လါစဲးပထ့ဘၢၣ် ၆သီ, ၂၀၂၆နံၣ်, ခ့ၣ်အဲးစံၣ်,
ခါလၢကဟဲလါအီးကထိဘၢၣ်၅သီအနံၤလၢအလီၤဘၣ်ဝဲဒၣ်ဟီၣ်ခိၣ်ဒီဖျၢၣ်ကၠိ သရၣ်မုၢ်နံၤ (World Teacher’s Day) အဂီၢ် ကညီကၠိသရၣ်ပှၤမၤသကိး တၢ်ကရူၢ် (Karen Teacher Working Group- KTWG) အိၣ်ဒီး တၢ်ကွဲး ပြၢလံၥ်ဆီရဲၣ် ဒီး ထါ လၢကီၢ်သူလ့ၤကၠိဖိဒီးကၠိသရၣ်/မုၣ်သ့ၣ်တဖၣ်အဂီၢ်အဂ့ၢ် သ့ၣ် ညါဘၣ်န့ၣ်လီၤ.
တၢ်ပြၢအံၤ တၢ်ကစးထီၣ်ဝဲဖဲ တလါအံၤ လါစဲးပထ့ဘၢၣ် (၁၀)သီအနံၤ ဒီး လီၢ်ခံကတၢၢ်တၢ်ကဘၣ် ဆှၢထီၣ်ဝဲ တၢ်ကွဲးသ့ၣ်တဖၣ် ဖဲ လါစဲးပထ့ဘၢၣ် (၂၅)သီ အနံၤအဂ့ၢ်, သ့ၣ်ညါဘၣ်န့ၣ်လီၤ.
တၢ်မၤဝဲ တၢ်ြပၢ အတၢ်ပညိၣ်ဒီး တၢ်မုၢ်လၢ်ကွၢ်စိတခီ မ့ၢ်ဒ်သိး တၢ်ကမၤလၤကပီၤဝဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤဒီး ကမၤလဲၤထီၣ်လဲၤထီၣ်ကညီကျိၥ်လံၥ်လဲၢ်တၢ်ကွဲး ဃုၥ်ဒီး တၢ်ပၥ်ဖျါ ထီၣ် ကၠိဖိဒီး ကၠိသရၣ်တဖၣ် အတၢ်ထံၣ်လၢကၠိသရၣ်တဖၣ်အဖီခိၣ်အဂ့ၢ်, (KTWG)တၢ်ဆဲးကျိးဆဲးကျၢ မူဒါခိၣ် နီၢ်စ ရံၣ်နၣ် စံးဝဲဒ်အံၤန့ၣ်လီၤ.
အဝဲစံးဝဲလၢ “ပတၢ်ြပၢတခါအံၤန့ၣ်မ့ၢ်ဒၣ်လၢ ပကမၤလၤကပီၤဝဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤလၢလါအီး ကထိ ဘၢၣ်ပူၤအဂီၢ်န့ၣ်လီၤ.ပအဲၣ်ဒိးမၤလၤကပီၤဝဲ ကၠိသရၣ်သရၣ်မုၣ်ကိးဂၤလၢ ဟ့ၣ်လီၤသးလၢတၢ်ကီတၢ်ခဲအပူၤတဖၣ် အသိး ပအဲၣ်ဒိးလၢ ကညီကျိၥ်လံၥ်လဲၢ်ကဂ့ၤထီၣ်ဝဲဒီး ပကထံၣ်သ့ၣ်ညါဘၣ်ဝဲ ကၠိဖိဒီး ကၠိသရၣ် သရၣ်မုၣ်တဖၣ် အ တၢ်ထံၣ် အတၢ်တူၢ်ဘၣ် အတၢ်ပၥ်သူၣ်ပၥ်သးဒီး တၢ်ပလၢၢ်ဘၣ် လၢ ကၠိသရၣ်တဖၣ်အဖီခိၣ်န့ၣ်လီၤ.” အဂ့ၢ်စံး ဝဲန့ၣ်လီၤ.
လံၥ်ဆီရဲၣ် ဒီး ထါ တၢ်ြပၢအံၤ မ့ၢ်ဝဲတၢ်အဆိကတၢၢ်တဘျီလၢ (KTWG) မၤဝဲလၢ တၢ်မၤလၤကပီၤ ဟီၣ်ခိၣ်ဒီဖျၢၣ်ကၠိ သရၣ်မုၢ်နံၤအဂီၢ်ဒီး လီၤဆီဒၣ်တၢ် တၢ်ြပၢအံၤ ကမ့ၢ်ဝဲဒၣ်ထဲ ကီၢ်သူလ့ၤဟီၣ်ကဝီၤပူၤ ကၠိဖိဒီး ကၠိသရၣ် သရၣ်မုၣ် တဖၣ်အဂီၢ်အဂ့ၢ် ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကးဒံးဘၣ်, တၢ်ပြၢအံၤ တၢ်နီၤဖးဝဲအီၤ ခံပတီၢ် လၢ ကၠိသရၣ်ဒီး ကၠိဖိတဖၣ် အဂီၢ်ဒီး ကၠိသရၣ်သရၣ်မုၣ်တဖၣ်အဂီၢ် ကမ့ၢ်ဝဲ လံၥ်ဆီရဲၣ်အတၢ်ကွဲးပြၢ ဒီး မ့မ့ၢ်လၢ ကၠိဖိ (၉) တီၤတုၤ (၁၂)တီၤဖိတဖၣ်အဂီၢ် တခီ ကမ့ၢ်ဝဲ (ထါဖိပြံအကလုၥ်) အဂ့ၢ်,ရၤလီၤဘိးဘၣ်ပၥ်ဖျါဝဲန့ၣ်လီၤ. တကတီၢ်ဃီ, ခိၣ်ဖးအဂီၢ် ကမ့ၢ်ဝဲ စ့ယိၤ (၁၀၀၀) ဘးတုၤ (၃၀၀၀)ဘး ဒီး တၢ်ြပၢ ပှၤမၤနၢၤတၢ်တဖၣ်အဂီၢ် တၢ်ကပၥ် ဖျါထီၣ်ဝဲဖဲ လါအီးကထိဘၢၣ် (၂)သီအနံၤအဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ရဲၣ်တၢ်ကျဲၤအံၤအဖီခိၣ် (KTWG) ကွဲမုၥ်ဝဲ ကီၢ်သူလ့ၤဟီၣ်ကဝီၤအပူၤ ကၠိသရၣ်သရၣ်မုၣ်ဒီး ကၠိဖိလၢ သးစဲဝဲတၢ်ကွဲးလံၥ်ကွဲးလဲၢ်တဖၣ် ကနုၥ်လီၤ ပၣ်ဃုၥ်ပၣ်ဂီၢ်ဝဲဒၣ် အသိး မုၢ်လၢ်ဝဲလၢ ကၠိဖိဒီး ကၠိသရၣ်သရၣ်မုၣ်တဖၣ် ကပၥ်ဖျါထီၣ် အတၢ်လဲၤခီဖျိ တၢ်ထံၣ်တၢ် တူၢ်ဘၣ် အါအါ အဂ့ၢ်, ပၥ်ဖျါဝဲ စ့ၢ်ကီးဝဲန့ၣ်လီၤ.
