လါစဲးပထ့ဘၢၣ် ၁၇ သီ, ၂၀၂၆ နံၣ်, ခ့ၣ်အဲးစံၣ်
ကညီဒီကလုၥ်သုးမုၢ်ဒိၣ်(KNA),တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီးကညီတၢ်မုၥ်တၢ်ခုၣ်ကီၣ်ကးကရၢ (KNU/KNLA-PC)ဖီၣ်စုကဝဲၤကရူၢ်လၢအပၣ်ဃုၥ်ဝဲလၢတၢ်မၤလိၣ်ထီၣ်ကညီဒီကလုၥ်တၢ်မုၥ်တၢ်ခုၣ်ကမံးတံၥ်(KNPC)အပူၤ အံၤ လၢကမျၢၢ်ပှၤဃ့ၢ်မှံဟးဖျိးဒီး တၢ်မုၥ်တၢ်ခုၣ်တၢ်ဂ့ၢ်တၢ်ကျိၤအဂီၢ် ကထံၣ်လိၥ်တဲသကိးတၢ်ဒီးကီၢ်စဲၣ်သုးမီၤစိရိၤပဒိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်တလါအံၤလါစဲးပထ့ဘၢၣ် ၇ သီ လၢရၤမတံဝ့ၢ်(မၠၣ်ဝတံၣ်)ကလံၤထံး စွ့ၤကိၣ်ကိၤဟီၣ်ကဝီၤအပူၤန့ၣ် (KNPC)ကမံး တံၥ် ခိၣ်နၢ်, တၢ်တီခိၣ်ရိၣ်မဲဒီးပၢဆှၢရဲၣ်ကျဲၤကမံးတံၥ် မၤဝဲအဆိကတၢၢ်တဘျီတၢ်အိၣ်ဖှိၣ်အံၤဒီး လၢတၢ်အိၣ်ဖှိၣ်အပူၤ ဘၣ်တၢ်ဆၢတဲၥ်လီၤဝဲ တၢ်ဂ့ၢ်သ့ၣ်တဖၣ်အကျါပၣ်ဃုၥ်ဝဲတၢ်ဂ့ၢ်ခံထံၣ်အံၤအဂ့ၢ်န့ၣ် ပှၤလၢအလဲၤထီၣ်ပၣ်ဃုၥ်ပၣ်ဂီၢ်လၢ တၢ်အိၣ်ဖှိၣ်အံၤအပူၤတဖၣ် စံးဝဲန့ၣ်လီၤ.
“တခါန့ၣ်တၢ်ဆၢတဲၥ်ဝဲလၢပကလဲၤမၤစၢၤကမျၢၢ်လၢအဘၣ်ဃ့ၢ်မှံဟးဖျိးတဖၣ်ဒီးလၢအဂၤတခါန့ၣ်တၢ်အိၣ်သးမ့ဟ့ၣ်ပှၤန့ၣ် လၢတၢ်မုၥ်တၢ်ခုၣ်အဂ့ၢ်အကျိၤအဂီၢ် ပ(KNPC)အံၤ ကထံၣ်လိၥ်တဲသကိးတၢ်ဒီးကီၢ်စဲၣ်ပဒိၣ်ပပှၢ်သ့ၣ်တဖၣ်အိၣ်ဝဲ”အဂ့ၢ်န့ၣ် (KNPC)ပှၤပၢၤလီၢ်ဆ့ၣ်နီၤ မါအီၤပၠ့ၤစိ စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲမဟါအနံၤန့ၣ်လီၤ.
တကးဒံးဘၣ်တၢတဘျီ(KNPC)တၢ်အိၣ်ဖှိၣ်အခါန့ၣ် လၢတၢ်ကလဲၤထံၣ်တဲသကိးတၢ်ဒီးကီၢ်စဲၣ်သုးမီၤစိရိၤပဒိၣ်အံၤအဂီၢ် တၢ်ဃုထၢထီၣ်ဝဲခိၣ်နၢ်ခၢၣ်စးအိၣ်ဝဲဘၣ်ဆၣ် တဲလီၤတံၢ်မုၢ်နံၤမုၢ်သီတဘၣ်ဒံးဘၣ်အဂ့ၢ်န့ၣ် မါအီၤပၠံၤစိ စံးဝဲန့ၣ်လီၤ.
စွ့ၣ်ကိၣ်ကိၤဟီၣ်ကဝီၤ ဖဲတၢ်မၤဝဲ(KNPC)ဒီးပၢဆှၢရဲၣ်ကျဲၤကမံးတံၥ်တၢ်အိၣ်ဖှိၣ်အခါန့ၣ် ခ့ၣ်အဲၣ်ယူၣ် ကရၢခိၣ်လီၢ်လံၤ စီၤမူၤတူစ့ဖိ, ပဒိၣ်စီၤစွ့ၤမီ ဃုၥ်ဒီး(PC) သုးခိၣ်စီၤကၠီၤညိၣ်,(KNA)သုးခိၣ်စီၤခၠ့ၣ်သူၤ,သုးခိၣ်စီၤမီၤဝ့ဒီး ကညီတၢ်ဘူၣ်တၢ်ဘါ ခိၣ်နၢ်, ကညီပၣ်တံၣ်ခိၣ်နၢ်ပှၤဘၣ်မူဘၣ်ဒါသ့ၣ်တဖၣ်ပၣ်ဃုၥ်ပၣ်ဂီၢ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဟီၣ်ကဝီၤအပူၤလၢတၢ်ကသူၣ်ထီၣ်တၢ်မုၥ်တၢ်ခုၣ်တၢ်မၤရဲၣ်ကျဲၤဒီး ကဆီၣ်ထွဲမၤစၢၤလီၢ်ကဝီၤကမျၢၢ်လၢအဘၣ်ဃ့ၢ်မှံ ဟးဖျိး အံၤအဂီၢ် ဖဲအပူၤကွံၥ်လါအ့ဖြ့ၣ် ၈ သီအခါန့ၣ် ကညီဖီၣ်စုကဝဲၤကရူၢ်လၢအထုးဖးတ့ၢ်သးဒီးခ့ၣ်အဲၣ်ယူၣ် ကရၢမိၢ်ပှၢ် သ့ၣ်တဖၣ်အံၤ ဒီး တၢ်ဘူၣ်တၢ်ဘါခိၣ်နၢ်,ကညီထံရူၢ်ကီၢ်သဲးပၣ်တံၣ်တဖၣ်ပၥ်ဖှိၣ်ထီၣ်သး စးထီၣ်ဒုးအိၣ်ထီၣ်ဝဲ(KNPC)ကရူၢ်အံၤ န့ၣ်လီၤ.
