လါအီကူး ၁၅ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ပယီၤအပူၤစးထီၣ်လၢ(၂၀၂၁)သုးဟံန့ၢ်ဆူၣ်ထံကီၢ်တၢ်စိတၢ်ကမီၤတုၤလၢ(၂၀၂၆)တလါအံၤလါအီကူး ၁၄ သီ လၢ(၅)နံၣ် ဘျဲၣ် အတီၢ်ပူၤ ခီဖျိလၢပယီၤသုးကရူၢ်ဒီးအစုတီၤဖီလၥ်တဖၣ်အတၢ်ဟူးတၢ်ဂဲၤကလုၥ်ကလုၥ်အံၤအဃိ ထံဖိ ကီၢ်ဖိကမျၢၢ်ဒီးပှၤဟူးဂဲၤ လၢဒံၣ်မိၣ်ခြ့ၣ်စံၣ်ဂ့ၢ်ဝီတဖၣ် သံပၥ်ဖှိၣ်အနီၣ်ဂံၢ်အိၣ်ထီၣ်တုၤလၢ(၈,၂၇၂)ဂၤအဂ့ၢ်န့ၣ် (AAPP-တၢ်ဆီၣ်ထွဲမၤစၢၤထံရူၢ်ကီၢ်သဲး ပှၤဃိၥ်ဖိကရူၢ်) ထုးထီၣ်ပၥ်ဖျါဝဲဖဲမဟါလါအီကူး ၁၄ သီအံၤန့ၣ်လီၤ.
ဒ်(AAPP)အလံၥ်တၢ်ပၥ်ပူၤအိၣ်ဝဲအသိးန့ၣ် လၢသုးဟံန့ၢ်ဆူၣ်ထံကီၢ်တၢ်စိတၢ်ကမီၤ(၅)နံၣ်ဘျဲၣ်အတီၢ်ပူၤအံၤ သုးကရူၢ် ဖီၣ်ဝဲ ကမျၢၢ်ဃုၥ်ဒီးပှၤဟူးဂဲၤလၢထံရူၢ်ကီၢ်သဲးတဖၣ်ပၥ်ဖှိၣ်အိၣ်ဝဲ(၃၁,၇၅၉)ဂၤ ဖဲန့ၣ်အကျါပှၤလၢအဟဲက့ၤပူၤဖျဲးထီၣ်န့ၣ်အိၣ်ဝဲ (၉,၂၀၁)ဂၤ ဒီး ပှၤလၢတၢ်ဖီၣ်ဃၥ်အီၤဒံးအဖၢမုၢ်အိၣ်ဝဲ (၁၄,၆၉၄) ဂၤအဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးပှၤအိၣ်ဒံးဝဲဒၣ်လၢတၢ်ကဘၣ်ဆဲးမၤတံၢ်အစရီန့ၣ်အိၣ်ဝဲ(၇,၀၆၄)ဂၤအဂ့ၢ်န့ၣ် (AAPP)စံးစ့ၢ်ကီးဝဲန့ၣ်လီၤ.
တကတီၢ်ဃီထဲဒၣ်တလါအံၤလါအီကူးထီၣ် ၁ သီ တုၤလၢ ၁၄ သီ ခီဖျိလၢသုးကရူၢ်ကဘီယူၤဒီးကျိဖးဒိၣ်အံၤအဃိ ကမျၢၢ်ပိၥ်မုၣ် (၂၃)ဂၤဒီးပိၥ်ခွါ(၁၅)ဂၤ ပၥ်ဖှိၣ်ခဲလၢၥ်(၃၈)ဂၤသံဝဲဒၣ်ဒီး ဖဲန့ၣ်အကျါပၣ်ဃုၥ်ဝဲဖိသၣ်(၁၈)နံၣ်ဆူဖီလၥ် ၅ ဂၤ အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဃုၥ်ဝဲန့ၣ်လီၤ.
ဒ်န့ၣ်အသိးကမျၢၢ်လၢအသံ(၃၈)ဂၤအံၤအကျါ (၁၉)ဂၤန့ၣ်အိၣ်ဝဲဒၣ်လၢရခၢၣ်ကီၢ်စဲၣ်တကပၤအဂ့ၢ်န့ၣ် လံၥ်တၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.
သုးကရူၢ်အံၤ ဟီၣ်ကဝီၤတၢ်လီၢ်လၢဒုးယၤတၢ်သဘံၣ်သဘုၣ်ကဲထီၣ်အလီၢ်တဖၣ်န့ၣ် မၤအါထီၣ်ဝဲသုးကျိၤတၢ်ဟူးတၢ်ဂဲၤဒီး သူဝဲကျိဖးဒိၣ်, ခးလီၤတၢ်ဒီးကဘီယူၤဟဲအါထီၣ်ဝဲကွ့ၢ်ကွ့ၢ်န့ၣ်လီၤ.
လၢသုးမီၤစိရိၤအတၢ်လုၢ်သ့ၣ်ခါပတၥ်မၤကမၣ်ပှၤဟီၣ်ခိၣ်ဖိခွဲယၥ်အံၤ မ့ၢ်ဘၣ်ကွၢ်လၢခ့ၣ်အဲၣ်ယူၣ်တၢ်ပၢဟီၣ်ကဝီၤ ကီၢ်ရ့ၣ်/ သုးက့(၇)ဘ့ၣ်အပူၤ ခီဖျိလၢသုးမီၤစိရိၤအကျိဖးဒိၣ်,ဒြိဒီးကဘီယူၤအံၤ အဃိ ထဲဒၣ်တနံၣ်အံၤ(၂၀၂၆) လါအ့ဖြ့ၣ်, လါမ့ၤဒီးလါယူၤ လၢ(၃)လါအတီၢ်ပူၤ ကမျၢၢ်သံဝဲ(၆၀)ဂၤ, ဘၣ်ဒိဘၣ်ထံးဝဲ(၁၅၆)ဂၤဒီး ဟံၣ်,ကၠိ,တၢ်ဆါဟံၣ်,သီခါဖၠၣ်ဒီးသရိၥ် တၢ်သူၣ်ထီၣ်ဟးဂီၤ ပၥ်ဖှိၣ်အိၣ်ဝဲ(၄၀၁)ဖျၢၣ်အဂ့ၢ်န့ၣ် (KPSN)ထုးထီၣ်ပၥ်ဝဲန့ၣ်လီၤ.