လါအီးကထိဘၢၣ် ၁၉သီ, ၂၀၂၆နံၣ်, ခ့ၣ်အဲးစံၣ်,
ပှၤဒုးအိၣ်ထီၣ် မဲၢ်တီၢ် တၢ်ဆါဟံၣ် (Mae Tao Clinic) ကသံၣ်သရၣ်မုၣ်ဖးဒိၣ် ဒီကထၢၣ်စ့ၣ်သံၣ်ယၣ်မီၤအံၤ လၢ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဂ့ၢ်ဝီအဂီၢ် ကတိၤပၥ်ဖျါထီၣ်ဝဲ ပှၤကညီတၢ်ဒိသူၣ်ဒိသးတၢ်ဆီၣ်ထွဲမၤစၢၤတၢ်အိၣ်သး ဆူ ယပၣ်ထံကီၢ်ပဒိၣ် တဖၣ်အအိၣ်အဂ့ၢ်, ယပၣ်ထံဂုၤကီၢ်ဂၤကိၥ်တိၥ်ဝဲၤကျိၤ တၢ်ဘိးဘၣ်ပၥ်ဖျါ ရၤလီၤပၥ်ထီၣ်ဝဲ န့ၣ် လီၤ.
ဒီကထၢၣ်စ့ၣ်သံၣ်ယၣ်မီၤ အံၤ လၢအိၣ်ကံၣ်နၣ်ဝၣ်တၢ်မုၥ်တၢ်ခုၣ် တၢ်လၤကပီၤ (Okinawa Peace Prize) အဂီၢ် အပူၤကွံၥ် လါအီကထိဘၢၣ် (၁၆)သီအနံၤအပူၤ လဲၤဝဲဒၣ်ဆူ ယပၣ်ထံကီၢ်ဒီး ထံၣ်လိၥ်ဆိတ့ၢ်ဝဲအသးဒီး ယပၣ် ထံဂုၤ ကီၢ်ဂၤဘျီၣ်ဒိၣ်ကရၢခၢၣ်စး ကိၥ်တိၥ်ဝဲၤကျိၤခိၣ်(၂) မံးစထၢၣ် အၣ်ကံၤကိၤ အံၤကံၤနၣ် (Akiko Ikina)အဂ့ၢ်, သ့ၣ်ညါ ဘၣ် န့ၣ်လီၤ.
ဒီးအဝဲတၢ်ထံၣ်လိၥ်သးအပူၤ, ကတိၤပၥ်ဖျါထီၣ်ဝဲ ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ဒီတကျိၤ ပှၤကညီတၢ်ဒိသူၣ်ဒိသး ဂ့ၢ်ဝီတၢ်အိၣ်သးတဖၣ်ဆူယပၣ်ပဒိၣ်ပပှၢ်တဖၣ်အအိၣ်ဒီး ဒီး စံးဘျူးဘၣ်ဝဲ ယပၣ်ထံကီၢ်ပဒိၣ် ဒီး ယပၣ်ထံကီၢ် (NGO) တၢ်ကရၢကရိလၢ အဆီၣ်ထွဲမၤစၢၤတၢ်တဖၣ်အဂ့ၢ်, ယပၣ်ထံဂုၤကီၢ်ဂၤ ပၥ်ဖျါဝဲဒၣ်န့ၣ်လီၤ.
လၢန့ၣ်အမဲၥ်ညါ, ဒီကထၢၣ်စ့ၣ်သံၣ်ယၣ်မီၤ အတၢ်ဟ့ၣ်လီၤသးလၢ ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ပှၤဘၣ်ကီ ဘၣ် ခဲဖိတဖၣ် တၢ်အိၣ်ဆူၣ်အိၣ်ချ့, တၢ်ကူၣ်ဘၣ်ကူၣ်သ့ဒီး တၢ်ဆီၣ်ထွဲမၤစၢၤလၢ အဂၤတဖၣ်အဂီၢ် လၢ နံၣ်ယံၥ် လါအါ အဖီခိၣ်, ယပၣ် ထံဂုၤကီၢ်ဂၤ ဘျီၣ်ဒိၣ်ကရၢခၢၣ်စး ကိၥ်တိၥ်ဝဲၤကျိၤခိၣ်(၂) ပၥ်လၤပၥ်ကပီၤ ဟ့ၣ်ဝဲတၢ်ယူးယီၣ် အဂ့ၢ်, ပၥ်ဖျါထီၣ်ဝဲဒၣ်န့ၣ်လီၤ.
