လါစဲးပထ့ဘၢၣ် ၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤ လၢသုးမီၤစိရိၤအတၢ်ခးလီၤ ကျိဖးဒိၣ်,ဒြိဒီးကဘီယူၤအတၢ်လဲၤခးလီၤတၢ်အံၤအဃိ ကမျၢၢ်ပိၥ်မုၣ်သံဝဲ(၆)ဂၤဒီးဘၣ်ဒိဘၣ်ထံး ဝဲ(၁၂)ဂၤအဂ့ၢ်န့ၣ် ကီၢ်ရ့ၣ်တလါတဘျီတၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.
မူကီၢ်ဆၣ်,လၢၢ်ဒိၣ်ကီၢ်ဆၣ်ဒီးဆီထံးကီၢ်ဆၣ်အပူၤ အပူၤကွံၥ်လါအီကူး ၁ သီတုၤ ၃၁ သီလၢတလါအတီၢ်ပူၤအံၤ ပယီၤသုးပညိၣ် ခးလီၤ ဝဲကျိဖးဒိၣ်(၁၆)ဘျီ ခးလီၤဝဲအသၣ်(၃၆)ဖျၢၣ်, လဲၤခးလီၤတၢ်ဒီးကဘီယူၤ(၆)ဘျီ တ့ၢ်လီၤဝဲအချံ(၈)ဖျၢၣ်ဒီး တကးဒံးဘၣ် လဲၤတ့ၢ်လီၤဒီးဒြိ(၁၂)ဘျီ တ့ၢ်လီၤဝဲအသၣ်(၁၆)ဖျၢၣ် ပၥ်ဖှိၣ်ခဲလၢၥ်(၅၆)ဖျၢၣ်ဆူကမျၢၢ်ဒူသဝီတၢ်ဖံးအီၣ်မၤအီၣ်လီၢ်ကျဲအံၤ န့ၣ်လီၤ.
ခီဖျိလၢသုးမီၤစိရိၤအတၢ်မၤထီဒါပှၤဂ့ၢ်ဝီခွဲးယၥ်တၢ်ဟူးတၢ်ဂဲၤသ့ၣ်တဖၣ်အံၤအဃိ ကမျၢၢ်ပိၥ်မုၣ်သံဝဲ(၆)ဂၤဒီး ဘၣ်ဒိဘၣ်ထံးဝဲ ပိၥ်မုၣ်(၃)ဂၤ,ပိၥ်ခွါ(၉)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤပၥ်ဖျါဝဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါ ခီဖျိလၢကျိဖးဒိၣ်လီၤတဲၥ်ပိၢ်ဖးထီၣ်,ကဘီယူၤအမ့ၣ်ပိၢ်ဒီးပယီၤသုးဒွဲၣ်အူအီၣ်ဝဲအဃိ ကမျၢၢ်ဟံၣ် အူအီၣ်ဟးဂီၤဝဲခဲလၢၥ်(၁၇)ဖျၢၣ်ဒီး ကျီၢ်သံတဒု,သိလ့ၣ်ယီၢ်(၂)ခိၣ်,ဘုဖီ(၁)ဖျၢၣ်ဟးဂီၤစ့ၢ်ကီးဝဲအသိး ပယီၤသုးဖီၣ်ဝဲလီၢ်ကဝီၤကမျၢၢ် ပိၥ်ခွါ(၁၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢသုးမီၤစိရိၤအတၢ်မၤထီဒါပှၤဟီၣ်ခိၣ်ဖိခွဲးယၥ်အတၢ်ဟူးတၢ်ဂဲၤအံၤအဃိ ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤလၢ ကမျၢၢ်သံဘၣ်ဒိ ဘၣ်ထံးကဲထီၣ်ကိးလါဒဲးအံၤန့ၣ် အပူၤကွံၥ်လါယူၤလံတလါအတီၢ်ပူၤန့ၣ်စ့ၢ်ကီး လီၢ်ကဝီၤကမျၢၢ်သံ(၅)ဂၤကဲထီၣ်ဒံးဝဲန့ၣ်လီၤ.
