လါစဲးပထ့ဘၢၣ် ၂၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ယိၤကျါမုၢ်နုၥ်ဒီးမုၢ်ထီၣ်သဝီအပူၤ ဖဲမနၤမုၢ်နၤခီအဆၢကတီၢ်န့ၣ် ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ်တဖၣ်လၢကၠိကရၢၢ်ပူၤအဃိ ကၠိတီၤဒၢးတၢ်သူၣ် ထီၣ်ဟးဂီၤလီၤပှီၢ် တစှၤန့ၢ်ဝဲ(၅)ဖျၢၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
ဖဲမဟါလါစဲးပထ့ဘၢၣ် ၁၉ သီ မုၢ်နၤခီဘၣ်လၢပှၤမံမုၥ် ၁၁း၁၅ မံးနံးအဆၢကတီၢ်န့ၣ် ဟီၣ်ကဝီၤပူၤတၢ်ဒုးကဲထီၣ်တအိၣ် သုးမီၤစိရိၤ (Jet fighter)ကဘီယူၤပညိၣ်လဲၤတ့ၢ်လီၤဝဲ ပီၣ် (၅၀၀)မ့ၢ်ပိၢ် (၄)ဖျၢၣ် လၢယိၤကျါကရူၢ် ယိၤကျါမုၢ်နုၥ်သဝီ တီၤခၢၣ်သးကၠိဒီး မုၢ်ထီၣ်သဝီတိၤဖုၣ်ကၠိ(၂)ဖျၢၣ်အံၤအပူၤန့ၣ်လီၤ.
သဝီဖိလၢအိၣ်ဘူးဖဲန့ၣ်တဂၤစံးဝဲလၢ“ကဘီယူၤဟဲတ့ၢ်လီၤပီၣ်(၅၀၀)မ့ၣ်ပိၢ်န့ၣ် ၄ ဖျၢၣ်. အခးလီၤဝဲလိၤလိၤလၢယိၤကျါသဝီ မုၢ်နုၥ်ကၠိဒီးသဝီမုၢ်ထီၣ်ကၠိခံဖျၢၣ်အံၤလီၤ.မ့မ့ၢ်ယိၤကျါမုၢ်ထီၣ်တကပၤခီန့ၣ် ကၠိတီၤဒၢးတၢ်သူၣ်ထီၣ် ဟးဂီၤ(၂)ဖျၢၣ်,မ့မ့ၢ်လၢမုၢ်နုၥ် တကပၤ န့ၣ်ကၠိတီၤဒၢးဟးဂီၤ(၃)ဖျၢၣ်လီၤကရဲလၢၥ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကဘီယူၤဟဲခးလီၤတၢ်ဘျီဝဲအံၤကၠိတီၤဒၢးတၢ်သူၣ်ထီၣ် လီၤပှီၢ်ဟးဂီၤဝဲဘၣ်ဆၣ် မ့မ့ၢ်ကမျၢၢ်န့ၣ်ဒိးန့ၢ်ဃၥ်တၢ်ကစီၣ်လၢကဘီယူၤ ကဟဲခးတၢ်အဃိ အဝဲသ့ၣ်ဟးပလဲၥ်မံဃၥ်လၢတၢ်ဘံၣ်တၢ်ဘၢလီၢ်အဖီခိၣ် တၢ်သံတၢ်ဘၣ်ဒိဘၣ်ထံးတအိၣ်ဝဲဘၣ်ဒီး သနါက့ ကမျၢၢ်ဟံၣ်တနီၤမ့ၣ်ပိၢ်အက့အခီဖျိးဘၣ်ဟးဂီၤအိၣ်ဝဲ ဘၣ်ဆၣ်မၤလီၤတံၢ်တန့ၢ်ဒံးဘၣ် အဂ့ၢ်န့ၣ် သဝီပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤလီၢ်ကဝီၤပှၤဘၣ်မူဘၣ်ဒါတဂၤ စံးဝဲ “တၢ်လီၢ်လၢကဘီယူၤဟဲခးလီၤတၢ်ခဲအံၤန့ၣ်တၢ်ဒုးကဲထီၣ် တအိၣ် နီမံၤဘၣ်. ဒ်သိးပှၤကၠိဖိသုတမၤလိဘၣ်တၢ်အဂီၢ်ပညိၣ်ဒီးဟဲ ခးလီၤဝဲ လီၤ. အဟဲတ့ၢ်လီၤမ့ၣ်ပၢ်(၄)ဖျၢၣ်န့ၣ် တ့ၢ်လီၤဝဲလၢ ယိၤကျါမုၢ်ထီၣ်သဝီကၠိ(၁)ဖျၢၣ်,မုၢ်နုၥ်သဝီကၠိ(၁)ဖျၢၣ်. လၢသဝီခိၣ်ထိးန့ၣ်တ့ၢ်လီၤဝဲ(၁)ဖျၢၣ်ဒီးအတပိၢ်ဖးထီၣ် ဒံးဘၣ်အိၣ် (၁)ဖျၢၣ် .” အဂ့ၢ်န့ၣ် စံးစ့ၢ်ကီးဝဲန့ၣ်လီၤ.
တကးဒံးဘၣ်ကဘီယူၤဟဲခးလီၤဝံၤတကတီၢ်ဃီ ကတၢတံၥ်ပယီၤသုးကလၢၤလၢအိၣ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ် အပူၤအံၤစ့ၢ်ကီးခးလီၤဆိဃီၤဝဲ(၁၂၀ မမ)ကျိဖးဒိၣ်(၃)ဖျၢၣ်ဆူယိၤကျါသဝီအံၤအပူၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖဲအပူၤကွံၥ်(၂၀၂၅)လါအီးကထိဘၢၣ် ၉ သီမုၢ်နၤခီအခါန့ၣ်စ့ၢ်ကီး ကဘီယူၤလဲၤတ့ၢ်လီၤဒံးမ့ၣ်ပိၢ်လၢယိၤကျါကရူၢ် ထံဖးဒိၣ်ထၣ် သဝီမုၢ်နုၥ် ကဘီယူၤပျီသဝီပူၤဒံးဒီး ဖဲန့ၣ်ခီဖျိပှၤဒိးန့ၢ်ဃၥ်တၢ်ကစီၣ်တအိၣ်ဘၣ် အဃိ ဖိသၣ်(၁၂)နံၣ်ဆူဖီလၥ်သံဒၣ်ဆှုၣ် မဲၥ်ကဲၤမဲၥ်ဖဲန့ၣ်(၅)ဂၤဒီးဘၣ်ဒိဘၣ်ထံးဝဲတစှၤန့ၢ်(၁၁)ဂၤအကျါပၣ်ဃုၥ်ဖိဒံ ဖိသၣ်သ့ၣ်တဖၣ်န့ၣ်လီၤ.
ဘံလ့ကီၢ်ပူၤလၢသုးမီၤစိရိၤပညိၣ်လဲၤခးလီၤဝဲတၢ်ခဲအံၤန့ၣ် သုးဟံန့ၢ်တၢ်စိတၢ်ကမီၤဝံၤလီၢ်ခံ ယိၤကျါသဝီအမဲၥ်ညါ ထံဆံၣ်ဘီကၠိ,သီခါဖၠၣ်ဒီးဃီဖိပျဲၢ်ကၠိ,သီခါဖၠၣ်ဃုၥ်ဒီးကၠိ,တၢ်ဘူၣ်တၢ်ဘါတၢ်သူၣ်ထီၣ်လၢအိၣ်သဝီလၢအဂၤတဖၣ် ပညိၣ်လဲၤတ့ၢ်လီၤဝဲမ့ၣ်ပိၢ်ကဲထီၣ် အိၣ်ဝဲတလီၢ်လီၢ်န့ၣ်လီၤ.