ကီၢ်သူလ့ၤတၢ်ပၢဟီၣ်ကဝီၤ(၃)လါအတီၢ်ပူၤ သုးမီၤစိရိၤတၢ်မၤထီဒါပှၤဂ့ၢ်ဝီခွဲးယၥ်အဃိ ကမျၢၢ်ဃုၥ်ဒီးဖိသၣ်သံဘၣ်ဒိ(၁၀၀)ဘျဲၣ်

လါအီးကထိဘၢၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤအပူၤ လါယူၤလံတုၤလါစဲးပထ့ဘၢၣ်လၢ(၃)လါအတီၢ်ပူၤ ခီဖျိ လၢသုးမီၤစိရိၤခးလီၤဝဲကျိဖးဒိၣ်,ဒြိဒီးလဲၤခးလီၤတၢ်ဒီးကဘီယူၤအံၤအဃိ လီၢ်ကဝီၤကမျၢၢ်ဃုၥ်ဒီးဖိဒံဖိသၣ်သံဘၣ်ဒိဘၣ်ထံး ပၥ်ဖှိၣ်ခဲလၢၥ်အိၣ်ဝဲ(၁၀၁)ဂၤအဂ့ၢ်န့ၣ် လါအီးကထိဘၢၣ် ၂၂ သီ ကညီတၢ်မုၥ်တၢ်ခုၣ်ပှၥ်ဘျးစဲးကရူၢ်(KPSN)အတၢ်ထုးထီၣ်ပၥ်ဖျါ ပူၤအသိးသ့ၣ်ညါဘၣ်န့ၣ်လီၤ.

သုးမီၤစိရိၤအံၤ လၢခ့ၣ်အဲၣ်ယူၣ် ကီၢ်ရ့ၣ်/သုးက့(၆)ဘ့ၣ်လၢအမ့ၢ် ဒူသထူၣ်ကီၢ်ရ့ၣ်(သုးက့ ၁),တီအူကီၢ်ရ့ၣ်(သုးက့ ၂), ချၢၣ်လွံၢ်ထူၣ်ကီၢ်ရ့ၣ်(သုးက့ ၃), ဘျံးဒဝဲၢ်ကီၢ်ရ့ၣ်(သုးက့ ၄), မုၢ်တြီၢ်ကီၢ်ရ့ၣ်(သုးက့ ၅)ဒီး ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်ကဝီၤ အပူၤ ပၥ်ဝဲတၢ်ခးပနီၣ်ဆူကမျၢၢ် ထံဖိကီၢ်ဖိ သူဝဲဒြိ,ကျိဖးဒိၣ်ဒီးကဘီယူၤမၤထီဒါဝဲပှၤဟီၣ်ဂ့ၢ်ဝီခွဲးယၥ်အိၣ်ဝဲ(၁၇၇၁)ဘျီညါန့ၣ်လီၤ.

ဒီးလၢသုးမီၤစိရိၤအတၢ်မၤထီဒါပှၤဂ့ၢ်ဝီခွဲးအပူၤန့ၣ် (၅၇)မျးကယၤန့ၣ်ခးလီၤဝဲကျိဖးဒိၣ်, (၃၈)မျးကယၤန့ၣ်သူဝဲဒၣ်ကဘီယူၤ ဟးခးလီၤတၢ်ဒီး မ့မ့ၢ်လၢ(၄)မျးကယၤအံၤခီန့ၣ်မ့ၢ်ဝဲတၢ်မၤထီဒါပှၤဂ့ၢ်ဝီခွဲးယၥ်အကလုၥ်လၢအဂၤသ့ၣ်တဖၣ်အဂ့ၢ်န့ၣ် စံးဝဲန့ၣ်လီၤ.

