Home တၢ်ကစီၣ် (ICJ) တၢ်စံၣ်ညီၣ် အမိၢ်လံၤမိၢ်ပှၢ် လၢ သုးကရူၢ်အစုတီၤဖီလၥ်အံၤအရ့ဒိၣ်ဝဲလၢ တၢ်ကဘၣ်ခိးကွၢ်ဟုၣ်ကွၢ်စုၣ်အဂ့ၢ် (KNU) စံးဝဲ

(ICJ) တၢ်စံၣ်ညီၣ် အမိၢ်လံၤမိၢ်ပှၢ် လၢ သုးကရူၢ်အစုတီၤဖီလၥ်အံၤအရ့ဒိၣ်ဝဲလၢ တၢ်ကဘၣ်ခိးကွၢ်ဟုၣ်ကွၢ်စုၣ်အဂ့ၢ် (KNU) စံးဝဲ

12
0

လါနိၣ်ဝ့ဘၢၣ် ၂၀, ၂၀၂၆နံၣ်, ခ့ၣ်အဲးစံၣ်,

သုးကရူၢ်အစုတီၤဖီလၥ် ပှၤလၢအမၤသံမၤဝီတ့ၢ်ဝဲ ရိဟ့ၣ်ကၠၤကလုၥ်ဒူၣ်သ့ၣ်တဖၣ်အံၤ ကီၢ်ပယီၤအပူၤ တကီၢ်ခါခဲအံၤ သုးကရူၢ်ဟံးန့ၢ်တၢ်စိကမီၤအဃိ ထံဂုၤကီၢ်ဂၤ တၢ်တီတၢ်တြၢ်အကွီၢ်ဘျီၣ်(ICJ) ကမၤကတၢၢ်ကွံၥ်ဝဲ တၢ်ဆၢတဲၥ် သ့ၣ် တဖၣ်အံၤ ပှၤဘၣ်မူဘၣ်ဒါတဖၣ် အတၢ်လူၤပိၥ်မၤထွဲအိၣ် တအိၣ် တၢ်ကဘၣ်ကွၢ်ဟုၣ်ကွၢ်စုၣ်ဝဲအဂီၢ် မ့ၢ်တၢ်လၢအရ့ဒိၣ် အဂ့ၢ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ဖျါထီၣ်ဝဲန့ၣ်လီၤ.

တၢ်ကစံၣ်ညီၣ်ဆၢတဲၥ်ဝဲ ပှၤမၤသံမၤဝီ ရခၢၣ်ကီၢ်စဲၣ် ရိၤဟ့ၣ်ကၠၤတဖၣ်အဂီၢ် တၢ်ဆၢကတီၢ် ယံၥ်တ့ၢ်ဝဲ အနံၣ်တဆံ ဃၣ်ဃၣ်အံၤ ကီၢ်ပယီၤမူဒါအိၣ်ဝဲအဂ့ၢ် (ICJ) တၢ်တီတၢ်တြၢ် ကွီၢ်ဘျီၣ် ပၥ်လီၤဝဲ လီၢ်ခံကတၢၢ် တၢ်ဆၢတဲၥ် အဖီခိၣ် တူၢ်လိၥ်မုၥ်ဝဲအဂ့ၢ်, တနံၤအံၤ လါနိၣ်ဝ့ဘၢၣ် (၂၀)သီအနံၤအပူၤ ခ့ၣ်အဲၣ်ယူၣ်ထုးထီၣ်ပၥ်ဖျါဝဲ လံၥ်တဘ့ၣ်န့ၣ်လီၤ.