ဒီကထၢၣ်စ့ၣ်သံၣ်ယၣ်မီၤ အတၢ်ဒိးန့ၢ်ဘၣ်(Okinawa Peace Prize) တၢ်မုၥ်တၢ်ခုၣ်အတၢ်လၤကပီၤအဖီခိၣ်, ကတိၤ စံးဘျူး စံးဖှိၣ် ဝဲ ယပၣ် ခိၣ်နၢ်တဖၣ်အသိး, ဘၣ်ဃးဒီး ထံဆၢကီၢ်ဆၢ ပှၤကညီတၢ်ဒိသူၣ်ဒိသးဂ့ၢ်ဝီ တၢ်အိၣ် သး အတၢ်ပၥ်ဖျါအဖီခိၣ် ကီၢ်ပယီၤထံဖိကီၢ်ဖိ ကမျၢၢ်တဖၣ်အတၢ်အိၣ်မူ ကလဲၤထီၣ်လဲၤထီအဂီၢ် ကဆဲးဟ့ၣ်ဝဲ ပှၤကညီ တၢ်ဒိသူၣ်ဒိသးဂ့ၢ်ဝီအဂ့ၢ်, ယပၣ်ထံကီၢ် ပဒိၣ် တကပၤ ကတိၤပၥ်ဖျါက့ၤဝဲန့ၣ်လီၤ.
ဒီကထၢၣ် စ့ၣ်သံၣ်ယၣ်မီၤအံၤ သူၣ်ထီၣ်ဝဲ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်တီၢ်တၢ်ဆါဟံၣ်(Mae Tao Clinic) ဖဲ(၁၉၈၉)နံၣ်ဒီး လၢကီၢ်ဆၢ ဒီတကျိၤအဂီၢ် ဟ့ၣ်ဝဲတၢ်အိၣ်ဆူၣ်အိၣ်ချ့တၢ်ကဟုကယၥ်, တၢ်ကူၣ်ဘၣ်ကူၣ်သ့ တၢ်ဆီၣ် ထွဲမၤစၢၤ အမဲၥ်ညါ, (၂၀၂၁)နံၣ် သုးဟံးန့ၢ်တၢ်စိကမီၤအလီၢ်ခံ,ဟ့ၣ်ဝဲဆူၣ်ချ့တၢ်ကဟုကယၥ်လၢ လီၢ်အိၣ်ပှၤဃ့ၢ်မှံ ဟးဖျိး ဒီး တၢ်ဘၣ်ဒိဘၣ်ထံး တဖၣ် အဖီခိၣ် န့ၣ်လီၤ.
ဒီးအဝဲတီခိၣ်ရိၣ်မဲတၢ်ဆါဟံၣ်အံၤ စးထီၣ်လၢ (၁၉၉၉)နံၣ် တုၤလၢ (၂၀၂၂)နံၣ်အပူၤ ဒိးန့ၢ်ဘၣ်ဝဲ တၢ်လၤကပီၤဒိၣ် ထီတဖၣ် အိၣ်ဝဲလၢ အခါ(၂၀) ဘျဲၣ်ဃၣ်ဃၣ်လံအသိး, တနံၣ်အံၤ(၂၀၂၆)နံၣ်အပူၤ ဒိးန့ၢ်ဘၣ်ကဒီးဝဲ အိၣ်ကံၣ် နၣ်ဝၣ် တၢ်မုၥ်တၢ်ခုၣ် အတၢ်လၤကပီၤ(Okinawa Peace Prize)အဂီၢ် ဒိးန့ၢ်ဘၣ်ဝဲ ယပၣ်စ့ ယါ (၁၀)ကလီၢ် အဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး, လၢတၢ်လၤကပီၤအံၤအဂီၢ် တနံၤအံၤလါအီးကထိဘၢၣ် (၁၉)သီအနံၤအပူၤ တၢ်မၤဝဲတၢ်ရဲၣ်တၢ်ကျဲၤလၢ ယပၣ်ထံကီၢ် အိၣ်ကံၣ်နၣ်ဝၣ်ကီၢ်ရ့ၣ် နၣ်ဟၣ်ဝ့ၢ်အပူၤ ဒီး ဒီကထၢၣ်စ့ၣ်သံၣ်ယၣ်မီၤ အနီၢ်ကစၢ်ဒၣ်ဝဲ ထီၣ်ဟံးန့ၢ်ဝဲဒၣ် အဂ့ၢ်, သ့ၣ်ညါဘၣ်န့ၣ်လီၤ.
