ပယီၤသုးခးလီၤကျိဖးဒိၣ်ဒီးကဘီယူၤလဲၤခးလီၤကဒီးတၢ်လၢ(သုးက့ ၁)ဟီၣ်ကဝီၤ, ဖိသၣ်ဘၣ်ဒိ(၁)ဂၤဒီးသီခါဖၠၣ်,ကၠိဟးဂီၤ (၅)ဖျၢၣ်

လါအီးကထိဘၢၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဒီးကဘီ ယူၤလဲၤခးလီၤကဒီးဝဲတၢ်အဃိ ဖိသၣ်(၉)နံၣ်တဂၤဘၣ်ဒိဘၣ်ထံးဝဲဒီး ကၠိ,သီခါဖၠၣ်တၢ်သူၣ်ထီၣ်လီၤပှီၢ်ဟးဂီၤဘၣ်ဒိဘၣ်ထံးဝဲ (၅)ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲမဟါလါအီးကထိဘၢၣ် ၂၉ သီ မုၢ်ထူၣ် ၁၂း၃၀ အဆၢကတီၢ်န့ၣ် ပယီၤသုးတြိၤ(၄၄)စုတီၤဖီလၥ် ခီၣ်ချ့သုးရ့ၣ်(ခမရ-၉)အံၤ ပညိၣ်ခးလီၤ ဝဲ (၁၂၀ မမ)ကျိဖးဒိၣ် ၄ ဖျၢၣ်ဆူ သထူၣ်ကီၢ်ဆၣ် ထံညၣ်ပီၢ်ကရူၢ် ထံညၣ်ပီၢ်သဝီပူၤအံၤန့ၣ်လီၤ.

ပယီၤသုးခးလီၤကျိဖးဒိၣ်ဘျီဝဲအံၤ (၁)ဖျၢၣ်န့ၣ်လီၤတဲၥ်ပိၢ်ဖးထီၣ်ဝဲလၢထံညၣ်ပီၢ်သဝီ သီခါဖၠၣ်ကရၢၢ်ပူၤဒီး(၁)ဖျၢၣ်န့ၣ်လီၤတဲၥ် ပိၢ်ဖးထီၣ်ဝဲလၢ ကၠိဖီခိၣ်ဝံၤ မ့မ့ၢ်လၢအဂၤတဖျၢၣ်(၂)ဖျၢၣ်ခီန့ၣ် လီၤတဲၥ်ပိၢ်ဖးထီၣ်ဝဲလၢထံညၣ်ပီၢ်သဝီဒီး မယါကိ(မရမ်းကုန်း)သဝီ ဘၢၣ်စၢၤ နိၣ်တၤဃီၤတၢ်လီၢ်ကျီးပူၤအံၤန့ၣ်လီၤ.

ဒီးခီဖျိလၢကျိဖးဒိၣ်အံၤအဃိ ဖိသၣ်မုၣ် နီၢ်စွ့ၤဖူစၤ(နော်ရွှေဖူးစံ)လၢအသးနံၣ်အိၣ်ဝဲ(၉)နံၣ်အံၤဘၣ်ဒိဘၣ်ထံးတကးဒံးဘၣ် သီခါဖၠၣ်တၢ်သူၣ်ထီၣ်(၃)ဖျၢၣ် ဒီး ကၠိတီၤဒၢးတၢ်သူၣ်ထီၣ်(၂)ဖျၢၣ်လီၤပှီၢ်ဘၣ်ဒိဘၣ်ထံးဟးဂီၤဝဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဝဲန့ၣ်လီၤ.

ဒ်န့ၣ်အသိးသထူၣ်ကီၢ်ဆၣ်ပူၤတၢ်ချုးတၢ်ကဲထီၣ်သးအံၤဒံးဘၣ်လၢကၠဲးထိၣ်ကီၢ်ဆၣ်အပူၤ ဖဲလါအီးကထိဘၢၣ် ၂၈ သီ မုၢ်နၤခီ တဘျီ ဒီး ၂၉ သီ မုၢ်ဝါထီၣ် ၁း၀၄ မံးနံးအဆၢကတီၢ်န့ၣ်စ့ၢ်ကီး သုးမီၤစိရိၤ(jet fighter)ကဘီယူၤလဲၤတ့ၢ်လီၤကဒီးဝဲပီၣ် (၃၀၀)မ့ၣ်ပိၢ် ၂ ဖျၢၣ်ဆူ ဆီသုးခံကရူၢ် သဝီသီ(ချောင်းစောက်)အံၤန့ၣ်လီၤ.

“ပဆိမိၣ်အကဟဲခးလီၤတၢ်လၢလါပှဲၤအခါန့ၣ်.တၢ်စူၤအဃိတဟဲခးလီၤဘၣ် လါပှဲၤဝံၤခံသီမးဟဲခးလီၤကဒါဝဲ. ပှၤဘၣ်ဒိဘၣ်ထံး ဒုတအိၣ်ဘၣ်. လီၤတဲၥ်လၢဟံၣ်အဃၢၤတဖျၢၣ်.ကဘီယူၤဟဲတ့ၢ်လီၤမ့ၣ်ပိၢ်(၂)ဘျီညါ.တချုးတၢ်တဂီၤန့ၣ်ဘၣ် ဟဲခးလီၤဝဲဒီးဒြိ တပယူၥ်ဃီလီၤ”အဂ့ၢ်န့ၣ် ဆီးသုးခံသဝီဖိပိၥ်မုၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဆီသုးခံသဝီလၢကဘီယူၤဒီးပယီၤသုးခးလီၤဝဲကျိဖးဒိၣ်,မ့ၣ်ပိၢ်တလီၢ်လီၢ်အံၤ ကဘီယူၤအတၢ်လဲၤခးလီၤတၢ်ဘျီဝဲအံၤခီဖျိလီၤတဲၥ် ပိၢ်ဖးထီၣ်ဝဲလၢသဝီသီဃၢၤကျီးပူၤတၢ်ဖံးအီၣ်မၤအီၣ်လီၢ်အဃိ ကမျၢၢ်တၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.

(သုးက့ ၁)ဟီၣ်ကဝီၤအပူၤ ခဲအံၤတၢ်ဆၢကတီၢ်တုၤဃီၤဝဲလၢတၢ်ယီၤထီၣ်လံအဃိ လၢကလံၤကျါတၢ်လီၤဘၣ်ယိၣ် အံၤအဖီခိၣ် ဒ်သိးတၢ်သံတၢ်ဘၣ်ဒိဘၣ်ထံး, တၢ်ဟးဂူၥ် ဟးဂီၤသုတအိၣ်ထီၣ်တဂ့ၤအဂီၢ် ကမျၢၢ်တဖၣ်ကအိၣ်ဘၣ်လၢတၢ်ပလီၢ်ပဒီပူၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါဒုးသ့ၣ်ညါ ဟ့ၣ်ပလီၢ်ဝဲအိၣ်န့ၣ်လီၤ.