Home တၢ်ကစီၣ် ဒူသထူၣ်ကီၢ်ရ့ၣ် မၤဝဲခီကရဲးတၢ်အိၣ်ဖှိၣ်ဖးဒိၣ်ဝံၤဝဲဒီး နဲၣ်ရွဲးပဒိၣ်စီၤအ့နဲၤ ကဲထီၣ်ဝဲကီၢ်ရ့ၣ်ခိၣ်

ဒူသထူၣ်ကီၢ်ရ့ၣ် မၤဝဲခီကရဲးတၢ်အိၣ်ဖှိၣ်ဖးဒိၣ်ဝံၤဝဲဒီး နဲၣ်ရွဲးပဒိၣ်စီၤအ့နဲၤ ကဲထီၣ်ဝဲကီၢ်ရ့ၣ်ခိၣ်

0
7

လါနိၣ်ဝ့ဘၢၣ် ၂၂ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်ပူၤ စးထီၣ်ဖဲတလါအံၤ လါနိၣ်ဝ့ဘၢၣ် ၁၄ သီတုၤ ၁၇ သီ လၢ(၄)သီ အတီၢ်ပူၤ တၢ်မၤဝဲ ၁၃ ဝီတဝီ ခီကရဲးတၢ်အိၣ်ဖှိၣ်ဖးဒိၣ်အံၤဒီး တၢ်ဃုထၢထီၣ်က့ၤခိၣ်နၢ်သီဝံၤဝဲလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.

လၢကီၢ်ရ့ၣ်မၤဝဲခီကရဲးတၢ်ဃုဘျီဝဲအံၤန့ၣ် လီၢ်ခၢၣ်သးထီဘိကမံးတံၥ်ဖိလၢအမ့ၢ် ပဒိၣ်မါကန့ၢ်ဒံၢ် ဒီး ပဒိၣ်စီၤဝ့ကၠီၣ် သ့ၣ်တဖၣ်အံၤ လဲၤထီၣ်ပၣ်ဃုၥ်ပၣ်ဂီၢ်ဝဲဒၣ်န့ၣ်လီၤ.

တကးဒံးဘၣ်ခီကရဲးအပူၤ လီၢ်ခၢၣ်သးထီဘိကမံးတံၥ်အမဲၥ်ညါ ကီၢ်ရ့ၣ်ပှၤဘၣ်မူဘၣ်ဒါ, သုးဂ့ၢ်ဝီခိၣ်နၢ်,ဝဲၤကျိၤခိၣ်နၢ် , ကညီသးစၢ် ကရၢ(KYO), ကညီပိၥ်မုၣ်ကရၢ(KWO)ခိၣ်နၢ်ခၢၣ်စး, ချၢၣ်လွံၢ်ထူၣ်ကီၢ်ရ့ၣ်ဃုၥ်ဒီး မုၢ်တြီၢ်ကီၢ်ရ့ၣ်ခိၣ်နၢ်ခၢၣ်စး ပၥ်ဖှိၣ်ခဲလၢၥ် (၁၅၀)ဘျဲၣ် လဲၤထီၣ်ဝဲဒၣ်န့ၣ်လီၤ.

ဒီးလၢခီကရဲးတၢ်အိၣ်ဖှိၣ်(၄)သီအတီၢ်ပူၤအံၤန့ၣ် တၢ်က့ၤပဲၥ်ထံနီၤဖးကွၢ်ကဒါက့ၤ(၄)နံၣ်အတီၢ်ပူၤတၢ်ဖံးတၢ်မၤသ့ၣ်တဖၣ်ဒီး လၢခါဆူညါတၢ်ပၢတၢ်ြပးအဂီၢ် တၢ်ဃုထၢထီၣ်ဝဲ ကီၢ်ရ့ၣ်ခိၣ်နၢ် ဒိၣ်ထီ(၅)ဂၤလၢအပၣ်ဃုၥ်ဝဲစံၣ်ညီကွီၢ်ခိၣ်အံၤန့ၣ်လီၤ.

ခီကရဲးဘျီဝဲအံၤ တၢ်ဃုထၢထီၣ်ဝဲ ကီၢ်ရ့ၣ်ခိၣ်လၢ ပဒိၣ်စီၤအ့နဲၤ, ကီၢ်ရ့ၣ်ခိၣ်-၂ သုးခိၣ်ကျၢၢ်ဖိ စီၤစိမၠ့ၣ်ထွ့, ကီၢ်ရ့ၣ်နဲၣ်ရွဲၣ် ပဒိၣ်စီၤသံၣ်ဟးဘလး, နဲၣ်ရွဲၣ်သဃဲၤ ပဒိၣ်စီၤကီၢ်သဘျ့ ဒီး စံၣ်ညီၣ်ကွီၢ်ခိၣ် ပဒိၣ်စီၤစိမၠ့ၣ် သ့ၣ်တဖၣ်အံၤန့ၣ်လီၤ.

