီၤစိရိၤအံၤသူဝဲကဘီယူၤလဲၤခးလီၤဝဲတၢ်အိၣ်ဝဲတပယူၥ်ဃီဒီး ကမျၢၢ်စ့ၢ်ကီးသံဘၣ်ဒိဘၣ်ထံး အိၣ်ဝဲခဲအံၤခဲအံၤန့ၣ်လီၤ.