လါအီကူၥ် ၁၂သီ, ၂၀၂၆နံၣ်, ခ့ၣ်အဲးစံၣ်,
ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢ,မဲးဆီးဝ့ၢ်ဟီၣ်ကဝီၤအပူၤဖဲတနံၤအံၤလါအီကူၥ်(၁၂)သီအနံၤန့ၣ် ခီကီၢ်ကညီ ဆၣ်သူလ့ၤတီၤထီကၠိမၤလၤကပီၤဝဲဒၣ်ကညီမၤထူရၤမုၢ်နံၤပှဲၤထီၣ် (၇၆)ဝီတဝီဃုၥ်ဒီး ကီၢ်ကၠီၣ်တဲၣ်မိၢ်မုၢ်နံၤဒီးကညီလါခူးကံၢ်စုမူးတၢ်ရဲၣ်တၢ်ကျဲၤအံၤအဂ့ၢ်သ့ၣ်ညါဘၣ်န့ၣ်လီၤ.
တၢ်မၤလၤကပီၤ မူး(၃)မူး လၢတနံၤဃီအတီၢ်ပူၤအံၤ မ့ၢ်ဒ်သိး ပှၤကၠိဖိသူၣ်ဘီၣ်သးစၢ်တဖၣ် ဒ်အဝဲသ့ၣ်မ့ၢ်ကညီဖိအသိး ကသ့ၣ်ညါပၥ်လုၢ်ပၥ်ပှ့ၤ အမုၢ်နံၤဒိၣ်မုၢ်နံၤထီဒီး သ့ၣ်တဖၣ်အဂ့ၢ် ဆၣ်သူလ့ၤတီၤထီကၠိအပှၤနဲၣ်တၢ် သရၣ်မုၢ်ဖီရ့ၣ်စံးဝဲဒ်အံၤန့ၣ်လီၤ.
အဝဲစံးဝဲလၢ” ပတၢ်ပညိၣ်တခီမ့ၢ်ဝဲ ဒ်ပကၠိအံၤမ့ၢ်ကညီကၠိအသိး ပအဲၣ်ဒိးတဲပၠး ဒုးသ့ၣ်ညါက့ၤပဖိပလံၤ သူၣ်ဘီၣ်သးစၢ်တဖၣ်လၢ ပပှၤကလုၥ် တၢ်စံၣ်စိၤတဲစိၤ တၢ်ပၢၢ်ဆၢတၢ်လဲၤကျဲန့ၣ်လီၤ. ဒ်ပကီၢ်ခိၣ်ဘးအူကၠံဟ့ၣ်လီၤအသးဖဲ လါအီကူၥ်, ၁၂သီ ဃုၥ်ဒီးသိၣ်ဒူတဖၣ်ဒ်အမ့ၢ်မၤထူရၤအသိးဒီး ပဖိပလံၤတဖၣ်ကသ့ၣ်ညါပၥ်ကဲက့ၤပမုၢ်နံၤဒိၣ်မုၢ်နံၤထီလၢ ခိၣ်နၢ်လၢလုၢ်ထီၣ်ကွံၥ်သးသမူလၢကလုၥ်ဂီၢ်ဒီး ကသ့ကွၢ်လိတၢ်လၢဒိဂ့ၤတဲၥ်ဘၣ်ဒီး ကဲထီၣ်ခိၣ်နၢ် သူၣ်စၢ်သးဘီၣ်လၢမၤတၢ်လၢအပှၤကလုၥ်ဂီၢ်အဂ့ၢ်” စံးဝဲဒၣ်န့ၣ်လီၤ.
