လါဖ့ၤဘြူၤအါရံၤ ၁၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ဖဲမဟါလါဖ့ၤဘြူၤအါရံၤ(၁၇)သီအနံၤန့ၣ် ခီဖျိသုးကလၢၤအကိ ပူၤတၢ်ဃံးတၢ်စ့ၤအိၣ်ထီၣ်အါမံၤအဃိ ပယီၤသုးဖိဟဲက့ၤဟ့ၣ်လီၤသးကဒီး(၃)ဂၤလၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အစုပူၤအဂ့ၢ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်ဝါမုၢ် စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲမဟါအနံၤန့ၣ် လီၤ.
ပယီၤသုး(၃)ဂၤအံၤမ့ၢ်ဝဲ(ခမရ-၅၈၄)သုးရ့ၣ်အပှၤဒီး ဖဲလါဖ့ၤဘြူအါရံၤထီၣ်(၄)သီအနံၤစ့ၢ်ကီး ပယီၤသုးရ့ၣ်ဝဲန့ၣ်အပှၤဟဲက့ၤဟ့ၣ် လီၤတ့ၢ်အသး(၄)ဂၤဒံးန့ၣ်လီၤ.ပယီၤသုး(ခမရ-၅၈၄)သုးရ့ၣ်ပူၤအံၤ ခီဖျိတၢ်အိၣ်တၢ်ဆိး, တၢ်အီၣ်တၢ်အီတကူတလၢအိၣ်ထီၣ်ဝဲတ ကးဒံးဘၣ်တၢ်တီခိၣ်ရိၣ်မဲ,တၢ်နၥ်န့ၢ်လီၤသးကဒဲကဒဲအဂံၢ်စၢ်လီၤအဃိ အပှၤဃ့ၢ်ဟးထီၣ်ကွံၥ်လၢသုးကလၢၤပူၤကဲထီၣ်ဒ်အံၤလီၤ အဂ့ၢ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢပဒိၣ်စီၤဝါမုၢ် စံးဝဲဒ်အံၤန့ၣ်လီၤ.
“ဒုၣ်ဒါအသုးလၢဟဲက့ၤဟ့ၣ်လီၤအသးတနံၤညါအံၤန့ၣ်မ့ၢ်ဝဲ(ခမရ-၅၈၄)အသုးလီၤ. ပှၤဟဲက့ၤဟ့ၣ်လီၤသး(၃)ဂၤအံၤန့ၣ်ပကွၢ်က့ၤ အပူၤကွံၥ်လၢအဟဲက့ၤဟ့ၣ်လီၤအသး(၄)ဂၤအတၢ်ပိၥ်ထွဲလီၤ. ဘၣ်မနုၤလဲၣ်န့ၣ်တၢ် အီၣ်တၢ်အီၣ်လၢအဝဲသ့ၣ်အဂီၢ်တကူတလၢ လၢၤဘၣ်.ဒ်န့ၣ်အသိးအဝဲသ့ၣ်တၢ်အိၣ်တၢ်ဆိး,သုးကလၢၤအဒွဲပူၤတၢ်တီခိၣ်ရိၣ်မဲဒီးအဝဲသ့ၣ်ကဒဲကဒဲတၢ်နၥ်န့ၢ်လိၥ်သးတအိၣ်အါလၢၤဘၣ်. တခါလၢတၢ်ပၢဆူၣ်ပၢစိးအီၤအဝဲသ့ၣ်ဒီးကူၣ်တသ့ဃၣ်တဘၣ်လၢၤဒီးဘၣ်အိၣ်ဝဲလၢသုးကလၢၤအပူၤဒ်န့ၣ်လီၤ. အဝဲ သ့ၣ်ဟးထီၣ်န့ၣ်ဟးထီၣ်ဝဲလၢအနီၢ်ကစၢ်တၢ်ဆိကမိၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးလၢအဟဲက့ၤဟ့ၣ်လီၤသး(၃)ဂၤအံၤန့ၣ်မ့ၢ်ဝဲသုးဖိမၠဲၣ်မ့သူၤ, သုးဖိဝ့မ့ကိၤ, သုးဖိမိသီၣ်ယၢၤ ဒီးအဝဲသ့ၣ်မ့ၢ်ဝဲပှၤသးစၢ်လၢ အသးနံၣ်အိၣ်(၂၀)ဒီး (၂၄)နံၣ်အဘၢၣ်စၢၤသ့ၣ်တဖၣ်န့ၣ်လီၤ. ဒ်န့ၣ်အသိးအ၀ဲသ့ၣ်န့ၣ်တမ့ၢ်အသးဆူၣ်နုၥ် လီၤကဲသုးဘၣ်ဒီး မ့မ့ၢ်တခီသုးကီၣ်ကးအတၢ်မၢဆူၣ်အဃိဘၣ်နုၥ်လီၤကဲ၀ဲသုးလီၤအဂ့ၢ်န့ၣ် ပဒိၣ်စီၤဝါမုၢ်စံးအါထီၣ်ဝဲန့ၣ်လီၤ.
