လါစဲးပထ့ဘၢၣ် ၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဒီး ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဒီးလဲၤတ့ၢ်လီၤဝဲဒြိမ့ၣ်ပိၢ်အဃိ ဖိသၣ်သံဝဲ(၂)ဂၤဒီး ကမျၢၢ်ပိၥ်မုၣ်ဘၣ်ဒိဘၣ်ထံး ဝဲ(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါစဲးပထ့ဘၢၣ် ၆ သီ ဟါခီ ၄း၄၅ မံးနံးအဆၢကတီၢ် တၢ်ဒုးကဲထီၣ်တအိၣ် လၢကၠဲးထိၣ်ကီၢ်ဆၣ် အံလူၢ်ကရူၢ် ညီၤထီၣ် (ညောင်ထောက်ကွက်သစ်)သဝီအပူၤ တၢ်ဒုးကဲထီၣ်တအိၣ် ပယီၤသုးခီၣ်ချ့သုးရ့ၣ်(၄၄)အဝဲၤလီၢ်ခိၣ်သ့ၣ် ခးလီၤဝဲ(၈၁ မမ) ကျိဖးဒိၣ်(၂)ဖျၢၣ်လီၤတဲၥ်ပိၢ်ဖးထီၣ်ဝဲလၢတိၤခိၣ်ထိးအံၤန့ၣ်လီၤ.
ခီဖျိလၢကျိဖးဒိၣ်အံၤအဃိ ဖိသၣ်မုၣ် နီၢ်အံၣ်ဖၠိမၠၣ်(၁၀)နံၣ်အံၤသံဝဲတဘျီဃီဖဲတၢ်ကဲထီၣ်သးန့ၣ်ဒီး အမိ နီၢ်သမံ(၄၆)အံၤစ့ၢ်ကီး ကျိဖးဒိၣ်အက့အခီဘၣ်ဝဲအကံကိၢ်တၢ်ဘၣ်ယိၣ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
“၄၄ အမျိၥ်သုးခးလီၤကျိဖးဒိၣ်အခီၣ်ထံးတဖျၢၣ်န့ၣ် ပှၤဒီဖိမိၢ်ခံဂၤန့ၣ်နၢ်ဟူဝဲဘျီစံၣ်လီၤလဲၤအိၣ်ခူသူၣ်ဝဲန့ၣ်. အစံၣ်လီၤအိၣ်ခူ သူၣ်အခါန့ၣ်ကျိဖးဒိၣ်လီၤတဲၥ်ကဒီးလၢအသီတဖျၢၣ်အဃိ ကျိဖးဒိၣ်အက့အခီန့ၣ်ဘၣ်ဝဲတၢ်ဖိသၣ်တဂၤန့ၣ်သံဝဲတဘျီဃီလီၤ” အဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
(သုးက့ ၁)ဟီၣ်ကဝီၤအမဲၥ်ညါဒ်န့ၣ်အသိးအပူၤကွံၥ်လါစဲးပထ့ဘၢၣ် ၄ သီအနံၤစ့ၢ်ကီး လၢဒူပျၥ်ယၥ်ကီၢ်ရ့ၣ်(သုးက့ ၆) ရၤမတံ ကီၢ်ဆၣ် ပှၤလီၢ်အိၣ်ကမှံတၢ်လီၢ်တတီၤအပူၤ ခီဖျိပယီၤသုးလဲၤကွံၥ်လီၤဝဲဒြိမ့ၣ်ပိၢ်အဃိ ဘၣ်သံဝဲဖိသၣ်(၄)နံၣ်တဂၤဒီး ကမျၢၢ် ပိၥ်မုၣ်(၄၁)နံၣ် တဂၤစ့ၢ်ကီးဘၣ်ဒိဘၣ်ထံးကဲထီၣ်ဒံးဝဲန့ၣ်လီၤ.
ကၠဲးထိၣ်ကီၢ်ဆၣ် အံလူၢ်ကရူၢ်လၢပယီၤသုးခးလီၤကျိဖးဒိၣ် ကမျၢၢ်သံဘၣ်ဒိဘၣ်ထံးခဲအံၤန့ၣ် အပူၤကွံၥ် ညီနုၢ်တၢ်ဒုးကဲထီၣ် တအိၣ်ဘၣ်ဘၣ်ဆၣ် ပယီၤသုးအံၤခးလီၤကျိဖးဒိၣ်ဒီးကဘီယူၤလဲၤခးလီၤတၢ်ကဲထီၣ်အိၣ်ဝဲတလီၢ်လီၢ်ဒီး တၢ်သံတၢ်ဘၣ်ဒိ ဘၣ်ထံး စ့ၢ်ကီးကဲထီၣ်ဝဲခဲအံၤခဲအံၤန့ၣ်လီၤ.
အဘူးကတၢၢ်အပူၤကွံၥ်လါအီကူး ၁၉ သီအခါစ့ၢ်ကီး ကၠဲးထိၣ်ကီၢ်ဆၣ်အပူၤ ခီဖျိလၢ(၃၁၀)အမျိၥ်သုးအံၤအဃိ ပလိၥ်ခံကရူၢ် (ဇီးပြောင်း) ပလိၥ်ခံ-၅ ကမျၢၢ်(၃)ဂၤလၢအပၣ်ဃုၥ်ဝဲဖိသၣ်ပိၥ်ခွါ(၅)နံၣ်အံၤသံဝဲဒၣ်ဒီး ဘၣ်ဒိဘၣ်ထံး(၈)ဂၤကဲထီၣ်ဒံးဝဲန့ၣ်လီၤ.