ဒ်န့ၣ်အသိး ဒ်ပကၠိအံၤအိၣ်သူၣ်လီၤသးလၢ ကီၢ်ကၠီၣ်တဲၣ်ထံကီၢ်အသိး ပကဘၣ်လူၤပိၥ်ထွဲကၠီၣ်တဲၣ်တၢ်သီၣ်တၢ်သီဒ် တၢ်ပၥ်လီၤန့ၢ်ပှၤအသိးအဂ့ၢ် ဒီးဖဲလါအီကူၥ်(၁၂)သီအနံၤအံၤ စ့ၢ်ကီး မ့ၢ်ဝဲဒၣ် ကၠီၣ်တဲၣ်မိၢ်မုၢ်နံၤအဃိ အလီၢ်အိၣ်လၢပကဘၣ်မၤလၤကပီၤအီၤဒီး ဒ်သိးပဖိပလံၤသ့ၣ်တဖၣ် ကသ့ၣ်ညါဆၢက့ၤမိၢ်တၢ်အဲၣ် မိၢ်အဘျုးအဖှိၣ်ဒီး ကသ့ပၥ်ကဲဝဲအဂ့ၢ် တဲအါထီၣ်ဝဲဒၣ်န့ၣ်လီၤ.
လၢတၢ်မၤတၢ်ရဲၣ်တၢ်ကျဲၤဘျီဝဲအံၤန့ၣ် အိၣ်ဒီးခိၣ်နၢ် တၢ်ဖးဖျါထီၣ်မၤထူရၤမုၢ်နံၤဟဲကဲထီၣ်သးအဂ့ၢ်ဒီး တၢ်ကတိၤလီၤဒုးသ့ၣ်ညါဘၣ်ဃး လါခူးကံၢ်စုအဂ့ၢ်ဒီး တၢ်မၤလၤကပီၤမိၢ်တၢ်ရဲၣ်တၢ်ကျဲၤ အမဲၥ်ညါအိၣ်ဒီး ကညီတၢ်ဆဲးတၢ်လၤတၢ်ကလံၣ်(ဒိ)တဖၣ်အဂ့ၢ် သ့ၣ်ညါဘၣ်န့ၣ်လီၤ
လၢန့ၣ်အမဲၥ်ညါ ဘၣ်ဃးဒီးလါခူးကံၢ်စုအံၤ မ့ၢ်ပမိၢ်ပၢ်ဖံဖု လၢပျၢၤလံၤလံၤ အလုၢ်လၢ်ဒီး ဖိလံၤလၢလဲၤဖံးလဲၤမၤလၢအယံၤဒီး မ့ၢ်တုၤဃီၤလၢလါခူးအလါဒီး ကွဲဝံကွဲကလၤ ကိးဖှိၣ်က့ၤဖိလံၤတဖၣ်ဒီး ဟဲက့ၤအိၣ်ဖှိၣ်သကိးဝဲအဂ့ၢ်သ့ၣ်ညါဘၣ်န့ၣ်လီၤ.
လၢတၢ်မၤလၤကပီၤ မူးတၢ်ရဲၣ်တၢ်ကျဲၤဘျီဝဲအံၤ ကညီခိၣ်နၢ်, ကၠိဖိမိၢ်ပၢ်, သရၣ်သရၣ်မုၢ်ဃုၥ်ဒီး ကၠိဖိတဖၣ်ခဲလၢၥ်ပှၤနီၣ်ဂံၢ်အိၣ်ဝဲ (၄၀၀) ဘျဲၣ်အဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိး ခီကီၢ်ဆၣ်သူလ့ၤကၠိ အံၤမၤလၤကပီၤဝဲ ကညီမၤထူရၤမုၢ်နံၤဒီး ကညီလါခူးကံၢ်စုဃုၥ်ဒီး ကီၢ်ကၠီၣ်တဲၣ်နီၢ်ပၤမုၢ်မိၢ်မုၢ်နံၤတၢ်ရဲၣ်တၢ်ကျဲၤအံၤန့ၣ်အိၣ်လံဝဲ(၁၈) ဝီတဝီလံအဂ့ၢ်သ့ၣ်ညါဘၣ်န့ၣ်လီၤ.