ဒီးတၢ်အံၤအဖီခိၣ်, တကီၢ်ခါခဲအံၤ ကီၢ်ပယီၤပူၤ ရိၤဟ့ၣ်ကၠၤတၢ်မူးတၢ်ရၢ်အံၤ လီၤဆီဒၣ်တၢ် သုးကရူၢ် ဟံးန့ၢ်ဝဲ တၢ်စိတၢ်ကမီၤအဃိ တၢ်စံၣ်ညီၣ်သ့ၣ်တဖၣ်အံၤ တၢ်လူၤပိၥ်မၤထွဲအီၤအိၣ်တအိၣ် တၢ်ကခိးကွၢ်ဟုၣ်ကွၢ်စုၣ် သမံသမိးဝဲ သဘျ့အဂီၢ် အရ့ဒိၣ်ဝဲအဂ့ၢ် ခ့ၣ်အဲၣ်ယူၣ် စံးဝဲန့ၣ်လီၤ.

လၢန့ၣ်အမဲၥ်ညါ, ထဲဒၣ်တၢ်ခိးကွၢ်ဟုၣ်ကွၢ်စုၣ်တၢ်တခါဧိၤ န့ၣ် တလၢပှဲၤဝဲဒၣ်ဘၣ်ဒီး တၢ်ပၥ်ဖှိၣ်ဃၥ် တၢ်အုၣ်ကီၤ, တၢ်ကဒီသဒၢဝဲ ပှၤလၢသးသမူအိၣ်တ့ၢ်ဒံးလၢ တၢ်မူးတၢ်ရၢတဖၣ်အဂီၢ် တၢ်ကမၤဝဲ တၢ်သမံသမိးဝဲ ပှၤလၢမၤကမၣ်တၢ်တဖၣ်ဒီး လိၥ်ဘၢလိၥ်ကွီၢ်အီၤအဂ့ၢ်, တၢ်ထုးထီၣ်ပၥ်ဖျါအပူၤ ဒုးနဲၣ်ဝဲဒၣ်န့ၣ်လီၤ.

(ICJ)အတၢ်စံၣ်ညီၣ်အပူၤ ရိၤဟ့ၣ်ကၠၤသ့ၣ်တဖၣ် သူးသ့ၣ်လၤကပီၤ ကပူၤဖျဲးဝဲဒီးတၢ်ဘံၣ်တၢ်ဘၢ ကက့ၤအိၣ်ဆိးဘၣ်ဝဲ လၢနီၢ်ကစၢ်တၢ်လီၢ်တၢ်ကျဲ အဂီၢ် ပှၤတူၢ်ဘၣ်တၢ်ဘၣ်ဒိဘၣ်ထံးသ့ၣ်တဖၣ်အံၤ ကဒိးန့ၢ်တၢ်အံးထွဲ တၢ်ကဟုကယၥ် ဒီး စ့အီၣ်လိး, တၢ်ထီဒါမၤဟးဂီၤ တၢ်မၤသံပှၤဝီတၢ်, တၢ်ကဒုးအိၣ်ထီၣ်ဝဲ တၢ်ဟ့ၣ်တၢ်ကမၣ်တၢ်သးလီၤပလိၥ် လံၥ်ဃံးဃၥ် အမိၢ်လံၤမိၢ်ပှၢ် ဃုၥ်ဒီး တၢ်ဒုးလူၤပိၥ်မၤထွဲတၢ်ဘျၢသဲစး တၢ်ကဲထီၣ်သး လၢအလီၤဂၥ်လိၥ်သး သ့ၣ်တဖၣ် သုတကဲထီၣ်လၢၤတဂ့ၤအဂီၢ် တၢ်အုၣ်ကီၤသးတဖၣ် ဂ့ၢ်ဝီတဖၣ် ပၣ်ဃုၥ်ပၣ်ဂီၢ်ဝဲန့ၣ်လီၤ.

