လါစဲးပထ့ဘၢၣ် ၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်, ကၠဲးထိၣ်ကီၢ်ဆၣ် ဒီး သထူၣ်ကီၢ်ဆၣ် ဟီၣ်ကဝီၤအပူၤ လါအီကူး ၁ သီတုၤ ၃၁ သီ လၢတလါအတီၢ်ပူၤ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်လဲၤခးဝဲပယီၤသုး (၁၄)ဘျီအဂ့ၢ်န့ၣ် ကီၢ်ရ့ၣ်တလါတဘျီတၢ်မၤစရီပူၤအသိး သ့ၣ်ညါဘၣ်န့ၣ်လီၤ.
ဒ်တၢ်မၤနီၣ်စရီပူၤအိၣ်ဝဲအသိးန့ၣ် တလါအတီၢ်ပူၤတၢ်ပၢၢ်ဆၢသုးပၥ်ဖှိၣ်ကရူၢ်လဲၤခးစဲးပြဲးဝဲပယီၤသုး(၈)ဘျီ, လဲၤခးဝဲဒီးဒြိ(၃)ဘျီ, ရီးကဲးကျိသၣ်(၂)ဘျီ ဒီး ခိးထုးဝဲဒီးမ့ၣ်ပိၢ်(၁)ဘျီ ပၥ်ဖှိၣ်ခဲလၢၥ်(၁၄)ဘျီန့ၣ်လီၤ.
တၢ်လဲၤခးပယီၤသုးဘျီဝဲအံၤမ့ၢ်ဝဲဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂, သုးရ့ၣ်-၃ ဒီး ကညီဒီကလုၥ် ဂၢၤသးကရၢ(KNDO) သုးရ့ၣ်-၂ သုးပၥ်ဖှိၣ်သ့ၣ်တဖၣ်ဒီး ဒ်န့ၣ်အသိးလၢတၢ်ခးလိၥ်သးအပူၤ သံတအိၣ်ဘၣ်ဒိဝဲ (၅)ဂၤ ဒီး မၤန့ၢ်ဃုၥ်ဝဲ ပယီၤသုးအဒြိတဘ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်လၢတလါအတီၢ်ပူၤအံၤ ပယီၤသုးခးလီၤဝဲကျိဖးဒိၣ်(၂)ဘျီဆူလီၢ်ကဝီၤကမျၢၢ်အိၣ်ဆိးလီၢ်ကျဲအဃိ ဖိသၣ်(၅)နံၣ်သံဝဲ တဂၤဒီး ဘၣ်ဒိဘၣ်ထံး(၁၃)ဂၤအကျါပၣ်ဃုၥ်ဝဲဖိသၣ်(၁၀-၁၉)နံၣ်အဘျၢၣ်စၢၤအံၤ(၈)ဂၤဒီး ကမျၢၢ်ဟံၣ်ဟးဂီၤဝဲ(၂)ဖျၢၣ်စ့ၢ်ကီး န့ၣ်လီၤ.
(သုးက့ ၁)ဟီၣ်ကဝီၤအပူၤ တချုးလါအီကူးဒံးဘၣ်ဖဲလါယူၤလံအခါန့ၣ်စ့ၢ်ကီး ခံခီခံကပၤအဘၢၣ်စၢၤဒုးယၤတၢ်ဖ့ၣ်စၢကဲထီၣ်ဝဲ (၂၂)ဘျီဒီး ဖဲန့ၣ်ပယီၤသုးတကပၤသံ(၁၀)ဂၤ,ဘၣ်ဒိ(၁၅)ဂၤအသိး ခီဖျိလၢကျိဖးဒိၣ်,ကဘီယူၤဒီးပယီၤသုးနုၥ်လီၤဒွဲၣ် အူအီၣ်ဝဲအံၤ အဃိ ကမျၢၢ်ဘၣ်ဒိတဂၤဒီးဟံၣ်တစှၤန့ၢ်(၁၇)ဖျၢၣ်ဟးဂီၤဘၣ်ဒိဘၣ်ထံးဝဲတကးဒံးဘၣ်သိလ့ၣ်ဟးဂီၤစ့ၢ်ကီးဝဲ(၃)ခိၣ် ဒံးန့ၣ်လီၤ.