ခီဖျိလၢသုးမီၤစိရိၤအတၢ်ဟူးတၢ်ဂဲၤအၢအၢသီသီဒ်အံၤအဃိ (၃)လါအတီၢ်ပူၤ ကမျၢၢ်ထံဖိကီၢ်ဖိ ပိၥ်မုၣ်(၁၃)ဂၤ,ပိၥ်ခွါ(၁၂) ဒီး ပှၤလၢတၢ်တသ့ၣ်ညါဝဲ(၄)ဂၤ ပၥ်ဖှိၣ်ခဲလၢၥ်(၂၉)ဂၤသံဝဲဒၣ်ဒီး လၢန့ၣ်အမဲၥ်ညါ ကမျၢၢ်ပိၥ်မုၣ်(၂၂)ဂၤ,ပိၥ်ခွါ(၂၈)ဂၤဃုၥ်ဒီးပှၤလၢ တၢ်တသ့ၣ်ညါဝဲ(၇)ဂၤ ပၥ်ဖှိၣ်ခဲလၢၥ်(၇၂)ဂၤဘၣ်ဒိဘၣ်ထံးဝဲဒၣ်အဂ့ၢ်န့ၣ် (KPSN)အလံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.

ဒ်န့ၣ်အသိးပှၤလၢအသံတဖၣ်အကျါပၣ်ဃုၥ်ဝဲဖိသၣ်(၁၈)နံၣ်ဆူဖီလၥ်(၈)ဂၤဒီး ဘၣ်ဒိဘၣ်ထံးအကျါစ့ၢ်ကီးပၣ်ဃုၥ်ဝဲ ဖိသၣ်(၁၈)နံၣ် ဆူဖီလၥ်(၂၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

တကးဒံးဘၣ်ကီၢ်ရ့ၣ်/သုးက့(၆)ဘ့ၣ်အံၤအပူၤကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်တၢ်သူၣ်ထီၣ်(၃၁၁)ဖျၢၣ်, ကၠိ(၁၁)ဖျၢၣ်, သီခါဖၠၣ်(၇)ဖျၢၣ် ဒီး တၢ်ဘါယွၤသရိၥ်(၃)ဖျၢၣ် ပၥ်ဖှိၣ်ခဲလၢၥ်တၢ်သူၣ်ထီၣ်(၃၃၂)ဖျၢၣ်ဘၣ်ဒိဘၣ်ထံးဟးဂူၥ်ဟးဂီၤဝဲစ့ၢ်ကီးန့ၣ်လီၤ.

ဒ်(KPSN)တၢ်မၤနီၣ်စရီပူၤအသိးန့ၣ် လၢသုးမီၤစိရိၤအတၢ်မၤထီဒါပှၤဂ့ၢ်ဝီခွဲးယၥ်အကလုၥ်ကလုၥ်အံၤအဃိတၢ်(၃)လါအတီၢ်ပူၤအံၤ (သုးက့ ၁),(သုးက့ ၃),(သုးက့ ၅)ဟီၣ်ကဝီၤ (၃)ဘ့ၣ်အံၤအပူၤန့ၣ် ကမျၢၢ်သံဘၣ်ဒိဘၣ်ထံးဒီးတၢ်ဟးဂူၥ်ဟးဂီၤအနီၣ်ဂံၢ်ကဲထီၣ် အါကတၢၢ်န့ၣ်လီၤ.

ဒ်န့ၣ်အသိးခီဖျိလၢတၢ်ဒုးတၢ်ယၤဒီးသုးမီၤစိရိၤအတၢ်ဟူးတၢ်ဂဲၤအံၤအဖီခိၣ်စ့ၢ်ကီး ခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤ ကမျၢၢ်ထံဖိကီၢ်ဖိပှၤလီၢ်အိၣ်ကမှံ အနီၣ်ဂံၢ်အိၣ်ထီၣ်တုၤလၢ(၁.၁)တကကွဲၢ်ဘျဲၣ်အဂ့ၢ်န့ၣ် (KPSN)စံးဝဲန့ၣ်လီၤ.