အၣ်စံၣ်ယၣ်, ဘီမုၢ်စၢဖှိၣ်ကရၢ ဒီး ထံဂုၤကီၢ်ဂၤအဒူၣ်အထၢ သ့ၣ်တဖၣ်အံၤ လၢတၢ်တီတၢ်တြၢ်ကွီၢ်ဘျီၣ် အတၢ်ဆၢတဲၥ် သးသမူ ကအိၣ်ထီၣ်ဝဲအဂီၢ် ကဘၣ်ဟ့ၣ်ဖှိၣ်ဝဲ တၢ်ဆီၣ်ထွဲမၤစၢၤအဂ့ၢ် ခ့ၣ်အဲၣ်ယူၣ် ဃ့ထီၣ်ဝဲဒၣ်န့ၣ်လီၤ.

လီၤဆီဒၣ်တၢ် တၢ်ဒီသဒၢ ကမျၢၢ်လီၢ်ကဝီၤဖိ, တၢ်ဟ့ၣ်တၢ်ဒိသူၣ်ဒိသးတၢ်ဆီၣ်ထွဲမၤစၢၤ ကတုၤလီၢ်ထီၣ်ဘးဝဲ အဂီၢ် ဒီး တၢ်က ကူစါယါဘျါဝဲ ပှၤတူၢ်ဘၣ်တၢ်ဘၣ်ဒိဘၣ်ထံး သ့ၣ်တဖၣ်အံၤ တၢ်ကဘၣ်မၤဝဲ အဂ့ၢ်, လံၥ်ထုးထီၣ်ပၥ်ဖျါအပူၤ ပၥ်ဖျါဝဲန့ၣ်လီၤ.

ဒီးတၢ်ဟ့ၣ်တၢ်ဆီၣ်ထွဲမၤစၢၤအပူၤ ရိၤဟ့ၣ်ကၠၤအဒူၣ်ဖိထၢဖိအမဲၥ်ညါ, တၢ်ကဘၣ်ဆဲးကျိး ဆဲးကျၢဝဲ ဒၣ် ဟီၣ်ကဝီၤ အပူၤ ကလုၥ်ဒူၣ်ဖီၣ်စုကဝဲၤ ပှၤလၢပၢြပးတၢ်နီၢ်နီၢ်တဖၣ်ဒီး ကီၢ်ပယီၤအပူၤ တၢ်ကဘၣ်သူၣ် ထီၣ်ဝဲ ဖဲၣ်ဒရၢၣ် ဒံၣ်မိၣ်ကရ့ၣ်စံၣ် သနူသီလၢ တၢ်ထဲသိးတုၤသိးခွဲးယၥ်အိၣ်လၢ ကလုၥ်ဒူၣ်ဖိတဖၣ် အဂီၢ် အဂ့ၢ် ခ့ၣ်အဲၣ်ယူၣ် ဒုးနဲၣ်ဝဲန့ၣ်လီၤ.

(ICJ) အတၢ်စံၣ်ညီၣ်အံၤ ထံကီၢ်ဒီတဘ့ၣ် အဂီၢ် တၢ်မၤသံမၤဝီကလုၥ်ဒူၣ်တၢ်မူးတၢ်ရၢ် အပူၤ မူဒါအိၣ်ဝဲအဂ့ၢ်, မ့ၢ်ဝဲ တၢ်ဆၢတဲၥ်အဆိကတၢၢ်တဘျီန့ၣ်လီၤ. တၢ်အံၤအဖီခိၣ်, ကီၢ်ပယီၤအပူၤ တၢ်ထီဒါမၤလီၤပှီၢ်ဝဲ သုးမီၤစိရိၤသနူ အံၤ ကီၢ်ပူၤ ကီၢ်ချၢ ကမျၢၢ်တၢ်ကရၢကရိ တဖၣ် တူၢ်လိၥ်မုၥ်ဝဲ အသိး, တၢ်စံၣ်ညီၣ်သ့ၣ်တဖၣ်အံၤ တၢ်ကမၤအိၣ်ထီၣ် အမိၢ်လံၤမိၢ်ပှၢ် အဂီၢ် ဃ့ထီၣ်ဝဲ အိၣ်စ့ၢ်ကီးန့ၣ်လီၤ.