လါမးရှး ၃၁ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ပယီၤအပူၤ ဖဲမးရှး ၂၈ သီအနံၤန့ၣ် ဟီၣ်ခိၣ်ဟူးကဲထီၣ်၀ဲဒိၣ်ဒိၣ်မုၢ်မုၢ်ဒီး ခီဖျိလၢဟီၣ်ခိၣ်ဟူးအံၤအဃိ ကမျၢၢ်ထံဖိကီၢ်ဖိလၢအဘၣ် ကွၢ်ဆၢၣ်မဲၥ်န့ဆၢၣ်တၢ်တတၢၥ်တနါတဖၣ် လၢတၢ်ဆီၣ်ထွဲမၤစၢၤဂ့ၢ်ဂီၢ်အူတၢ်လိၣ်အဆၢကတီၢ်အံၤ ကဂုၥ်ကျဲးဃုကျဲဒ်တၢ်သ့အိၣ် အသိး အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပၥ်ဖျါ၀ဲဖဲမဟါလါမးရှး ၃၀ သီအနံၤန့ၣ်လီၤ.
ဖဲအပူၤကွံၥ်လါမးရှး ၂၈ သီ ဟါခီ ၁း၂၀ ဘျဲၣ်အဆၢကတီၢ် ဟီၣ်ခိၣ်ဟူးကဲထီၣ်၀ဲဒိၣ်ဒိၣ်မုၢ်မုၢ်လၢကီၢ်ပယီၤပူၤကဲထီၣ်သးအဃိ တၢ်စုလီၢ် ခီၣ်ခိၣ်ဟးဂူၥ်ဟးဂီၤဒီးသးသမူအါဖျၢၣ်ဘၣ်လီၤမၢ်ကွံၥ်၀ဲဒၣ်အဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သးအုးဃုၥ်ဒီး ကမျၢၢ်ထံဖိ ကီၢ်ဖိလၢအဘၣ်ကွၢ်ဆၢၣ်မဲၥ်တၢ်သ့ၣ်တဖၣ်အံၤအဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်ဖဲလၢထံဖိကီၢ်ဖိကမျၢၢ်ဘၣ်ကွၢ်ဆၢၣ်မဲၥ်၀ဲန့ဆၢၣ်တၢ်တတၢၥ်တနါဟီၣ်ခိၣ်ဟူးတၢ်ဟးဂူၥ်ဟးဂီၤဒိၣ်ဒိၣ်မုၢ်မုၢ်အကတီၢ်အံၤ သုးကီၣ်ကးအံၤတမၤစၢၤ၀ဲဘၣ်,တြီမၤတံၥ်တၥ်၀ဲအမဲၥ်ညါ စူးကါ၀ဲကလံၤကျါတၢ်ဒုး,ပၥ်လီၤ၀ဲတၢ်ခးပနီၣ်ဆူ ကမျၢၢ်ထံဖိကီၢ်ဖိ အိၣ်ဆိး လီၢ်ကျဲ ခးလီၤတၢ်လၢကဘီယူၤတပယူၥ်ဃီအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
ညီနုၢ်ဖဲထံကီၢ်တဘ့ၣ်ဘၣ်ကွၢ်ဆၢၣ်မဲၥ်၀ဲန့ဆၢၣ်တၢ်တတၢၥ်တနါအကတီၢ်န့ၣ် ထံကီၢ်၀ဲန့ၣ်အသုးမုၢ်ဒိၣ်တဖၣ်နုၥ်လီၤမၤစၢၤတၢ်လၢ အဆိအချ့အိၣ်၀ဲဘၣ်ဆၣ် မ့မ့ၢ်သုးမီၤစိရိၤအံၤန့ၣ်အီၣ်ကဘျံးအီၣ်ကဘျၣ်၀ဲထံကီၢ်တၢ်ထူးတၢ်တီၤဒီးဟံန့ၢ်၀ဲတၢ်ခွဲးတၢ်ယၥ်ဂ့ၤ လီၤဆီ တဖၣ်၀ံၤကရၢကရိသူၣ်ထီၣ်ဆီလီၤအသးလၢကဒုးမၤဟးဂီၤအထံဖိကီၢ်ဖိဧိၤအဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
လၢန့ၣ်အမဲၥ်ညါအပူၤကွံၥ်(၂၀၀၈)ကလံၤမုၢ်ဖးဒိၣ်လီၤ(နၣ်က့း)ကဲထီၣ်အခါန့ၣ် တၢ်ဆီၣ်ထွဲမၤစၢၤလၢကမျၢၢ်ထံဖိကီၢ်ဖိအဂီၢ်တဖၣ် သုးမီၤစိရိၤကရူၢ်အံၤ စူးကါ၀ဲလၢအသုးကရူၢ်တၢ်ဘၣ်ဘျုးအိၣ်တ့ၢ်၀ဲအဃိ သုးကီၣ်ကးအံၤဒ်သိးအသုတဟံန့ၢ်တၢ်ခွဲးတၢ်ယၥ်ဒီး စူးကါ၀ဲ လၢထံရူၢ်ကီၢ်သဲးတၢ်ဘၣ်ဘျုးတဂ့ၤအဂီၢ်န့ၣ် တၢ်ကအိၣ်ခိးကွၢ်ဟုၣ်ကွၢ်ဆူၣ်၀ဲဘူးဘူးတံၢ်တံၢ်အဂ့ၢ်န့ၣ် ခ့ၣ်အဲၣ်ယူၣ် ဟ့ၣ်သဆၣ် ထီၣ်စ့ၢ်ကီး၀ဲန့ၣ်လီၤ.
