လါစဲးပထ့ဘၢၣ် ၁၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ်အပူၤ သုးမီၤစိရိၤအသုးဖိလၢပၣ်ဃုၥ်လၢသုးကျိၤအတၢ်ဟဲထီၣ်ပူၤအံၤတဂၤ ဟဲက့ၤဟ့ၣ်လီၤစုကဝဲၤအသိး KNLA သုးပၥ်ဖှိၣ်ထီၣ်ခးမၤန့ၢ်ဝဲပယီၤသုးအကျိ (၃)ခိၣ် အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါ ဝဲန့ၣ်လီၤ.
လၢကထီၣ်ဒိၣ်စိက့ၤဖၣ်ပူၣ်အံၤအဂီၢ် ပယီၤသုးလၢအဟဲထီၣ်ဟူးဂဲၤဖဲကမၤမိၢ်-ကတၢတံၥ်ကျဲအံၤတဖၣ်လၢတၢ်ဆီၣ်ဘံၣ်ဆီၣ်ဘၢ တၢ်အိၣ်သးအကလုၥ်ကလုၥ်အဖီခိၣ် စံၣ်ဖျိးထီၣ်အိၣ်တပယူၥ်ဃီဒီး ဖဲလါစဲးပထ့ဘၢၣ် ၁၃ သီအခါစ့ၢ်ကီး လၢဖါလိဖိဟီၣ်ကဝီၤပူၤ သုးဖိသီ(၁)ဂၤစံၣ်ဖျိးထီၣ်ဟဲက့ၤပၥ်လီၤစုကဝဲၤဆူကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁၀၂ အအိၣ်န့ၣ်လီၤ.
ပယီၤသုးလၢအဟဲက့ၤပၥ်လီၤစုကဝဲၤခဲအံၤန့ၣ်မ့ၢ်ဝဲ (စကခ-၁၂)စုတီၤဖီလၥ် ခီၣ်ချ့သုးရ့ၣ်(ခမရ-၃၅၇)အပှၤ အီၤစီၣ်မၠိ(၄၀)နံၣ်ဒီး ဟဲက့ၤစိၥ်ဃုၥ်ဝဲ MA-1 တခိၣ်, အဆၣ်ဒၢ(၃)ခါဒီး BA-100 တခိၣ်ဒီးအချံ(၃)ဖျၢၣ်ဒီး ကျိချံပှၥ်သၣ်လၢအဂၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
တကးဒံးဘၣ်ပယီၤသုးဟဲက့ၤပၥ်လီၤစုကဝဲၤဝံၤမုၢ်ဆ့ၣ်ထီၣ်လါစဲးပထ့ဘၢၣ် ၁၄ သီအနံၤစ့ၢ်ကီး ပယီၤသုးလၢဟဲထီၣ်ဟူးဂဲၤဖဲ ကမၤမိၢ်-ကတၢတံၥ်ကျဲ ဝၣ်သိခိၣ်ဟီၣ်ကဝီၤပူၤအံၤတဖၣ်ဒီး(KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်အတီၢ်ပူၤ တၢ်ပၢၢ်ဆၢ သုးကရူၢ်မၤန့ၢ်စ့ၢ်ကီးဝဲ MA-1 ကျိ(၃)ခိၣ်န့ၣ်လီၤ.
ဘၣ်ဃးပယီၤသုးဟဲက့ၤပၥ်လီၤစုကဝဲၤအံၤန့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲလၢ “သုးကျိၤတဘိန့ၣ် ဒ်ပတဲတ့ၢ်ဃၥ်တၢ်အိၣ်သးအသိးလီၤ စံၣ်ဖျိးမၢ်မၢ်လီၤ. ခဲအံၤအပှၤဟဲက့ၤစံၣ်ဖျိးထီၣ်ကဒီးတဂၤလံ. အပှၤလၢအစံၣ် ဖျိးထီၣ်ဒီး ဟဲက့ၤပၥ်လီၤစုကဝဲၤတဖၣ်အံၤအါဒၣ်တက့ၢ်ပှၤသုးဖိသီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ကမၤမိၢ်-ကတၢတံၥ်ကျဲ စးထီၣ်ဖဲလါမ့ၤပယီၤသုးကျိၤဟဲထီၣ်ဟူးဂဲၤတုၤလၢလါအီကူးလၢ(၄)လါအတီၢ်ပူၤအံၤ အပှၤသုးဖိ စံၣ်ဖျိးထီၣ်ဟဲက့ၤပၥ်လီၤစုကဝဲၤလၢတၢ်ပၢၢ်ဆၢကရူၢ်ကရၢအိၣ် အိၣ်ဝဲ(၄၀)ဂၤခိၣ်ဃၢၤလံဒီး ဒ်န့ၣ်အသိးလၢခံခီခံ ကပၤ တၢ်ဒုးအပူၤစ့ၢ်ကီး(KNLA)မၤန့ၢ်ဝဲကျိတစှၤန့ၢ်(၂၀)ခိၣ်လံအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်အပူၤ န့ၣ်လီၤ.
ဒ်ခ့ၣ်အဲၣ်ယူၣ် အတၢ်ပၥ်ဖျါပူၤပၥ်ဖျါဝဲအသိးန့ၣ် လီၢ်ခံအံၤပယီၤသုးဖိသီလၢအဟဲက့ၤပၥ်လီၤစုကဝဲၤတဖၣ် ထံၣ်ဝဲလၢသုးမီၤစိရိၤ တဖုအံၤမၤထီဒါဝဲပှၤဂ့ၢ်ဝီခွဲးယၥ်တပယူၥ်ဃီအဖီခိၣ် အဝဲသ့ၣ်အံၤတအဲၣ်ဒိးအိၣ်ဝဲဖဲန့ၣ်လၢၤဘၣ်အဃိ စံၣ်ဖျိးထီၣ်ဒီး ဟဲက့ၤဟ့ၣ်လီၤသးလၢတၢ်ပၢၢ်ဆၢကရူၢ်ကရၢအိၣ်ဘၣ်ဟဲအါထီၣ်ဝဲဒ်အံၤလီၤအဂ့ၢ်န့ၣ် (သုးက့ ၅)စံးဝဲန့ၣ်လီၤ.