လါစဲးပထ့ဘၢၣ် ၃သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ် မဲၢ်ဆီးဝ့ၢ် တရူးသီခါဖၠၣ်အပူၤ တရူးကလုၥ်တၢ်စူၢ်တၢ်နၥ် တၢ်မၤသ့ၣ်နီၣ်ထီၣ်က့ၤ မိၢ်ပၢ်ဖံဖု လုၢ်လၢ် ထူသနူ အဂီၢ် မဟါလါစဲးပထ့ဘၢၣ် (၂)သီအနံၤအပူၤ မၤဝဲတၢ်ဟ့ၣ်မၤဘူၣ်လီၤ ခီကီၢ်ပှၤမၤတၢ်ဖိဃုၥ်ဒီး ပှၤလၢလိၣ် ဘၣ်တၢ်မၤစၢၤတဖၣ် ဟုသးအဂ့ၢ်, သ့ၣ်ညါဘၣ်န့ၣ်လီၤ.
တၢ်ဟ့ၣ်မၤဘူၣ်လီၤဟုသးအတၢ်ရဲၣ်တၢ်ကျဲၤဘျီဝဲအံၤ မ့ၢ်တၢ်မၤဝဲအီၤ(၅၇)ဝီတဝီ ဒီး မဲၢ်ဆီးဝ့ၢ် ဒီး ခိၣ်ဃၢၤ ကီၢ်ပယီၤ ခီကီၢ်ပှၤမၤတၢ်ဖိဒီး ပှၤကီၢ်ပယီၤဖိလၢ အိၣ် ရၤမတံဝ့ၢ် တကပၤ လဲၤ ဟံးန့ၢ်ဝဲ တၢ်မၤဘူၣ်အံၤအိၣ်ဝဲအဂ့ၢ် သ့ၣ်ညါဘၣ် န့ၣ်လီၤ.
တၢ်ရဲၣ်တၢ်ကျဲၤအံၤ တၢ်ဟ့ၣ်လီၤဝဲ ဂံၢ်ခီၣ်ထံး တၢ်အီၣ် ဟုသးအဆံးတထၢၣ်, ညၣ်ဒၢ, ခီနီဃ့ သ့ၣ်တဖၣ်ဒီး ခဲလၢၥ်တၢ်မၤဘူၣ်လီၤအီၤ ဟုသးထၢၣ် (၆၀၀၀) အဂ့ၢ်သ့ၣ်ညါဘၣ်န့ၣ်လီၤ.
သးနံၣ်(၇၀)ခိၣ်ဃၢၤ ကီၢ်ပယီၤထံဖိကီၢ်ဖိပိၥ်မုၣ်လၢ အိၣ် မဲၢ်ဆီးဝ့ၢ် ဘၣ်ဆီၤခွဲ တဂၤစံးဝဲလၢ “အဝဲသ့ၣ်မၤဘူၣ်ကိးနံၣ်ဒဲးအဃိ ယဟဲဟံးန့ၢ်ကိးနံၣ်လီၤ.ပဟဲဟံးတၢ် ကဲထီၣ်တၢ်သူၣ်ခုသးခုလၢပဂီၢ်လီၤ” အဂ့ၢ် စံးဝဲန့ၣ်လီၤ.
ပှၤလၢအလဲၤဟံးန့ၢ် ဟုသးတၢ်မၤဘူၣ်လီၤသ့ၣ်တဖၣ်အံၤ ကအိၣ်ဒီး တၢ်သိၣ်တၢ်သီတၢ်ဘျၢအဂီၢ် ဘၣ်ဟံးန့ၢ်ဝဲ စုတၢ်မၤနီၣ် အဂီၤ, အဘီ, အဂီၤဘီၣ် ဒီး အလါသ့ၣ်တဖၣ်လၢ တၢ်မၤနီၣ်ဃၥ်ဝဲအိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, ဒ်တၢ်ပၥ်လီၤတၢ်ဘျၢပၥ်ပနီၣ်ဝဲတၢ်ဆၢကတီၢ်မုၢ်ဃ့ၢ်လီၤ(၂)နၣ်ရံၣ်တုၤ(၄)နၣ်ရံၣ် အသိး တၢ်မၤနီၣ် စုအလွဲၢ်သ့ၣ်တဖၣ် ဘၣ်လဲၤဟံးန့ၢ်ဝဲ တၢ်ဖိတၢ်လံၤန့ၣ်လီၤ.
တရူးသီခါဖၠၣ် တၢ်မၤဘူၣ်ဟုသးတၢ်ရဲၣ်တၢ်ကျဲၤအပူၤ ကၠီၣ်တဲၣ်ပှၤဘၣ်မူဘၣ်ဒါတဖၣ် မၤဝဲတၢ်ဖီၣ်သမံသမိးတအိၣ်ဘၣ်ဒီး ပှၤကိးဂၤဒဲး လဲၤဟံးန့ၢ်ဝဲ သဘျ့သ့ကိးဂၤ အဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, မဟါတၢ်မၤဘူၣ်ဟုသးတၢ်ရဲၣ်တၢ်ကျဲၤအပူၤ ကီၢ်ပယီၤ-ကီၢ်ကၠီၣ်တဲၣ် တၢ်ပဲၥ်ဖးနီၤဖးတအိၣ်ဝဲအမဲၥ်ညါ, ကီၢ်ပယီၤဖိတဖၣ်အါက့ၢ်လဲၤဟံးန့ၢ်ဝဲဒီး ကၠီၣ်တဲၣ်ထံဖိကီၢ်ဖိတနီၤလဲၤဟံးန့ၢ်ဝဲအိၣ်ဝဲအဂ့ၢ် ပှၤမၤဘူၣ်တၢ်တကပၤစံးဝဲန့ၣ်လီၤ.