လၢန့ၣ်အမဲၥ်ညါအ၀ဲသ့ၣ်ဟဲက့ၤဟ့ၣ်လီၤသးဘျီ၀ဲအံၤအပူၤန့ၣ် ဟဲက့ၤစိၥ်ဃုၥ်ဝဲ MA3 (၂) ခိၣ်, MA1 (၁) ခိၣ်, ကျိဆၣ်ဒၢ (၁၁) ဘ့ၣ်ဒီးကျိချံ (၇၇၆) ဖျၢၣ် ဒီး စုမ့ၣ်ပိၢ်(၁)ဖျၢၣ် သ့ၣ်တဖၣ်အဃိ လၢၢ်ဒိၣ်ကီၢ်ဆၣ်(KNLA)သုးရ့ၣ်(၉)ဟ့ၣ်လၤကပီၤ ဃုၥ်စ့ၢ်ကီး၀ဲ အကလီၢ်(၁၀)ကၠး ကိးဂၤဒဲးစုၥ်စုၥ်အဂ့ၢ်သ့ၣ်ညါဘၣ်န့ၣ်လီၤ.
ပှၤသုးဖိလၢအဟဲဟ့ၣ်လီၤသးသ့ၣ်တဖၣ်အံၤဒ်သုးတၢ်သိၣ်တၢ်သီတၢ်ဘျၢ,အတၢ်မၤကျဲအိၣ်ဝဲအသိး တၢ်တူၢ်လိၥ်အံးထွဲ ကွၢ်ထွဲအဝဲသ့ၣ်ဂ့ၤဂ့ၤဒီး ဒ်န့ၣ်အသိးပှၤလၢတတူၢ်လိၥ်ပယီၤသုးမီၤစိရိၤကလုၥ်ဒိၣ်စိသနူတဖၣ်မ့ၢ်အဲၣ်ဒိးဟဲက့ၤ ဟ့ၣ်လီၤသး သ့ၣ်တဖၣ်တၢ်အိၣ်ခိးသဂၢၢ်တူၢ်လိၥ်ခီၣ်ဆၢအဝဲသ့ၣ်ထီဘိလီၤအဂ့ၢ် ပဒိၣ်စီၤဝါမုၢ် တဲဒုးသ့ၣ်ညါအါထီၣ်ဝဲဒၣ်န့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်အပူၤ စးထီၣ်လၢ(၂၀၂၅)နံၣ်ထီၣ်ဒီးတုၤလၢတလါအံၤလါဖ့ၤဘြူၤအါရံၤအံၤန့ၣ် ပယီၤသုးဟဲက့ၤဟ့ၣ်လီၤသးခဲလၢၥ်အိၣ်ဝဲ(၉)ဂၤလံအသိး ပှၤသ့ၣ်တဖၣ်အံၤအါဒၣ်တက့ၢ်န့ၣ် သုးကီၣ်ကးဖီၣ်န့ၢ်ဆူၣ်အဝဲသ့ၣ်, ဆှၢထီၣ်အဝဲသ့ၣ်ဆူတၢ်မဲၥ်ညါဝံၤ ဃ့ၢ်ပူၤဖျဲးထီၣ်သးဟဲက့ၤဟ့ၣ်လီၤအသးလၢတၢ်ပၢၢ်ဆၢသုးကရူၢ်အအိၣ်ဒ်အံၤလီၤ အဂ့ၢ်န့ၣ် လီၢ်ကဝီၤအပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
