လါစဲးပထ့ဘၢၣ် ၁၅ သီ, ၂၀၂၆ နံၣ်, ခ့ၣ်အဲးစံၣ်
ကရ့ၣ်ကီၢ်စဲၣ်တၢ်ပၢဟီၣ်ကဝီၤ အပူၤကွံၥ်လါအီကူးတလါအတီၢ်ပူၤ သုးမီၤစိရိၤထီဒါမၤထီဒါဝဲပှၤဂ့ၢ်ဝီခွဲးယၥ်ကဲထီၣ်(၃၀)ဘျီ ဒီး ဖဲန့ၣ်လီၢ်ကဝီၤကမျၢၢ်သံ(၉)ဂၤ,ဘၣ်ဒိဘၣ်ထံးဝဲ(၄၂)ဂၤအဂ့ၢ်န့ၣ် ကရ့ၣ်နံၣ်ဂ့ၢ်ဝီခွဲးယၥ်ကရူၢ်(KnHRG)ထုးထီၣ်ပၥ်ဖျါဝဲဒၣ်န့ၣ်လီၤ.
ဒ်(KnHRG)အလံၥ်တၢ်ပၥ်ဖျါပူၤအသိးန့ၣ် တလါအတီၢ်ပူၤ ဖရူၤစိၤ,လွဲၤကီၤ,ဒံၤမီၣ်စိၤဒီးဖဲၤခိၣ်ဟီၣ်ကဝီၤအပူၤ ကဘီယူၤလဲၤခး လီၤတၢ်(၂)ဘျီ, ခးလီၤကျိဖးဒိၣ်(၃)ဘျီ,လဲၤတ့ၢ်လီၤဒြိမ့ၣ်ပိၢ်(၁၆)ဘျီ,မၤသံဒီးခးသံဝဲကမျၢၢ်ကဲထီၣ်(၂)ဘျီ,ဖီၣ်ဝဲကမျၢၢ်(၅)ဘျီဒီး ဒွဲၣ်အူအီၣ်ဝဲကမျၢၢ်ဟံၣ်(၂)ဘျီအဃိ သုးမီၤစိရိၤမၤထီဒါဝဲပှၤဂ့ၢ် ဝီခွဲးယၥ်ပၥ်ဖှိၣ်ကဲထီၣ်ဝဲ(၃၀)ဘျီန့ၣ်လီၤ.
ဒီးခီဖျိလၢသုးမီၤစိရိၤအတၢ်ဟူးတၢ်ဂဲၤသ့ၣ်တဖၣ်အံၤအဃိ ကမျၢၢ်ပိၥ်မုၣ်(၆)ဂၤ,ပိၥ်ခွါ(၂)ဂၤ,ဖိသၣ်(၁)ဂၤပၥ်ဖှိၣ်ခဲလၢၥ်(၉)ဂၤ ဘၣ်သံဝဲဒၣ်ဒီး တကးဒံးဘၣ်ကမျၢၢ်ပိၥ်ခွါ(၃၀)ဂၤ,ပိၥ်မုၣ်(၉)ဂၤဒီးဖိသၣ်(၄)ဂၤ ပၥ်ဖှိၣ်ခဲလၢၥ်(၄၃)ဂၤဘၣ်ဒိဘၣ်ထံးဝဲစုၥ်စုၥ် န့ၣ်လီၤ.
လၢန့ၣ်အမဲၥ်ညါကမျၢၢ်ဟံၣ်(၃၁)ဖျၢၣ်, ကၠိတၢ်သူၣ်ထီၣ်(၃)ဖျၢၣ်, သိလ့ၣ်(၆)ခိၣ်, တိၤ(၁)ဘိဟးဂီၤဘၣ်ဒိဘၣ်ထံးဝဲအသိး တၢ်ဖံးအီၣ်မၤအီၣ်လီၢ်ကျီးဃုၥ်ဒီးဆၣ်ဖိကီၢ်ဖိတဖၣ်ဘၣ်ဒိဘၣ်ထံးအိၣ်ဝဲစ့ၢ်ကီးအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
သုးမီၤစိရိၤအံၤဒ်သိးကမျၢၢ်ထံဖိကီၢ်ဖိတၢ်အီၣ်တၢ်အီကတဲၥ်ကွံၥ်အဂီၢ် သူဝဲဒၣ်ဒြိမ့ၣ်ပိၢ်ပညိၣ်ပၥ်ဝဲတၢ်ခးပနီၣ်တဖၣ်ဆူ ကမျၢၢ်ထံဖိကီၢ်ဖိအတၢ်ဖံးအီၣ်မၤအီၣ်လီၢ်ကျဲတဖၣ်အဂ့ၢ်န့ၣ် KnHRG စံးစ့ၢ်ကီးဝဲန့ၣ်လီၤ.
တကးဒံးဘၣ်လၢသုးမီၤစိရိၤအသုးကျိၤတၢ်ဟဲထီၣ်ဒီးသူဝဲဒၣ်ဒြိမ့ၣ်ပိၢ်ဟးတ့ၢ်လီၤဝဲတၢ်အံၤအဃိ လီၢ်ကဝီၤကမျၢၢ်ပှၤလီၢ်အိၣ်ကမှံဖိ အဂၤ(၃၀၀)ဘျဲၣ် ဘၣ်ဃ့ၢ်ထီၣ်သုးလီၢ်သုးကျဲကဒီးဆူတၢ်လီၢ်အဂၤဒီး သံဘၣ်ဒိဘၣ်ထံးအနီၣ်ဂံၢ်နီၣ်ဒွၣ်ဘၣ်ဟဲအါထီၣ်ဝဲ န့ၣ်လီၤ.
တကီၢ်ခါခဲအံၤကရ့ၣ်ကီၢ်စဲၣ်အပူၤ တၢ်အိၣ်မူဆူညါအဂီၢ်လီၢ်ကဝီၤကမျၢၢ်တဖၣ်ဘၣ်ဖံးဘၣ်မၤဘၣ်ဂဲၤပျုၢ်ဂဲၤဆှးဝဲဒီး သဂၢၢ်ဘၣ်ဝဲတၢ်ဂၢၢ်တၢ်ကျၤတၢ်လီၤတံၢ်လီၤဆဲးတအိၣ်တၢ်ဂ့ၢ်ကီတဖၣ်န့ၣ်လီၤ.
အဃိတၢ်မၤထီဒါပှၤဂ့ၢ်ဝီခွဲးယၥ်လၢသုးမီၤစိရိၤမၤဝဲအံၤဒ်သိးကဆံးလီၤစှၤလီၤအဂီၢ် ကတြီဝဲတၢ်ဆါန့ၢ်ကဘီယူၤသိ, ကျိချံပှၥ်သၣ် အံၤဒီး ထံဂုၤကီၢ်ဂၤကဟံထီၣ်ဖီၣ်ထီၣ်ဂ့ၢ်ဝီတဲၥ်တဲၥ်ဖျုဖျုလၢသုးမီၤစိရိၤအဖီၣ်တကးဒံးဘၣ် ကမျၢၢ်ပှၤလီၢ်အိၣ်ကမှံ(၂၀၀၀၀၀) လၢအလိၣ်ဘၣ်ပှၤဂ့ၢ်ဝီတၢ်ဆီၣ်ထွဲမၤစၢၤအံၤ ပဟ့ၣ်ဝဲတၢ်ဆီၣ်ထွဲမၤစၢၤလၢအဆိအချ့အဂ့ၢ်န့ၣ် KnHRG ဆီၣ်တခူ ဃ့ထီၣ်ဝဲဒၣ်န့ၣ်လီၤ.