တကတီၢ်ဃီဟီၣ်ခိၣ်ဟူးကဲထီၣ်ဖဲ(၂၈)သီအခါန့ၣ် ကဲထီၣ်၀ဲလၢကမျၢၢ်လၢအိၣ်သုးမီၤစိရိၤတၢ်ပၢဟီၣ်က၀ီၤပူၤအိၣ်၀ဲအသိး ကမျၢၢ်လၢအိၣ်တၢ်ပၢၢ်ဆၢကရူၢ်ကရၢအတၢ်ပၢတၢ်ြပးပူၤစ့ၢ်ကီးကဲထီၣ်အိၣ်၀ဲအဃိ တၢ်ဟ့ၣ်တၢ်ဆီၣ်ထွဲမၤစၢၤတဖၣ်သုတကဲထီၣ် လၢသုးမီၤစိရိၤအဂီၢ်တဂ့ၤအဂီၢ် တၢ်ဆီၣ်ထွဲမၤစၢၤတဖၣ်ကဟ့ၣ်လီၤဘၣ်လၢဟီၣ်က၀ီၤကရူၢ်ကရၢလၢ အမၤစၢၤတၢ်တဖၣ်အအိၣ် ဒ်သိးတၢ်မၤစၢၤအံၤကလဲၤတုၤ၀ဲဒၣ်ဆူ ပှၤလၢအတူၢ်ဘၣ်တၢ်နီၢ်နီၢ်သ့ၣ်တဖၣ်အစုပူၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
ဟီၣ်ခိၣ်ဟူးလၢအဟဲကဲထီၣ်ဖဲကီၢ်ပယီၤအပူၤဖဲ(၂၈)သီအနံၤအံၤန့ၣ် ကမျၢၢ်သံ၀ဲ(၁၆၁၄)ဂၤ, ဘၣ်ဒိဘၣ်ထံး(၁၅၅၇)ဂၤဒီး ပှၤလီၤမၢ် လၢတၢ်တထံၣ်၀ဲဒံးဘၣ်အိၣ်၀ဲ(၁၃၇၆)ဂၤတကးဒံးဘၣ်အမဲၥ်ညါ ဟံၣ်တၢ်သူၣ်ထီၣ်ဟးဂီၤ(၁၃,၄၁၁)ဖျၢၣ်, ဃိၣ်ဟးဂီၤ (၁၅၇)ဖျၢၣ်, ကီၤလၤပလံၤဒီးသီခါဖၠၣ်တၢ်သူၣ်ထီၣ်(၅၂)ဖျၢၣ်, ကၠိ(၇၁)ဖျၢၣ် ဟးဂီၤ၀ဲဒၣ်အသိး ကျဲစ့ၢ်ကီးဟးဂီၤအိၣ်၀ဲ(၄၃)ဘိ အဂ့ၢ်န့ၣ် ဒီကလုၥ်ဃူ ဖိးပဒိၣ်(NUG) ထုးထီၣ်ပၥ်ဖျါ၀ဲဖဲလါမးရှး(၃၀)အနံၤန့ၣ်လီၤ.
ဘၣ်ဆၣ်စးထီၣ်လၢတၢ်ကဲထီၣ်သးတုၤလၢတနံၤအံၤလါမးရှး ၃၁ သီ တၢ်ဆၢကတီၢ်န့ၢ်(၄)သီလံဘၣ်ဆၣ် ပှၤလၢအလီၤမၢ်တဖၣ် ခီဖျိတၢ်တထံၣ်၀ဲခဲလၢၥ် ဒံးဘၣ်ဒီးကရူၢ်ကရၢတဖၣ်ဆဲးလူၤဃု၀ဲအဖၢမုၢ်အဃိ တၢ်သံတၢ်ဘၣ်ဒိဘၣ်ထံးအနီၣ်ဂံၢ်ကဟဲအါထီၣ်အါန့ၢ်အ၀ဲ အံၤသ့၀ဲဒၣ်န့ၣ်လီၤ.