ခိၣ်နၢ်လၢတၢ်ဃုထီၣ်ဝဲဘျီဝဲအံၤအကျါ တနီၤန့ၣ်တၢ်ဆီတလဲမ့တအိၣ်ဝဲဘၣ်ဆၣ် လီၤဆီဒၣ်တၢ် မ့မ့ၢ်ပဒိၣ်စီၤအ့နဲၤ လၢကဲထီၣ် က့ၤဝဲ ကီၢ်ရ့ၣ်ခိၣ်ခဲအံၤန့ၣ် အပူၤကွံၥ်မ့ၢ်ဝဲကီၢ်ရ့ၣ်နဲၣ်ရွဲၣ်တဂၤဒီး ပဒိၣ်စီၤစိမၠ့ၣ် လၢကဲထီၣ်က့ၤဝဲစံၣ်ညီကွၢ်ခိၣ်အံၤ မ့ၢ်တ့ၢ်ဝဲ ကီၢ်ရ့ၣ်ခိၣ်အသိး ပဒိၣ်စီၤသံၤဟၣ်ဘလးလၢတၢ်ဃုထၢထီၣ်အီၤလၢကီၢ်ရ့ၣ်နဲၣ်ရွဲၣ်အံၤ အပူၤကွံၥ် မ့ၢ်တ့ၢ်ဝဲကညီဆူၣ်ချ့မၤစၢၤ ဝဲၤကျိၤ (KDHW) မူဒါခိၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒူသထူၣ်ကီၢ်ရ့ၣ်ခီကရဲးတၢ်အိၣ်ဖှိၣ်အံၤဘၣ်တၢ်မၤတ့ၢ်ဝဲဖဲ၂၀၂၂ နံၣ် လါယနူၤလါအံၤအခါ ဒီး ဟီၣ်ကဝီၤဖဲန့ၣ်အပူၤလၢ ဒုးယၤတၢ်အိၣ်သးအဃိ တၢ်ကီတၢ်ခဲအိၣ်ထီတၢ်ကမၤက့ၤဝဲခီကရဲးတၢ်အိၣ်ဖှိၣ်အဖီခိၣ် ဒ်တၢ်ပၥ်ပနီၣ်ဝဲအသိးတၢ်ဆၢ ကတီၢ် တလၢကွံၥ်(၁၀)လါ ဃၣ်ဃၣ်မးတၢ်က့ၤမၤကဒါဝဲခဲအံၤန့ၣ်လီၤ.

ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤပၥ်ဝဲအိၣ်အသိး လီၢ်ခၢၣ်သး,ကီၢ်ရ့ၣ်ဒီးကီၢ်ဆၣ်ခီကရဲးတၢ်အိၣ်ဖှိၣ်ဖးဒိၣ်အံၤ ဘၣ်တၢ်မၤဝဲ(၄)နံၣ် တဘျီဒီး လၢတၢ်ဖးအံၤတဆီ တၢ်ဃုထၢထီၣ်က့ၤဝဲခိၣ်နၢ်သီတဖၣ်န့ၣ်လီၤ.

ဒူသထူၣ်ကီၢ်ရ့ၣ်(သုးက့ ၁)အံၤ ကီၢ်ဆၣ်အိၣ်ဝဲ(၅)ဘ့ၣ်လၢအမ့ၢ် ဘံလ့ကီၢ်ဆၣ်,ဖၣ်အၣ်ကီၢ်ဆၣ်,သထူၣ်ကီၢ်ဆၣ်,ကၠဲးထိၣ်ကီၢ်ဆၣ် ဒီး မီၤစကိၤကီၢ်ဆၣ်န့ၣ်လီၤ. ကီၢ်ဆၣ်သ့ၣ်တဖၣ်အံၤအကျါလီၤဆီဒၣ်တၢ်မ့မ့ၢ်လၢမီၤစကိၤကီၢ်ဆၣ်အံၤန့ၣ် မ့ၢ်ဝဲဟီၣ်ကဝီၤလီၤဆီ အသိး တုၤလၢခဲအံၤတၢ်လဲၤဆီလီၤပၥ်လီၤဝဲတၢ်ပၢတၢ်ြပးတန့ၢ်ဒံးဝဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.